ಸಾಲ ಪಡೆಯಲು ಬ್ಯಾಂಕ್‌ ಗಳಿಗೆ ಸುಳ್ಳು ಕಾನೂನು ಅಭಿಪ್ರಾಯ; ಇಬ್ಬರು ವಕೀಲರ ವಿರುದ್ಧ ಕ್ರಮಕ್ಕೆ ಆದೇಶಿಸಿದ ಸಿಬಿಐ ವಿಶೇಷ ಕೋರ್ಟ್

ಉದ್ದೇಶಪೂರ್ವಕವಾಗಿ ಬ್ಯಾಂಕ್‌ಗಳಿಗೆ ಸುಳ್ಳು ಕಾನೂನು ಅಭಿಪ್ರಾಯ ನೀಡಿರೋ ಆರೋಪದ ಮೇಲೆ ಇಬ್ಬರು ವಕೀಲರ ವಿರುದ್ಧ ಸಿಬಿಐ ವಿಶೇಷ ನ್ಯಾಯಾಲಯ ಕ್ರಮಕ್ಕೆ ಆದೇಶಿಸಿದೆ. ಪ್ರಕರಣದ ಸಂಬಂಧಿತ ಪೇಪರ್‌ಗಳನ್ನು ಮಹಾರಾಷ್ಟ್ರ ಮತ್ತು ಗೋವಾದ ಬಾರ್ ಕೌನ್ಸಿಲ್‌ಗೆ ರವಾನಿಸಲು ನ್ಯಾಯಾಲಯ ಆದೇಶಿಸಿದೆ.

ವಕೀಲರಾದ ಅಖಿಲೇಶ್ ಅರುಣ್ ನಾಯ್ಕ್ ಮತ್ತು ಪ್ರೇರಣಾ ದೇಶಪಾಂಡೆ ಅವರಿಗೆ ಸಂಬಂಧಿಸಿದ ದಾಖಲೆಗಳನ್ನು ರವಾನಿಸುವಂತೆ ನ್ಯಾಯಾಲಯವು ಸಿಬಿಐಗೆ ಕೇಳಿದೆ.

ಸ್ಟೇಟ್ ಬ್ಯಾಂಕ್ ಆಫ್ ಬಿಕಾನೇರ್ ಮತ್ತು ಜೈಪುರ್ ಹಾಗೂ ಸ್ಟೇಟ್ ಬ್ಯಾಂಕ್ ಆಫ್ ಟ್ರಾವಂಕೂರ್‌ಗೆ ಸುಮಾರು 14.2 ಕೋಟಿ ರೂ. ಮೊತ್ತದ, ಸಂಚು ಮತ್ತು ವಂಚನೆ ಪ್ರಕರಣ ಇವರ ಮೇಲಿದೆ. ಸಿಬಿಐ ಪ್ರಕಾರ, ವಕೀಲ ಅಖಿಲೇಶ್ ನಾಯ್ಕ್ ಅವರು ಟ್ರಸ್ಟ್‌ನ ಆಸ್ತಿಯೊಂದಕ್ಕೆ ಸಂಬಂಧಿಸಿದಂತೆ ಸುಳ್ಳು ವರದಿಯನ್ನು ಸಲ್ಲಿಸಿದ್ದಾರೆ, ಅದನ್ನು ಸಾಲಕ್ಕೆ ಮೇಲಾಧಾರವಾಗಿ ಟ್ರಸ್ಟ್ ಬಳಸಿದೆ. ಈ ಟ್ರಸ್ಟ್ ನಕಲಿ ದಾಖಲೆಗಳನ್ನು ಬಳಸಿ ಸಾಲ ಪಡೆದು ಬ್ಯಾಂಕ್‌ಗೆ 14 ಕೋಟಿ ರೂ.ಗೂ ಹೆಚ್ಚು ವಂಚನೆ ಮಾಡಿದೆ ಎನ್ನಲಾಗಿದೆ.

ಪ್ರಮುಖ ಆರೋಪಿಗಳಿಗೆ ಮೋಸದಿಂದ ಸಾಲವನ್ನು ಪಡೆಯಲು ಸಹಾಯ ಮಾಡಿದೆ ಎಂದು ಇವರ ವಿರುದ್ಧ ಆರೋಪಿಸಲಾಗಿದೆ. ನಾಯಕ್ ಮತ್ತೋರ್ವ ಆರೋಪಿಯ ಸೂಚನೆ ಮೇರೆಗೆ ಸಂಬಂಧಪಟ್ಟ ಸಬ್ ರಿಜಿಸ್ಟ್ರಾರ್ ಕಛೇರಿಯಿಂದ ಅಗತ್ಯವಿರುವ ಶೀರ್ಷಿಕೆ ಶೋಧನಾ ವರದಿಯನ್ನು ನಡೆಸದೆ, ಜುಲೈ 7, 2014 ರಂದು ಸುಳ್ಳು ವರದಿಯನ್ನು ಸಲ್ಲಿಸಿದ್ದರು.

ಅವರ ವರದಿಯಲ್ಲಿ, ಆಸ್ತಿಯ ಮಾಲೀಕತ್ವವು ಕಲ್ಯಾಣಿ ಎಜುಕೇಶನ್ ಪ್ರೈವೇಟ್ ಲಿಮಿಟೆಡ್ ಎಂಬ ಕಂಪನಿಗೆ ಸೇರಿದೆ. ವಾಸ್ತವವಾಗಿ, ಇದು ಕಲ್ಯಾಣಿ ಚಾರಿಟೇಬಲ್ ಟ್ರಸ್ಟ್ ಎಂಬ ಮತ್ತೊಂದು ಕಂಪನಿಯ ಒಡೆತನದಲ್ಲಿದೆ ಎಂದು ಅವರು ಉಲ್ಲೇಖಿಸಿದ್ದಾರೆ. ಅಲ್ಲದೆ ಸಬ್ ರಿಜಿಸ್ಟ್ರಾರ್ ಕಚೇರಿಗೆ ಭೇಟಿ ನೀಡಿ ದಾಖಲೆಗಳನ್ನು ಪರಿಶೀಲಿಸಿದ್ದಾರೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.

ಆರೋಪಿಯು ವಕೀಲನಾಗಿ ತನ್ನ ಅಭಿಪ್ರಾಯವನ್ನು ನೀಡುವಾಗ ಉದ್ದೇಶಪೂರ್ವಕ ಕೃತ್ಯಗಳನ್ನು ಎಸಗಿದ್ದಾರೆ ಎಂದು, ದಾಖಲೆಯಲ್ಲಿ ಸ್ಪಷ್ಟವಾದ ಪುರಾವೆಗಳಿಂದ ಸಾಬೀತಾಗಿದೆ ಎಂದು ಕೋರ್ಟ್ ಗಮನಿಸಿದೆ.

ಈ ಕಾರಣದಿಂದಾಗಿ ನ್ಯಾಯವಾದಿಗಳ ಕಾಯಿದೆಯ ನಿಬಂಧನೆಗಳ ಅಡಿಯಲ್ಲಿ ಪರಿಗಣಿಸಲಾದ, ದುರ್ನಡತೆಯ ಪ್ರಕರಣಕ್ಕೆ ಸಂಬಂಧಿಸಿದಂತೆ ವಿಚಾರಣೆಯನ್ನು ಪ್ರಾರಂಭಿಸಲು ನ್ಯಾಯಾಲಯವು ನಿರ್ಧರಿಸಿದೆ.