ಓಖ್ತಿರ್ಕಾ ಮಿಲಿಟರಿ ನೆಲೆ ಮೇಲೆ ರಷ್ಯಾ ದಾಳಿ: ಉಕ್ರೇನ್​ನ 70 ಯೋಧರು ದಾರುಣ ಸಾವು

ಉಕ್ರೇನ್​ನ ಮೇಲೆ ರಷ್ಯಾ ನಡೆಸುತ್ತಿರುವ ಮಿಲಿಟರಿ ಕಾರ್ಯಾಚರಣೆಯಲ್ಲಿ ಇಲ್ಲಿಯವರೆಗೆ 350ಕ್ಕೂ ಅಧಿಕ ನಾಗರಿಕರು ಬಲಿಯಾಗಿದ್ದಾರೆ. ಇತ್ತೀಚಿಗೆ ರಿಲೀಸ್​ ಮಾಡಲಾದ ಉಪಗ್ರಹ ಚಿತ್ರಗಳಲ್ಲಿ ಕೈವ್​​ನಲ್ಲಿ 40 ಮೈಲಿ ಉದ್ದದ ಬೆಂಗಾವಲು ಪಡೆ ಇರುವುದು ಬಹಿರಂಗಪಟ್ಟಿದೆ.

ಜರ್ಮನಿ, ಅಮೆರಿಕ. ಆಸ್ಟ್ರೇಲಿಯಾ ಹಾಗೂ ಕೆನಡಾದಂತಹ ಹಲವಾರು ರಾಷ್ಟ್ರಗಳು ಉಕ್ರೇನ್​ಗೆ ಮಿಲಿಟರಿ ಬೆಂಬಲವನ್ನು ಕಳುಹಿಸಲು ನಿರ್ಧರಿಸಿವೆ. ಈ ನಡುವೆ ಸೋಮವಾರದಂದು ನಡೆದ UNHRC ಸಭೆಯಲ್ಲಿ ಭಾರತವು ಮತ್ತೊಮ್ಮೆ ಮತದಾನದಿಂದ ದೂರವುಳಿದಿದೆ.

ಟರ್ಕಿಯ ಮಾಧ್ಯಮವೊಂದು ನೀಡಿರುವ ವರದಿಯ ಪ್ರಕಾರ, ಖಾರ್ಕಿವ್​ ಹಾಗೂ ಕೀವ್​ ನಡುವಿನ ನಗರದ ಓಖ್ತಿರ್ಕಾದಲ್ಲಿ ರಷ್ಯಾದ ಫಿರಂಗಿ ದಳವು ಮಿಲಿಟರಿ ನೆಲೆ ಮೇಲೆ ದಾಳಿ ಬಳಿಕ 70ಕ್ಕೂ ಅಧಿಕ ಉಕ್ರೇನ್​ನ ಯೋಧರು ಸಾವನ್ನಪ್ಪಿದ್ದಾರೆ ಎಂದು ತಿಳಿದುಬಂದಿದೆ.

ದಾಳಿಗೊಳಗಾದ ಓಖ್ತಿರ್ಕಾ ನಗರವು ಉಕ್ರೇನ್​ನ ರಾಜಧಾನಿ ಕೈವ್​ನಿಂದ 345 ಕಿಲೋಮೀಟರ್​ ದೂರದಲ್ಲಿದೆ.