ಮುಂಬೈ: ವಾಣಿಜ್ಯ ನಗರಿ ಮುಂಬೈಗೆ ಹೆಚ್ಚಿನ ಸಂಖ್ಯೆಯ ವಲಸೆ ಹಕ್ಕಿಗಳು ಆಗಮಿಸಿರುವ ವಿಡಿಯೋ ಆನ್‌ಲೈನ್‌ನಲ್ಲಿ ಕಾಣಿಸಿಕೊಂಡಿದೆ.
ಟ್ವಿಟ್ಟರ್‌ನಲ್ಲಿ ಎಎನ್‌ಐ ವಿಡಿಯೋ ಹಂಚಿಕೊಂಡಿದ್ದು, ಫ್ಲೆಮಿಂಗೋಗಳ ಹಿಂಡು ಮುಂಬೈಗೆ ಆಗಮಿಸಿವೆ. ಸಾವಿರಾರು ಫ್ಲೆಮಿಂಗೋಗಳು ನೀರಿನಲ್ಲಿ ಈಜಾಡುತ್ತಿರುವುದನ್ನು ವಿಡಿಯೋದಲ್ಲಿ ನೋಡಬಹುದು. ಈ ಗುಂಪಿನೊಂದಿಗೆ ಮತ್ತೊಂದು ಗುಂಪಿನ ಪಕ್ಷಿಗಳು ಸಹ ಸೇರಿಕೊಂಡಿದೆ.
ಫ್ಲೆಮಿಂಗೋಗಳನ್ನು ನೋಡಿ ನೆಟ್ಟಿಗರು ಆಶ್ಚರ್ಯಚಕಿತರಾಗಿದ್ದಾರೆ. ಮಹಾರಾಷ್ಟ್ರದ ನವಿ ಮುಂಬೈಗೆ ಸೀಗಲ್‌ಗಳು ಮತ್ತು ಫ್ಲೆಮಿಂಗೋಗಳು ಸೇರುವ ವರ್ಷದ ಅತ್ಯಂತ ಸುಂದರವಾದ ಸಮಯ ಎಂದು ಬಳಕೆದಾರರೊಬ್ಬರು ಪ್ರತಿಕ್ರಿಯಿಸಿದ್ದಾರೆ.
ಈ ವರ್ಷದ ಜನವರಿಯಲ್ಲಿ ಫ್ಲೆಮಿಂಗೋಗಳ ಹಿಂಡು ನವಿ ಮುಂಬೈ ಜೌಗು ಪ್ರದೇಶಕ್ಕೆ ಬಂದಿತ್ತು. ಫ್ಲೆಮಿಂಗೋಗಳು ಅಲೆದಾಡುವ ಪಕ್ಷಿಗಳಾಗಿದ್ದು, ಮುಖ್ಯವಾಗಿ ನದಿಪಾತ್ರಗಳ ಬಳಿ ಮತ್ತು ಉಷ್ಣವಲಯದ ಮತ್ತು ಉಪೋಷ್ಣವಲಯದ ಪ್ರದೇಶಗಳಲ್ಲಿ ಲವಣಯುಕ್ತ ಅಥವಾ ಕ್ಷಾರೀಯ ಸರೋವರಗಳಲ್ಲಿ ಕಂಡುಬರುತ್ತವೆ. ಫ್ಲೆಮಿಂಗೋಗಳು ಜನಿಸುವಾಗ ಗುಲಾಬಿ ಬಣ್ಣದಲ್ಲಿರುವುದಿಲ್ಲ. ಬೂದು ಅಥವಾ ಬಿಳಿ ಬಣ್ಣದಲ್ಲಿರುತ್ತವೆ. ಮೊದಲ ಒಂದೆರಡು ವರ್ಷಗಳಲ್ಲಿ, ಅವುಗಳು ಸೇವಿಸುವ ಪಾಚಿ ಮತ್ತು ಅಕಶೇರುಕಗಳಲ್ಲಿ ಕಂಡುಬರುವ ವಿಶೇಷ ಬಣ್ಣ ವರ್ಣದ್ರವ್ಯಗಳಿಂದ ಅವು ಕೆಂಪು-ಗುಲಾಬಿ ಬಣ್ಣಕ್ಕೆ ತಿರುಗುತ್ತವೆ.
ಅವು ಸಾಮಾನ್ಯವಾಗಿ ವಲಸೆ ಹೋಗದ ಪಕ್ಷಿಗಳು. ಆದರೆ ಅವುಗಳ ಸಂತಾನೋತ್ಪತ್ತಿ ಪ್ರದೇಶಗಳಲ್ಲಿ ಹವಾಮಾನ ಮತ್ತು ನೀರಿನ ಮಟ್ಟದಲ್ಲಿನ ಬದಲಾವಣೆಗಳಿಂದಾಗಿ ಈ ರೀತಿ ವಲಸೆ ತೆರಳುತ್ತವೆ.
ಇಲ್ಲಿಯವರೆಗೆ ಯಾವುದೇ ಫ್ಲೆಮಿಂಗೊ ಗಣತಿಯ ಮಾಹಿತಿ ಲಭ್ಯವಿಲ್ಲವಾದರೂ, ಮುಂಬೈನ ತೇವ ಪ್ರದೇಶಗಳಿಗೆ ಭೇಟಿ ನೀಡುವ ಪಕ್ಷಿಗಳ ಸಂಖ್ಯೆಯು ವರ್ಷಗಳಲ್ಲಿ ಹೆಚ್ಚಾಗಿದೆ ಎಂದು ಪಕ್ಷಿಪ್ರೇಮಿಗಳು ಮತ್ತು ತಜ್ಞರು ನಂಬಿದ್ದಾರೆ.
Loading ...