ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಕಂಡು ಕೇಳರಿಯದ ರೀತಿಯಲ್ಲಿ ವರುಣನ ಆರ್ಭಟ..! ಹೀಗಾಗಿದೆ ಇಂದಿರಾಗಾಂಧಿ ವಿಮಾನನಿಲ್ದಾಣದ ಸ್ಥಿತಿ

ವಿಮಾನ ನಿಲ್ದಾಣದಿಂದ ನೀರನ್ನು ಹೊರಹಾಕಲಾಗಿದ್ದು, ಈಗ ಏರ್​ಪೋರ್ಟ್​ನಲ್ಲಿ ಸಹಜ ಸ್ಥಿತಿಯಿದೆ ಎಂದು ಅಧಿಕಾರಿಗಳು ಸ್ಪಷ್ಟನೆ ನೀಡಿದ್ದಾರೆ.

ಏಕಾಏಕಿ ಸುರಿದ ಭಾರೀ ಮಳೆಯಿಂದಾಗಿ ಕೆಲಕಾಲ ಏರ್​ಪೋರ್ಟ್ ಮುಂಭಾಗವು ಜಲಾವೃತವಾಗಿತ್ತು. ಕೂಡಲೇ ಕಾರ್ಯಪ್ರವೃತ್ತವಾದ ನಮ್ಮ ತಂಡವು ಈ ಸಮಸ್ಯೆಯನ್ನು ಬಗೆಹರಿಸುವಲ್ಲಿ ಯಶಸ್ವಿಯಾಗಿದೆ ಎಂದು ಏರ್​ಪೋರ್ಟ್​ ಆಡಳಿತ ಮಂಡಳಿ ಅಧಿಕೃತ ಟ್ವೀಟ್​ ಮಾಡಿದೆ.

ಹವಾಮಾನ ವೈಪರಿತ್ಯ ಹಿನ್ನೆಲೆಯಲ್ಲಿ ವಿಮಾನ ಸಂಚಾರ ಕೂಡ ಸ್ಥಗಿತಗೊಂಡಿದೆ. ದೆಹಲಿಯಲ್ಲಿ ಶುಕ್ರವಾರ ಬೆಳಗ್ಗೆ 8:30ರಿಂದ ಶನಿವಾರ ಬೆಳಗ್ಗೆ 8:30ರವರೆಗೆ 94.7 ಮೀಮೀ ಮಳೆ ದಾಖಲಾಗಿದೆ. ದಾಖಲೆ ಪ್ರಮಾಣದ ಮಳೆಯಿಂದಾಗಿ ರಾಜಧಾನಿಯ ಸಾಕಷ್ಟು ರಸ್ತೆಗಳು ಜಲಾವೃತಗೊಂಡಿವೆ.

ಭಾರತೀಯ ಹವಾಮಾನವು ಬೆಳಗ್ಗೆ 7 ಗಂಟೆಯಿಂದ 10 ಗಂಟೆಯವರೆಗೆ ಆರೆಂಜ್​ ಅಲರ್ಟ್ ಘೋಷಿಸಿತ್ತು.  ಬಳಿಕ ಮತ್ತೆ 11:30 ರಿಂದ 2:30ರವರೆಗೆ ವಿಸ್ತರಿಸಲಾಗಿದೆ. ಶುಕ್ರವಾರ ದೆಹಲಿಯಲ್ಲಿ 1100 ಮಿ.ಮೀ ಮಳೆಯಾಗಿದ್ದು ಇದು ಕಳೆದ 46 ವರ್ಷಗಳಲ್ಲಿ ದಾಖಲೆಯಾದ ದಾಖಲೆ ಪ್ರಮಾಣದ ಮಳೆಯಾಗಿದೆ. ಇದಕ್ಕೂ ಮೊದಲು 2003ರಲ್ಲಿ ದೆಹಲಿಯು 1050 ಮಿ.ಮೀ ಮಳೆಗೆ ಸಾಕ್ಷಿಯಾಗಿತ್ತು.