ಪ್ರಪಂಚದಲ್ಲಿ ಹೆಚ್ಚುತ್ತಿರುವ ಓಮಿಕ್ರಾನ್ ಪ್ರಕರಣಗಳನ್ನು ಗಮನದಲ್ಲಿಟ್ಟುಕೊಂಡು ನಿರ್ದಿಷ್ಟವಾಗಿ ಕೊರೊನಾ ವೈರಸ್ನ ಓಮಿಕ್ರಾನ್ ರೂಪಾಂತರಿಯನ್ನೇ ಗುರಿಯಾಗಿಸುವ ಮರುವಿನ್ಯಾಸಗೊಳಿಸಿದ ಕೋವಿಡ್ ಲಸಿಕೆಗಳನ್ನು ಶೀಘ್ರದಲ್ಲಿಯೇ ಮಾರುಕಟ್ಟೆಗೆ ತರುವುದಾಗಿ ಫೈಜರ್ ಮುಖ್ಯ ಕಾರ್ಯನಿರ್ವಾಹಕ ಆಲ್ಬರ್ಟ್ ಬೌರ್ಲಾ ಹೇಳಿಕೆ ನೀಡಿದ್ದಾರೆ.
ಜೆಪಿ ಮಾರ್ಗನ್ ಹೆಲ್ತ್ಕೇರ್ ಕಾನ್ಪರೆನ್ಸ್ನಲ್ಲಿ ಮಾತನಾಡಿದ ಆಲ್ಬರ್ಟ್ ಬೌರ್ಲಾ, ಫೈಜರ್ ಹಾಗೂ ಬಯೋ ಎನ್ಟೆಕ್ ಒಟ್ಟಾಗಿ ಓಮಿಕ್ರಾನ್ ವಿರುದ್ಧ ಪ್ರಬಲ ಹಾಗೂ ಹಿಂದಿನ ಲಸಿಕೆಗಳನ್ನು ಹೋಲುವಂತಹ ಲಸಿಕೆಗಳನ್ನು ಹೊರತರುವಲ್ಲಿ ಕೆಲಸ ಮಾಡುತ್ತಿದೆ ಎಂದು ಹೇಳಿದ್ದಾರೆ.
ಮರು ವಿನ್ಯಾಸಗೊಳಿಸಲಾದ ಲಸಿಕೆಗಳಿಗೆ ಅನುಮೋದನೆಯನ್ನು ಕೇಳಿ ಅರ್ಜಿ ಸಲ್ಲಿಸಲು ಕಂಪನಿಯು ಸಿದ್ಧವಾಗಿದೆ. ಮಾರ್ಚ್ ತಿಂಗಳಿನಿಂದ ಲಸಿಕೆಯ ಉತ್ಪಾದನೆ ಆರಂಭವಾಗಬಹುದು ಎಂದು ಬೌರ್ಲಾ ಹೇಳಿದ್ದಾರೆ.
ಈ ನಡುವೆ ದಕ್ಷಿಣ ಆಫ್ರಿಕಾದ ವೈದ್ಯರು ಓಮಿಕ್ರಾನ್ ರೂಪಾಂತರಿಯು ಡೆಲ್ಟಾ ರೂಪಾಂತರಿಗಿಂತ ಸೌಮ್ಯ ಲಕ್ಷಣಗಳನ್ನು ಹೊಂದಿದೆ ಎಂದು ಹೇಳಿದ್ದಾರೆ. ಈ ಪ್ರಸ್ತುತ ಸಮಯದಲ್ಲಿ ಓಮಿಕ್ರಾನ್ ಒಂದು ಸೌಮ್ಯ ಕಾಯಿಲೆಯಂತೆ ಕಾಣುತ್ತಿದೆ ಎಂದು ಆಫ್ರಿಕಾ ಆರೋಗ್ಯ ಸಂಶೋಧನಾ ಸಂಸ್ಥೆಯ ನಿರ್ದೇಶಕ ವಿಲ್ಲೆಮ್ ಹೆನ್ಕೋಮ್ ಹೇಳಿದ್ದಾರೆ. ಆದರೆ ಇದು ಓಮಿಕ್ರಾನ್ ಆರಂಭದ ದಿನಗಳಾಗಿವೆ. ಹೀಗಾಗಿ ನಾವು ಇನ್ನಷ್ಟು ಮಾಹಿತಿಗಳನ್ನು ಸಂಗ್ರಹಿಸಬೇಕಿದೆ. ಆಸ್ಪತ್ರೆಗೆ ದಾಖಲಾಗುತ್ತಿರುವವರು ಹಾಗೂ ಸಾವಿನ ಸಂಖ್ಯೆಗಳ ಬಗ್ಗೆ ಇನ್ನಷ್ಟು ಮಾಹಿತಿ ಸಿಗಬೇಕಿದೆ. ನಾವು ಕೋವಿಡ್ನ ಹೊಸ ಅಲೆಗೆ ಕಾಲಿಟ್ಟು ಕೇವಲ 2 ವಾರ ಮಾತ್ರ ಕಳೆದಿದೆ. ಹೀಗಾಗಿ ಈಗಲೇ ಅಂತಿಮ ನಿರ್ಧಾರಕ್ಕೆ ಬರಲು ಸಾಧ್ಯವಿಲ್ಲ ಎಂದು ಹೇಳಿದ್ದಾರೆ.
Loading ...