ʼಜೀವನಾಂಶʼ ಪ್ರಕರಣದಲ್ಲಿ ವಿಚ್ಛೇದಿತ ಪತ್ನಿಯ ಆದಾಯದ ವಿವರ ಪಡೆಯಬಹುದಾ ಪತಿ ? ಇಲ್ಲಿದೆ ವಿವರ

ಕೇಂದ್ರ ಮಾಹಿತಿ ಆಯೋಗದ (ಸಿಐಸಿ) ಇತ್ತೀಚಿನ ನಿರ್ಧಾರದ ಪ್ರಕಾರ ಜೀವನಾಂಶ ಪ್ರಕರಣದಲ್ಲಿ ಸಾಕ್ಷ್ಯವನ್ನು ದೃಢೀಕರಿಸಲು ಪತಿ ಆರ್‌ಟಿಐ ಮೂಲಕ ತನ್ನ ವಿಚ್ಛೇದಿತ ಹೆಂಡತಿಯ ಸಾಮಾನ್ಯ ಆದಾಯದ ವಿವರಗಳನ್ನು ಪಡೆಯಬಹುದಾಗಿದೆ.

ಪ್ರಕರಣವೊಂದರಲ್ಲಿ ಮಾಹಿತಿ ಆಯುಕ್ತರಾದ ಸರೋಜ್ ಪುನ್ಹಾನಿ ಅವರು ಆದಾಯ ತೆರಿಗೆ ಇಲಾಖೆಯ ಕೇಂದ್ರ ಸಾರ್ವಜನಿಕ ಮಾಹಿತಿ ಅಧಿಕಾರಿ (ಸಿಪಿಐಒ) ಅವರಿಗೆ ವಿಚ್ಚೇದಿತ ಪತ್ನಿಯ ತೆರಿಗೆಗೆ ಒಳಪಡುವ ಸಾಮಾನ್ಯ ಆದಾಯದ ಸಾಮಾನ್ಯ ವಿವರಗಳನ್ನು ಅವರ ಪತಿಗೆ ನೀಡುವಂತೆ ಸೂಚಿಸಿದ್ದಾರೆ.

ಆದೇಶದಲ್ಲಿ ಆರ್‌ಟಿಐ ಅರ್ಜಿಯಲ್ಲಿ ಒಳಗೊಂಡಿರುವ ನಿರ್ದಿಷ್ಟ ಅವಧಿಗೆ ಮೇಲ್ಮನವಿದಾರರ ಪತ್ನಿಯ ನಿವ್ವಳ ತೆರಿಗೆಯ ಆದಾಯ/ಒಟ್ಟು ಆದಾಯದ ಸಾಮಾನ್ಯ ವಿವರಗಳನ್ನು ಮಾತ್ರ ಅರ್ಜಿದಾರರಿಗೆ ರಶೀದಿಯ ದಿನಾಂಕದಿಂದ 15 ದಿನಗಳೊಳಗೆ ಉಚಿತವಾಗಿ ಒದಗಿಸಲು CPIO ಗೆ ಆಯೋಗವು ನಿರ್ದೇಶಿಸಿದೆ. ಈ ವರದಿಯನ್ನು ತಕ್ಷಣವೇ 7 ದಿನಗಳಲ್ಲಿ CPIO ಆಯೋಗಕ್ಕೆ ಕಳುಹಿಸಬೇಕು ಎಂದು 27 ನೇ ಸೆಪ್ಟೆಂಬರ್ 2023 ರ ಸಿಐಸಿಯ ಆದೇಶವು ಹೇಳಿದೆ.

ತೀರ್ಪಿನ ಪ್ರಕಾರ ಮೇಲ್ಮನವಿದಾರನು ತನ್ನ ವಿರುದ್ಧ ಕಾನೂನು ನ್ಯಾಯಾಲಯದಲ್ಲಿ ಬಾಕಿ ಉಳಿದಿರುವ ಜೀವನಾಂಶ ಪ್ರಕರಣಕ್ಕೆ ಸಂಬಂಧಿಸಿದ ಸಾಕ್ಷ್ಯವನ್ನು ದೃಢೀಕರಿಸಲು ತನ್ನ ಪರಿತ್ಯಕ್ತ ಹೆಂಡತಿಯ ಆದಾಯ-ಸಂಬಂಧಿತ ವಿವರಗಳನ್ನು ಕೋರಿದ್ದಾರೆ. ಅರ್ಜಿದಾರರು ತಮ್ಮ ಪತ್ನಿಯ ಆದಾಯದ ವಿವರಗಳನ್ನು ಕೋರಿ ದಿನಾಂಕ 10-02-2022 ರಂದು RTI ಅರ್ಜಿಯನ್ನು ಸಲ್ಲಿಸಿದ್ದರು. ಆದಾಗ್ಯೂ CPIO RTI ಕಾಯಿದೆಯ ಸೆಕ್ಷನ್ 8 (1) (j) ಅಡಿಯಲ್ಲಿ ಮಾಹಿತಿಯನ್ನು ನಿರಾಕರಿಸಿತು. ನಂತರ ಅರ್ಜಿದಾರರು 16-02-2023 ರಂದು ಮೊದಲ ಮೇಲ್ಮನವಿಯನ್ನು ಸಲ್ಲಿಸಿದರು.