ಅಸ್ತಮಾ ಚಿಕಿತ್ಸೆ ಪಡೆಯುತ್ತಿದ್ದ ವ್ಯಕ್ತಿ ಮಾಡಿಸಿದ ಸಿಟಿ ಸ್ಕ್ಯಾನ್​​ನಲ್ಲಿ ಬಯಲಾಯ್ತು ಶಾಕಿಂಗ್​ ಸಂಗತಿ….!

ಬರೋಬ್ಬರಿ 18 ವರ್ಷಗಳ ಕಾಲ ಅಸ್ತಮಾ ಚಿಕಿತ್ಸೆಗೆ ಒಳಗಾದ 32 ವರ್ಷದ ವ್ಯಕ್ತಿಯೊಬ್ಬರು ಇಷ್ಟು ಸುದೀರ್ಘ ವರ್ಷಗಳ ಕಾಲ ತಮಗೆ ಉಸಿರಾಟದ ಸಮಸ್ಯೆ ಉಂಟಾಗಲು ಕಾರಣವಾಗಿದ್ದೇನು ಅನ್ನೋದನ್ನ ತಿಳಿದು ಶಾಕ್​ ಆಗಿದ್ದಾರೆ. 2003ರಲ್ಲಿ ಸೂರಜ್​ ಅಕಸ್ಮಾತ್​ ಆಗಿ ನುಂಗಿದ್ದ ಪೆನ್ನಿನ ನಿಬ್​ ಅವರಿಗೆ ಬರೋಬ್ಬರಿ 18 ವರ್ಷಗಳ ಕಾಲ ಕಾಟ ನೀಡಿದೆ.

ಕೇರಳದ ಅಳುವಾದ ನಿವಾಸಿಯಾದ ಸೂರಜ್​ ಎಂಬವರು 9ನೇ ತರಗತಿ ವಿದ್ಯಾರ್ಥಿಯಾಗಿದ್ದಾಗ ಪೆನ್ನಿನ ಸಹಾಯದಿಂದ ಸೀಟಿ ಊದಲು ಹೋಗಿ ಪೆನ್ನಿನ ನಿಬ್​ ಅವರ ಗಂಟಲು ಸೇರಿಕೊಂಡಿತ್ತು. ಇದಾದ ಕೂಡಲೇ ಸೂರಜ್​​ರನ್ನು ಕೊಚ್ಚಿಯ ಖಾಸಗಿ ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತು. ಅಂದು ಮಾಡಿದ ಎಕ್ಸ್​ ರೇಯಲ್ಲಿ ಪೆನ್ನಿನ ನಿಬ್​ ಗಂಟಲು ಪ್ರವೇಶಿಸಿದ್ದರ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿರಲಿಲ್ಲ. ಇದಾದ ಕೆಲವು ದಿನಗಳ ಬಳಿಕ ಸೂರಜ್​​ರಿಗೆ ಶ್ವಾಸಕೋಶ ಸಂಬಂಧಿ ಸಮಸ್ಯೆ ಕಾಣಿಸಿಕೊಳ್ಳಲು ಆರಂಭಿಸಿತು. ಇದಾದ ಬಳಿಕ ಸುದೀರ್ಘ 18 ವರ್ಷಗಳ ಕಾಲ ಸೂರಜ್​ ಅಸ್ತಮಾ ಕಾಯಿಲೆಗೆ ಚಿಕಿತ್ಸೆ ಪಡೆಯಲು ಆರಂಭಿಸಿದ್ರು.

ಕಳೆದ ವರ್ಷ ಸೂರಜ್​ ಕೊರೊನಾ ಸೋಂಕಿಗೆ ಒಳಗಾದ ಸಮಯದಲ್ಲಿ ಪರಿಸ್ಥಿತಿ ಇನ್ನಷ್ಟು ಹದಗೆಡಲು ಆರಂಭಿಸಿತು. ತೀವ್ರ ಉಸಿರಾಟ ಸಮಸ್ಯೆ ಎದುರಿಸುತ್ತಿದ್ದ ಸೂರಜ್​​ ಸಿಟಿ ಸ್ಕ್ಯಾನ್​ಗೆ ಒಳಗಾದ ವೇಳೆ ಇವರ ಬಲಭಾಗದ ಶ್ವಾಸಕೋಶದಲ್ಲಿ ಪೆನ್​​ ನಿಬ್​ ಇರುವ ವಿಚಾರ ತಿಳಿದಿದೆ. ಕೊನೆಗೂ 18 ವರ್ಷಗಳ ಕಾಲ ಶ್ವಾಸಕೋಶದಲ್ಲೇ ಅಡಗಿದ್ದ ಪೆನ್​ನಿಬ್​ನ್ನು ಯಶಸ್ವಿಯಾಗಿ ತೆಗೆಯಲಾಗಿದೆ.