ಬೈಕ್ ಗೆ 4 ಲೀ., ಕಾರ್ ಗೆ 20 ಲೀ.: ಪೆಟ್ರೋಲ್, ಡೀಸೆಲ್ ಗೆ ಕ್ಯೂಆರ್ ಕೋಡ್ ಸಿಸ್ಟಮ್ ಜಾರಿಗೊಳಿಸಿದ ಶ್ರೀಲಂಕಾ

ಕೊಲಂಬೋ: ಶ್ರೀಲಂಕಾದಲ್ಲಿ ಇಂದಿನಿಂದ ಕ್ಯೂಆರ್ ಕೋಡ್ ಸಿಸ್ಟಮ್ ಆಧಾರಿತ ಇಂಧನ ವಿತರಣೆಯನ್ನು ಜಾರಿಗೆ ತರಲಾಗಿದೆ.

ಕ್ಯೂಆರ್ ಕೋಡ್ ವ್ಯವಸ್ಥೆಯ ಪ್ರಕಾರ ವಾಹನಗಳಿಗೆ ಇಂಧನ ವಿತರಣಾ ಪ್ರಕ್ರಿಯೆಯು ಸೋಮವಾರದಿಂದ ದ್ವೀಪ ರಾಷ್ಟ್ರದಾದ್ಯಂತದ ಇಂಧನ ಕೇಂದ್ರಗಳಲ್ಲಿ ಜಾರಿಗೆ ಬರುವುದರಿಂದ ದೇಶದ ಇಂಧನ ಕೇಂದ್ರಗಳಲ್ಲಿ ಕಿಕ್ಕಿರಿದು ತುಂಬದಂತೆ ಜನರಿಗೆ ಸಲಹೆ ನೀಡಲಾಗಿದೆ.

ರಾಷ್ಟ್ರೀಯ ಇಂಧನ ಪಾಸ್ ಕ್ಯೂಆರ್ ಕೋಡ್ ವ್ಯವಸ್ಥೆಯನ್ನು ದ್ವೀಪದಾದ್ಯಂತ ಇಂಧನ ಕೇಂದ್ರಗಳಲ್ಲಿ ಜಾರಿಗೆ ತರಲಾಗುವುದು ಎಂದು ದೇಶದ ವಿದ್ಯುತ್ ಮತ್ತು ಇಂಧನ ಸಚಿವ ಕಾಂಚನಾ ವಿಜೆಶೇಖರ ತಿಳಿಸಿದ್ದಾರೆ.

ದ್ವೀಪದಾದ್ಯಂತದ ಇಂಧನ ಕೇಂದ್ರಗಳಿಂದ ವಾರಕ್ಕೆ ತಮ್ಮ ಇಂಧನ ಕೋಟಾ ಪಡೆಯಲು ಸಾರ್ವಜನಿಕರಿಗೆ ಸಂಪೂರ್ಣ ವಾರವಿರುವುದರಿಂದ ಜನದಟ್ಟಣೆಯನ್ನು ತಪ್ಪಿಸುವಂತೆ ಅವರು ಜನರನ್ನು ವಿನಂತಿಸಿದ್ದಾರೆ.

ಕ್ಯೂಆರ್ ಕೋಡ್ ವ್ಯವಸ್ಥೆಯನ್ನು ಅಳವಡಿಸಿಕೊಂಡಿರುವ ಇಂಧನ ಕೇಂದ್ರಗಳಿಗೆ ವಾಹನದ ನೋಂದಣಿ ಸಂಖ್ಯೆಯ ಕೊನೆಯ ಅಂಕಿಯೊಂದಿಗೆ ರಾಷ್ಟ್ರೀಯ ಇಂಧನ ಪಾಸ್ ಪೋರ್ಟಲ್ ಅಡಿಯಲ್ಲಿ ಇಂಧನ ವಿತರಣೆಗೆ ಆದ್ಯತೆ ನೀಡಲಾಗುವುದು. ಈ ಹಿಂದೆ ಜಾರಿಯಲ್ಲಿದ್ದ ನಂಬರ್ ಪ್ಲೇಟ್‌ ನ ಕೊನೆಯ ಅಂಕೆ ಮತ್ತು ಇತರ ವ್ಯವಸ್ಥೆಗಳು ಆಗಸ್ಟ್ 1 ರಿಂದ ಮಾನ್ಯವಾಗಿರುವುದಿಲ್ಲ ಎಂದು ಹೇಳಲಾಗಿದೆ.

ಕೋಟಾದ ಪ್ರಕಾರ, ದ್ವಿಚಕ್ರ ವಾಹನಗಳಿಗೆ 4 ಲೀಟರ್ ಇಂಧನ ಮತ್ತು ತ್ರಿಚಕ್ರ ವಾಹನಗಳಿಗೆ 5 ಲೀಟರ್ ಇಂಧನ ಸಿಗಲಿದೆ. ಕಾರುಗಳು ಮತ್ತು ವ್ಯಾನ್‌ಗಳು ಸೇರಿದಂತೆ ಸಣ್ಣ ನಾಲ್ಕು ಚಕ್ರದ ವಾಹನಗಳಿಗೆ ಒಂದು ವಾರದವರೆಗೆ 20 ಲೀಟರ್ ಇಂಧನ ವಿತರಿಸಲಾಗುವುದು. ಬಸ್‌ ಗಳು ಮತ್ತು ಲಾರಿಗಳಂತಹ ಭಾರೀ ವಾಹನಗಳಿಗೆ ಕ್ರಮವಾಗಿ 40-50 ಲೀಟರ್ ಇಂಧನ ನೀಡಲಾಗುತ್ತದೆ ಎಂದು ಕೊಲಂಬೊ ಗೆಜೆಟ್ ವರದಿ ಮಾಡಿದೆ.