ಸೆಲೆಬ್ರಿಟಿ ಕ್ರಿಕೆಟ್ ಲೀಗ್ 2026ರ ಆವೃತ್ತಿಗೆ ಇಂದು ( ಫೆಬ್ರವರಿ 1 ) ನಡೆಯುತ್ತಿರುವ ಫೈನಲ್ ಪಂದ್ಯದ ಮೂಲಕ ತೆರೆ ಬೀಳಲಿದೆ. ಪಂದ್ಯದಲ್ಲಿ ಕರ್ನಾಟಕ ಬುಲ್ಡೋಜರ್ಸ್ ಹಾಗೂ ಬೆಂಗಾಲ್ ಟೈಗರ್ಸ್ ತಂಡಗಳು ಟ್ರೋಫಿಗಾಗಿ ಅಂತಿಮ ಕಾದಾಟ ನಡೆಸಿವೆ.
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಬೆಂಗಾಲ್ ಟೈಗರ್ಸ್ ತಂಡ ಕರ್ನಾಟಕ ಬುಲ್ಡೋಜರ್ಸ್ ಬೌಲಿಂಗ್ ದಾಳಿಗೆ ತತ್ತರಿಸಿತು. ಆರಂಭಿಕ ಆಟಗಾರ ಜಾಯ್ ಹೊರತುಪಡಿಸಿ ಉಳಿದ ಯಾವೊಬ್ಬ ಆಟಗಾರನೂ ಸಹ ಬುಲ್ಡೋಜರ್ಸ್ ಬೌಲಿಂಗ್ ಅಬ್ಬರದ ಎದುರು ಸಮರ್ಥರಾಗಿ ನಿಲ್ಲಲಿಲ್ಲ. ಜಾಯ್ 54 ರನ್ ಗಳಿಸಿದರೆ, ಉದಯ್ 5, ಜ್ಯಾಮಿ 4, ಜಿಶು 17, ರಾಹುಲ್ 10, ಯೂಸುಫ್ 1, ರತ್ನದೀಪ್ ಡಕ್‌ಔಟ್, ಆದಿತ್ಯ ಡಕ್‌ಔಟ್, ಇಂದ್ರಶಿಶ್ 17 ಹಾಗೂ ಆನಂದ ಅಜೇಯ 12 ರನ್ ಕಲೆಹಾಕಿದರು.
ಈ ಮೂಲಕ 20 ಓವರ್‌ಗಳಲ್ಲಿ 129 ರನ್‌ಗೆ ತನ್ನೆಲ್ಲ ವಿಕೆಟ್ ಕಳೆದುಕೊಂಡ ಬೆಂಗಾಲ್ ಟೈಗರ್ಸ್ ಕರ್ನಾಟಕ ಬುಲ್ಡೋಜರ್ಸ್ ತಂಡಕ್ಕೆ 130 ರನ್‌ಗಳ ಸಾಧಾರಣ ಗುರಿ ನೀಡಿದೆ.
ಕರ್ನಾಟಕ ಬುಲ್ಡೋಜರ್ಸ್ ಪರ ಪ್ರತಾಪ್ ನಾರಾಯಣ್ ಮೂರು ವಿಕೆಟ್, ಸುನಿಲ್ ರಾವ್ ಎರಡು ವಿಕೆಟ್, ಕರಣ್ ಆರ್ಯನ್ ಹಾಗೂ ಕಾರ್ತಿಕ್ ಜಯರಾಮ್ ತಲಾ ಒಂದೊಂದು ವಿಕೆಟ್ ಪಡೆದರು.
