ಬಿಹಾರದ ಪಹಾರ್‌ಪುರ ರೈಲ್ವೆ ನಿಲ್ದಾಣದಲ್ಲಿ ನಡೆದ ಬೆಚ್ಚಿಬೀಳಿಸುವ ಘಟನೆಯ ವಿಡಿಯೋ ಈಗ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಹೈಸ್ಪೀಡ್ ರೈಲೊಂದು ಹಳಿಯ ಮೇಲಿದ್ದ ಮರದ ದಿಮ್ಮಿಗೆ ಗುದ್ದಿದ ರಭಸಕ್ಕೆ, ಆ ದಿಮ್ಮಿ ಹಾರಿಬಂದು ಹಳಿ ದಾಟುತ್ತಿದ್ದ ಮಹಿಳೆಗೆ ಬಡಿದಿದೆ. ಈ ಭೀಕರ ಅಪಘಾತದ ದೃಶ್ಯಗಳು ರೈಲ್ವೆ ನಿಲ್ದಾಣಗಳಲ್ಲಿನ ಸುರಕ್ಷತಾ ನಿಯಮಗಳ ಉಲ್ಲಂಘನೆಯನ್ನು ಎತ್ತಿ ತೋರಿಸುತ್ತಿವೆ.
ಅಪಘಾತ ನಡೆದಿದ್ದು ಹೇಗೆ ವರದಿಗಳ ಪ್ರಕಾರ, ಕೆಲವು ಪ್ರಯಾಣಿಕರು ಮರದ ದಿಮ್ಮಿಗಳನ್ನು ಅಕ್ರಮವಾಗಿ ರೈಲಿನಲ್ಲಿ ಸಾಗಿಸುತ್ತಿದ್ದರು ಮತ್ತು ಅವುಗಳನ್ನು ಹಳಿಗಳ ನಡುವೆ ಇಳಿಸಿ ಇಟ್ಟಿದ್ದರು. ಅದೇ ಸಮಯದಲ್ಲಿ ಮಹಿಳೆಯೊಬ್ಬರು ಹಳಿಯನ್ನು ದಾಟಲು ಪ್ರಯತ್ನಿಸುತ್ತಿದ್ದರು. ಇನ್ನೇನು ಅವರು ಪ್ಲಾಟ್‌ಫಾರ್ಮ್ ಏರಬೇಕು ಎನ್ನುವಷ್ಟರಲ್ಲಿ ಎದುರುಗಡೆಯಿಂದ ವೇಗವಾಗಿ ಬಂದ ರೈಲು, ಹಳಿಯ ಪಕ್ಕದಲ್ಲಿದ್ದ ಮರದ ದಿಮ್ಮಿಗೆ ಗುದ್ದಿದೆ. ಆ ರಭಸಕ್ಕೆ ಮರದ ದೊಡ್ಡ ತುಂಡು ಮಹಿಳೆಯ ಮೈಮೇಲೆ ಹಾರಿ ಬಂದು ಬಡಿದಿದೆ. ತಕ್ಷಣವೇ ಮಹಿಳೆ ಹಾರಿ ಪಕ್ಕದ ಗೋಡೆಗೆ ಬಡಿದು ಬಿದ್ದಿದ್ದಾರೆ. ಈ ಘಟನೆಯಲ್ಲಿ ಮಹಿಳೆಗೆ ಗಂಭೀರ ಗಾಯಗಳಾಗಿವೆ ಎಂದು ತಿಳಿದುಬಂದಿದೆ.
ಜಾಲತಾಣಗಳಲ್ಲಿ ತೀವ್ರ ಆಕ್ರೋಶ ಈ ವಿಡಿಯೋ ಎಕ್ಸ್ (X) ನಲ್ಲಿ ಹರಿದಾಡುತ್ತಿದ್ದಂತೆ ನೆಟ್ಟಿಗರು ಎರಡು ರೀತಿಯ ಪ್ರತಿಕ್ರಿಯೆಗಳನ್ನು ನೀಡುತ್ತಿದ್ದಾರೆ. ಕೆಲವರು ಮಹಿಳೆಯ ಬೇಜವಾಬ್ದಾರಿತನವನ್ನು ಟೀಕಿಸಿದ್ದಾರೆ. “ರೈಲ್ವೆ ಹಳಿ ದಾಟುವುದು ಕಾನೂನುಬಾಹಿರ, ಆಕೆ ತನ್ನ ಪ್ರಾಣವನ್ನು ತಾನೇ ಸಂಕಷ್ಟಕ್ಕೆ ಒಡ್ಡಿಕೊಂಡಿದ್ದಾಳೆ” ಎಂದು ಅನೇಕರು ಅಭಿಪ್ರಾಯಪಟ್ಟಿದ್ದಾರೆ. ಇನ್ನು ಕೆಲವರು ರೈಲ್ವೆ ಇಲಾಖೆಯ ನಿರ್ಲಕ್ಷ್ಯವನ್ನು ಪ್ರಶ್ನಿಸಿದ್ದಾರೆ. “ಹಳಿಗಳ ನಡುವೆ ಮರದ ದಿಮ್ಮಿಗಳು ಇರಲು ಹೇಗೆ ಸಾಧ್ಯ? ಇದು ರೈಲ್ವೆ ಸುರಕ್ಷತೆಯ ಗಂಭೀರ ಉಲ್ಲಂಘನೆ” ಎಂದು ಆಕ್ರೋಶ ಹೊರಹಾಕಿದ್ದಾರೆ.
ಸುರಕ್ಷತಾ ನಿಯಮಗಳ ಗಾಳಿಗೆ ರೈಲ್ವೆ ನಿಲ್ದಾಣಗಳಲ್ಲಿ ಹಳಿ ದಾಟುವುದು ಶಿಕ್ಷಾರ್ಹ ಅಪರಾಧವಾಗಿದ್ದರೂ ಜನರು ಇದನ್ನು ಪಾಲಿಸುತ್ತಿಲ್ಲ. ಈ ಘಟನೆಯಲ್ಲಿ ಕೇವಲ ಮಹಿಳೆಯ ತಪ್ಪು ಮಾತ್ರವಲ್ಲದೆ, ಅಕ್ರಮವಾಗಿ ಮರದ ದಿಮ್ಮಿಗಳನ್ನು ಸಾಗಿಸುತ್ತಿದ್ದವರ ಮತ್ತು ಅದನ್ನು ತಡೆಯದ ರೈಲ್ವೆ ಸಿಬ್ಬಂದಿಗಳ ನಿರ್ಲಕ್ಷ್ಯವೂ ಎದ್ದು ಕಾಣುತ್ತಿದೆ. ಮರದ ದಿಮ್ಮಿಗೆ ರೈಲು ಡಿಕ್ಕಿ ಹೊಡೆದಾಗ ರೈಲು ಹಳಿ ತಪ್ಪುವ (Derail) ಸಾಧ್ಯತೆಯೂ ಇತ್ತು, ಅದೃಷ್ಟವಶಾತ್ ಅಂತಹ ದೊಡ್ಡ ಅನಾಹುತ ತಪ್ಪಿದೆ.
ರೈಲ್ವೆ ಸಚಿವಾಲಯವನ್ನು ಟ್ಯಾಗ್ ಮಾಡಿರುವ ಹಲವು ಬಳಕೆದಾರರು ಈ ಬಗ್ಗೆ ತನಿಖೆ ನಡೆಸಿ ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದ್ದಾರೆ. ಪ್ರತಿಯೊಬ್ಬ ಪ್ರಯಾಣಿಕರು ನಿಲ್ದಾಣಗಳಲ್ಲಿ ಪಾದಚಾರಿ ಮೇಲ್ಸೇತುವೆಗಳನ್ನು ಬಳಸಬೇಕು ಮತ್ತು ಸುರಕ್ಷತಾ ನಿಯಮಗಳನ್ನು ಗೌರವಿಸಬೇಕು ಎಂಬ ಎಚ್ಚರಿಕೆಯನ್ನು ಈ ಘಟನೆ ನೀಡಿದೆ.
