ಉದ್ಯೋಗ ಹುಡುಕುತ್ತಿರುವವರಿಗೊಂದು ಖುಷಿ ಸುದ್ದಿಯಿದೆ. ದಿಗ್ಗಜ ಐಟಿ ಕಂಪನಿ ಕಾಗ್ನಿಜೆಂಟ್ (cognizant) ಈ ವರ್ಷ ಒಂದು ಲಕ್ಷ ಜನರಿಗೆ ಉದ್ಯೋಗ ನೀಡಲಿದೆ. ಜೂನ್ ತ್ರೈಮಾಸಿಕದಲ್ಲಿ ಕಂಪನಿಯ ಆದಾಯ ಶೇಕಡಾ 41.8 ರಷ್ಟು ಹೆಚ್ಚಳಗೊಂಡಿದೆ. ಈ ಹೆಚ್ಚಳದ ಜೊತೆ ಕಂಪನಿ ಒಟ್ಟೂ ಆದಾಯ 51.2 ಕೋಟಿ ಯುಎಸ್ ಡಾಲರ್ ಅಂದ್ರೆ ಸುಮಾರು 3,801.7 ಕೋಟಿ ರೂಪಾಯಿಯಾಗಿದೆ.
ಯುಎಸ್ ಮೂಲದ ಕಂಪನಿಯು ಜೂನ್ 2020 ರ ತ್ರೈಮಾಸಿಕದಲ್ಲಿ ಒಟ್ಟು 36.1 ಕೋಟಿ ಡಾಲರ್ ಆದಾಯವನ್ನು ಪಡೆದಿದೆ. ಕಂಪನಿಯು ಬುಧವಾರ ನೇಮಕಾತಿ ಬಗ್ಗೆ ಮಾಹಿತಿ ನೀಡಿದೆ. 2021ರಲ್ಲಿ ಕಂಪನಿ ಸುಮಾರು 1 ಲಕ್ಷ ಉದ್ಯೋಗಿಗಳ ನೇಮಕಕ್ಕೆ ಮುಂದಾಗಿದೆ.
ಕಾಗ್ನಿಜೆಂಟ್ ಸಿಇಒ ಬ್ರಿಯಾನ್ ಹಂಫ್ರೈಸ್ ಪ್ರಕಾರ, 2021ರಲ್ಲಿ ಕಂಪನಿ ಸುಮಾರು 1 ಲಕ್ಷ ಜನರನ್ನು ನೇಮಕ ಮಾಡಿಕೊಳ್ಳಲಿದೆ. 1 ಲಕ್ಷ ಎಸೋಸಿಯೇಟ್ಸ್ ಗೆ ತರಬೇತಿ ನೀಡಲಿದೆ. ಕಾಗ್ನಿಜೆಂಟ್ 2021 ರಲ್ಲಿ ಸುಮಾರು 30,000 ಪದವೀಧರರಿಗೆ ಮತ್ತು 2022ರಲ್ಲಿ 45,000 ಫ್ರೆಶರ್ಸ್ ಗೆ ಕೆಲಸ ನೀಡಲಿದೆ ಎಂದಿದ್ದಾರೆ.
ಎರಡನೇ ತ್ರೈಮಾಸಿಕದ ಟಾಪ್‌ಲೈನ್ ಫಲಿತಾಂಶಗಳು ನಮ್ಮ ಅಂದಾಜುಗಳನ್ನು ಮೀರಿವೆ. 2021 ರ ಆದಾಯದ ಬೆಳವಣಿಗೆಯನ್ನು ಶೇಕಡಾ 10.2- 11.2 ಕ್ಕೆ ಹೆಚ್ಚಿಸಿದ್ದೇವೆ ಎಂದವರು ಹೇಳಿದ್ದಾರೆ. ಗ್ರಾಹಕರ ಬಲವಾದ ಬೇಡಿಕೆಯನ್ನು ಪೂರೈಸಲು, ಕಾಗ್ನಿಜಂಟ್ ನೇಮಕಾತಿ ಸಾಮರ್ಥ್ಯವನ್ನು ಹೆಚ್ಚಿಸಲು ಮುಂದಾಗಿದೆ ಎಂದವರು ತಿಳಿಸಿದ್ದಾರೆ.
ಈ ಮಧ್ಯೆ ಕಾಗ್ನಿಜೆಂಟ್ ಕಂಪನಿ ಕೆಲಸ ಬಿಡುತ್ತಿರುವವರ ಸಂಖ್ಯೆ ಹೆಚ್ಚಾಗಿದ್ದು, ಇದು ಕಂಪನಿಗೆ ತಲೆನೋವು ತಂದಿದೆ. ಮೂರನೇ ತ್ರೈಮಾಸಿಕದಲ್ಲಿ ಕಂಪನಿ ತೊರೆದ ಭಾರತೀಯರ ಸಂಖ್ಯೆ ಶೇಕಡಾ 31ರಷ್ಟಿದೆ. ಏಪ್ರಿಲ್ 2021ರಿಂದ ಜೂನ್ 2021ರ ಮಧ್ಯೆ ಐಟಿ ಕಂಪನಿ ಕೆಲಸ ತೊರೆದವರಲ್ಲಿ ಈ ಕಂಪನಿ ನೌಕರರು ಹೆಚ್ಚಿದ್ದಾರೆ.
Loading ...