ಪ್ರಕೃತಿಧಾಮವೊಂದರಿಂದ ಪರಾರಿಯಾದ 15 ಕಾಡಾನೆಗಳು 500 ಕಿಮೀ ವ್ಯಾಪ್ತಿ ಪ್ರದೇಶದಲ್ಲಿ ಅಪಾರ ಹಾನಿ ಮಾಡಿದ ಘಟನೆ ನೈಋತ್ಯ ಚೀನಾದಲ್ಲಿ ಘಟಿಸಿದೆ. ಅಪಾರ ಪ್ರಮಾಣದಲ್ಲಿ ಬೆಳೆ ನಾಶ ಮಾಡಿರುವ ಆನೆಗಳು ಮೆಕ್ಕೆಜೋಳದ ಫಸಲನ್ನು ತಿಂದು ತೇಗಿವೆ.
ಈ ಆನೆಗಳು ವಸತಿ ಪ್ರದೇಶಗಳಲ್ಲಿ ದಾಳಿ ಮಾಡುತ್ತಿರುವ ವಿಡಿಯೋಗಳು ಆನ್ಲೈನ್ನಲ್ಲಿ ವೈರಲ್ ಆಗಿವೆ. ಆನೆಗಳ ಈ ಹಿಂಡು ಒಟ್ಟಾರೆ 56 ಎಕರೆ ಬೆಳೆ ನಾಶ ಮಾಡಿದ್ದು, ಒಟ್ಟಾರೆ $1.07 ದಶಲಕ್ಷ ಮೌಲ್ಯದ ಬೆಳೆ ಹಾನಿ ಮಾಡಿವೆ.
ಚೀನಾದ ಯುನ್ನಾನ್ ಪ್ರಾಂತ್ಯದ ಶಿಶುವಾಂಗ್ಬನ್ನಾ ರಾಷ್ಟ್ರೀಯ ಪ್ರಕೃತಿ ಧಾಮದಿಂದ ಈ ಆನೆಗಳು ಅದು ಹೇಗೆ ತಪ್ಪಿಸಿಕೊಂಡವು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಆದರೆ ಅವು ಅಲ್ಲಿಂದ ಕಾಲ್ಕಿತ್ತ ಬಳಿಕ ಒಟ್ಟಾರೆ 500 ಕಿಮೀ ದೂರ ಕಾಲ್ನಡಿಗೆಯಲ್ಲಿ ಕ್ರಮಿಸಿದ್ದು, ಸಾರ್ವಜನಿಕರಿಗೆ ಇವುಗಳಿಗೆ ಯಾವುದೇ ತೊಂದರೆಯಾಗುವುದನ್ನು ತಪ್ಪಿಸಲು ಆಡಳಿತಾಧಿಕಾರಿಗಳು ಗಮನ ಹರಿಸಿದ್ದಾರೆ.