ನಮಾಜ್​ಗೆ ಪ್ರತಿಯಾಗಿ ಸುಂದರ ಕಾಂಡ ಪಠಣೆ, ಲುಲೂ ಮಾಲ್​ಗೆ ಎಚ್ಚರಿಕೆ

ಉತ್ತರ ಪ್ರದೇಶದ ಲಕ್ನೋದಲ್ಲಿ ಇತ್ತೀಚೆಗೆ ಉದ್ಘಾಟನೆಗೊಂಡ ಲುಲೂ ಮಾಲ್​ನಲ್ಲಿ ಕೆಲವು ಜನರು ನಮಾಜ್​ ಮಾಡುವ ವೀಡಿಯೊ ಹಿದಾಗಿದ್ದು, ಇದು ವಿವಾದಕ್ಕೆ ಕಾರಣವಾಗಿದೆ.

ಮಾಲ್​ನ ಶಾಪಿಂಗ್​ ಅಖಾಡದಲ್ಲಿ ಜನರ ಗುಂಪೊಂದು ತೆರೆದ ಜಾಗದಲ್ಲಿ ನಮಾಜ್​ ಮಾಡುತ್ತಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದೆ. ಇದಾದ ನಂತರ ಅಖಿಲ ಭಾರತೀಯ ಹಿಂದೂ ಮಹಾಸಭಾ ಎಚ್ಚರಿಕೆ ನೀಡಿದ್ದು, ಮಾಲ್​ನಲ್ಲಿ ಮತ್ತೊಮ್ಮೆ ನಮಾಜ್​ ಮಾಡಿದರೆ ನಾವು ಸುಂದರಕಾಂಡ ಪಠಿಸುವ ಮೂಲಕ ಪ್ರತಿಭಟನೆ ನಡೆಸುವುದಾಗಿ ಎಚ್ಚರಿಸಿದೆ.

ಈ ಕುರಿತು ಹೇಳಿಕೆ ನೀಡಿರುವ ಸಂಘಟನೆಯು ಹಿಂದೂ ಸಮುದಾಯದವರಿಗೂ ಮಾಲ್​ ಬಹಿಷ್ಕರಿಸಲು ಸಹ ಕೋರಿದೆ. ಮಾಲ್​ ಆರಂಭವಾದಾಗಿನಿಂದಲೂ ಅಲ್ಲಿ ಲವ್​ ಜಿಹಾದ್​ ಪ್ರಚಾರ ನಡೆದಿದೆ ಎಂದು ಹೇಳಲಾಗುತ್ತಿದೆ ಎಂದು ಹಿಂದೂ ಸಂಘಟನೆಯು ಹೇಳಿಕೆಯಲ್ಲಿ ತಿಳಿಸಿದೆ.

ಮಾಲ್​ನಲ್ಲಿ ನೇಮಕಗೊಂಡಿರುವ ಉದ್ಯೋಗಿಗಳಲ್ಲಿ 80 ಪ್ರತಿಶತದಷ್ಟು ಮುಸ್ಲಿಂ ಸಮುದಾಯಕ್ಕೆ ಸೇರಿದವರು ಮತ್ತು ಉಳಿದ 20 ಪ್ರತಿಶತದಷ್ಟು ಹಿಂದೂ ಹುಡುಗಿಯರ ಲವ್​ ಜಿಹಾದ್​ ಪ್ರಾರಂಭಿಸಬಹುದು ಎಂದು ಅದು ಅಭಿಪ್ರಾಯಪಟ್ಟಿದೆ.

ಯೋಗಿ ಆದಿತ್ಯನಾಥ್​ ನೇತೃತ್ವದ ಉತ್ತರ ಪ್ರದೇಶ ಸರ್ಕಾರವು ಸಾರ್ವಜನಿಕ ಸ್ಥಳಗಳಲ್ಲಿ ನಮಾಜ್​ ಅಥವಾ ಇತರ ಧಾರ್ಮಿಕ ಚಟುವಟಿಕೆಗಳನ್ನು ನಿಷೇಧಿಸಿದೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಇದರ ಹೊರತಾಗಿಯೂ ಕೆಲವರು ಲುಲೂ ಮಾಲ್​ನಲ್ಲಿ ನಮಾಜ್​ ಮಾಡಿದರು, ಇದನ್ನು ತಡೆಯಲು ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಸಂಟನೆ ಒತ್ತಾಯಿಸಿದೆ.

ಜುಲೈ 10ರಂದು ರಾಜಧಾನಿಯಲ್ಲಿ ಲುಲೂ ಮಾಲ್​ ಅನ್ನು ಯುಪಿ ಸಿಎಂ ಆದಿತ್ಯನಾಥ್​ ಉದ್ಘಾಟಿಸಿದರು. ಈ ಸಂದರ್ಭದಲ್ಲಿ ಲುಲೂ ಗ್ರೂಪ್​ ಅಧ್ಯಕ್ಷ ಯೂಸುಫಲಿ ಎಂಎ ಅವರು ಉಪಸ್ಥಿತರಿದ್ದರು.