ನಂಬಿದ್ರೆ ನಂಬಿ ಬಿಟ್ರೆ ಬಿಡಿ…! ತಂಗಿಗೆ ಕೊಟ್ಟ ಮಾತಿನಂತೆ 26 ವರ್ಷಗಳಿಂದ ನಾಲಿಗೆ ಮೇಲಿದೆ ಆಲೀವ್​ ಬೀಜ

ಕೋಲ್ಕತಾ: ಕೆಲವೊಮ್ಮೆ ನಂಬಲಸಾಧ್ಯ ಎನ್ನಿಸುವ ಘಟನೆಗಳು ನಡೆಯುವುದುಂಟು. ಅದರಲ್ಲಿ ಒಂದು ಈ ಘಟನೆ. ತಂಗಿಗೆ ಕೊಟ್ಟ ಮಾತನ್ನು ಉಳಿಸಿಕೊಳ್ಳಲು ಅಣ್ಣನೊಬ್ಬ ಬರೋಬ್ಬರಿ 26 ವರ್ಷಗಳಿಂದ ತನ್ನ ನಾಲಿಗೆಯ ಮೇಲೆ ಆಲಿವ್​ ಬೀಜವನ್ನು ಇಟ್ಟುಕೊಂಡೇ ಇದ್ದಾನೆ !

ಊಟ ಮಾಡುವಾಗ, ಹಲ್ಲುಜ್ಜುವಾಗ…… ಹೀಗೆ ಬಾಯಿಯಿಂದ ಏನೇ ಕಾರ್ಯ ಮಾಡಿದರೂ ಈ ಆಲೀವ್​ ಬೀಜ ಮಾತ್ರ ಬಾಯಿಯಲ್ಲಿಯೇ ಇರುತ್ತದೆಯಂತೆ!

ಇಂಥದ್ದೊಂದು ಸಾಹಸ ಮಾಡುತ್ತಿರುವ ವ್ಯಕ್ತಿ ಪಶ್ಚಿಮ ಬಂಗಾಳದ ಅಶೋಕನಗರ ಕಚುವಾ ಮೋರ್ ಪ್ರದೇಶದ ನಿವಾಸಿ ಜೈದೇವ್ ಬಿಸ್ವಾಸ್.

1996ರಲ್ಲಿ, ಒಮ್ಮೆ ಊಟ ಮಾಡುತ್ತಿದ್ದ ಸಮಯದಲ್ಲಿ ಅಲೀವ್​ನಿಂದ ಚಟ್ನಿ ಮಾಡಲಾಗಿತ್ತು. ಈ ಸಮಯದಲ್ಲಿ ತಂಗಿ ಸಹಜವಾಗಿ ಅಣ್ಣನಿಗೆ ಆಲೀವ್​ ಬೀಜವನ್ನು ಬಾಯಿಯಲ್ಲಿ ಎಷ್ಟು ದಿನಗಳವರೆಗೆ ಇಟ್ಟುಕೊಳ್ಳಬಹುದು ಎಂದು ಕೇಳಿದ್ದಾಳೆ.

ಆಗ ಈ ಅಣ್ಣ, ಅದು ಉಗಿಯಬೇಕು ಎನ್ನಿಸುವವರೆಗೆ ಎಷ್ಟು ವರ್ಷವಾದರೂ ಇಟ್ಟುಕೊಳ್ಳಬಹುದು ಎಂದಿದ್ದಾನೆ. ಇದನ್ನೇ ತಂಗಿ ಚಾಲೆಂಜ್​ ಮಾಡಿ ಹಾಗಿದ್ದರೆ ನೀನು ನನಗಾಗಿ ಇದನ್ನು ವರ್ಷಗಟ್ಟಲೆ ಬಾಯಲ್ಲಿ ಇಟ್ಟುಕೊಳ್ಳಬೇಕು ಎಂದಿದ್ದಾಳೆ.

ಈ ಮಾತನ್ನೇ ಚಾಲೆಂಜ್​ ಆಗಿ ಸ್ವೀಕರಿಸಿರುವ ಜೈದೇವ್ ಬಿಸ್ವಾಸ್ ಇಂದಿಗೂ ನಾಲಿಗೆ ಮೇಲೆ ಅದನ್ನು ಇಟ್ಟುಕೊಳ್ಳುತ್ತಿದ್ದಾರೆ. 10 ವರ್ಷಗಳ ಹಿಂದೆ ಇವರ ಸಹೋದರಿ ನಿಧನರಾದರೂ 68 ವರ್ಷದ ಜೈದೇವ್ ಬಿಸ್ವಾಸ್ ಮಾತ್ರ ತಂಗಿಗೆ ಕೊಟ್ಟ ಮಾತನ್ನು ಉಳಿಸಿಕೊಳ್ಳುತ್ತಿದ್ದಾರೆ. ಇದು ನನಗೆ ತಂಗಿಯ ಮೇಲಿರುವ ಪ್ರೀತಿ ಎಂದಿದ್ದಾರೆ.