ಅಮೆರಿಕದ ನ್ಯಾಶ್ವಿಲ್ಲೆ ಎಂಬಲ್ಲಿ ನಡೆದ ವಿಮಾನ ದುರ್ಘಟನೆಯಲ್ಲಿ ಟಾರ್ಜನ್ ಖ್ಯಾತಿಯ ನಟ ಜೋ ಲಾರಾ ಹಾಗೂ ಅವರ ಪತ್ನಿ ಸೇರಿದಂತೆ ಒಟ್ಟು ಏಳು ಮಂದಿ ಸಾವಿಗೀಡಾಗಿದ್ದಾರೆ.
ಶನಿವಾರ ಸ್ಥಳೀಯ ಕಾಲಮಾನ ಬೆಳಗ್ಗೆ 11 ಗಂಟೆ ಸುಮಾರಿಗೆ ಈ ದುರಂತ ಸಂಭವಿಸಿದೆ. ಟೆನ್ನೆಸ್ಸಿ ವಿಮಾನ ನಿಲ್ದಾಣದಿಂದ ಫ್ಲೋರಿಡಾದ ಪ್ಲಾಮ್ ಬೀಚ್ಗೆ ಈ ಸಣ್ಣ ವಾಣಿಜ್ಯ ವಿಮಾನವು ಹೊರಟಿತ್ತು.
ಈ ವಿಮಾನವು ನ್ಯಾಶ್ವಿಲ್ಲೆಯಿಂದ ದಕ್ಷಿಣದಲ್ಲಿ 19 ಕಿಲೋಮೀಟರ್ ದೂರದಲ್ಲಿರುವ ಪರ್ಸಿ ಪ್ರೀಸ್ಟ್ ಸರೋವರದಲ್ಲಿ ಪತನಗೊಂಡಿದೆ. ವಿಮಾನದಲ್ಲಿದ್ದ ಏಳು ಮಂದಿ ಸಾವಿಗೀಡಾಗಿದ್ದಾರೆ ಎಂದು ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ ಮಾಹಿತಿ ನೀಡಿದೆ.
ಜೋ ಲಾರಾ 1989ರಲ್ಲಿ ತೆರೆ ಕಂಡ ಟೆಲಿವಿಷನ್ ಮೂವಿ ಟಾರ್ಜನ್ ಇನ್ ಮ್ಯಾನ್ಹ್ಯಾಟನ್ನಲ್ಲಿ ಟಾರ್ಜನ್ ಪಾತ್ರವನ್ನ ನಿರ್ವಹಿಸಿದ್ದರು. ಇದಾದ ಬಳಿಕ ಟಾರ್ಜನ್ : ದಿ ಎಪಿಕ್ ಅಡ್ವೆಂಚರಸ್ ಎಂಬ ಟೆಲಿವಿಷನ್ ಸಿರೀಸ್ನಲ್ಲಿ 1996-1997ರಲ್ಲಿ ಕಾಣಿಸಿಕೊಂಡಿದ್ದರು. ಟಾರ್ಜನ್ ಪಾತ್ರ ಲಾರಾಗೆ ಅಪಾರ ಪ್ರಮಾಣದಲ್ಲಿ ಜನಪ್ರಿಯತೆಯನ್ನ ನೀಡಿತ್ತು.
ಲಾರಾ ಹಾಗೂ ಗ್ವೆನ್ ಶ್ಯಾಂಬ್ಲಿನ್ ಲಾರಾ 2018ರಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದರು. ಗ್ವೆನ್ ಕ್ರಿಶ್ಚಿಯನ್ ತೂಕ ಇಳಿಕೆ ಗ್ರೂಪ್ ವೇಯ್ ಡೌನ್ ಮಿನಿಸ್ಟ್ರೀಸ್ನ ಮುಖಂಡೆ ಆಗಿದ್ದಾರೆ. ಮೃತ ಗ್ವೆನ್ ತಮ್ಮ ಮೊದಲ ವಿವಾಹದಲ್ಲಿ ಇಬ್ಬರು ಮಕ್ಕಳನ್ನ ಹೊಂದಿದ್ದರು ಎಂದು ಸ್ಥಳೀಯ ವೆಬ್ಸೈಟ್ ಒಂದು ಮಾಹಿತಿ ನೀಡಿದೆ.
Loading ...