ಶಿವಸೇನೆಯಿಂದ ಊರ್ಮಿಳಾ ಮಾತೋಂಡ್ಕರ್​ಗೆ ಬಿಗ್​ ಆಫರ್​..!

ರಾಜ್ಯಪಾಲರ ಮೂಲಕ ಮಹಾರಾಷ್ಟ್ರ ವಿಧಾನ ಪರಿಷತ್ತಿಗೆ ನಾಮ ನಿರ್ದೇಶನ ಮಾಡಲು ಶಿವಸೇನೆ ಬಾಲಿವುಡ್​ ನಟಿ ಊರ್ಮಿಳಾ ಮಾತೋಂಡ್ಕರ್​ರನ್ನ ಆಯ್ಕೆ ಮಾಡಿದೆ.

ಈ ವಿಚಾರವಾಗಿ ಮಾತನಾಡಿದ ಶಿವಸೇನಾ ಮುಖ್ಯ ವಕ್ತಾರ ಸಂಜಯ್​ ರಾವತ್​, ಸಿಎಂ ಉದ್ದವ್​ ಠಾಕ್ರೆ ಊರ್ಮಿಳಾ ಮಾತೋಂಡ್ಕರ್​ ಜೊತೆ ಮಾತನಾಡಿದ್ದು ನಾಮ ನಿರ್ದೇಶನ ಮಾಡಲು ಒಪ್ಪಿಗೆ ನೀಡಲಾಗಿದೆ ಅಂತಾ ಅಧಿಕೃತ ಮಾಹಿತಿ ನೀಡಿದ್ದಾರೆ.

ಮಹಾರಾಷ್ಟ್ರ ಮೇಲ್ಮನೆಗೆ ನಾಮನಿರ್ದೇಶನ ಮಾಡಲು ಶಿವಸೇನಾ ಸರ್ಕಾರ ರಾಜ್ಯಪಾಲ ಭಗತ್​ ಸಿಂಗ್​ ಕೋಶ್ಯಾರಿಗೆ 12 ಹೆಸರುಗಳನ್ನ ಶಿಫಾರಸು ಮಾಡಬೇಕಿದೆ. ಇದೀಗ ರಾಜ್ಯಪಾಲರಿಗೆ ಊರ್ಮಿಳಾ ಹೆಸರನ್ನ ರಾಜ್ಯಪಾಲರಿಗೆ ಶಿಫಾರಸು ಮಾಡುವುದರ ಜೊತೆಗೆ ಶಿವಸೇನೆ ಈ ಹೆಸರಾಂತ ನಟಿಯನ್ನ ತಮ್ಮ ಪಕ್ಷದ ವಕ್ತಾರನ್ನಾಗಿ ಮಾಡಿಕೊಳ್ಳಲು ಚಿಂತನೆ ನಡೆಸಿದೆ.

ಬಾಲಿವುಡ್​ ನಟಿ ಊರ್ಮಿಳಾ ಮಾತೋಂಡ್ಕರ್​ ಹೆಸರು ಕಾಂಗ್ರೆಸ್​ನಿಂದ ಕೇಳಿ ಬಂದಿತ್ತು. ಆದರೆ ಈ ಬಗ್ಗೆಯೂ ಸ್ಪಷ್ಟನೆ ನೀಡಿರುವ ಶಿವಸೇನೆ ಊರ್ಮಿಳಾ ಕಳೆದ ವರ್ಷವೇ ಕಾಂಗ್ರೆಸ್​​ನಿಂದ ಹೊರಬಂದಿದ್ದಾರೆ ಅಂತಾ ಹೇಳಿದೆ. 2019ರಲ್ಲಿ ಊರ್ಮಿಳಾ ಕಾಂಗ್ರೆಸ್​ನಿಂದ ಮುಂಬೈ ಉತ್ತರ ಕ್ಷೇತ್ರದಲ್ಲಿ ಲೋಕಸಭಾ ಚುನಾವಣೆಗೆ ಕಣಕ್ಕಿಳಿದಿದ್ದರು. ಆದರೆ ಅವರು ಬಿಜೆಪಿಯ ಗೋಪಾಲ್​ ಶೆಟ್ಟಿ ಎದುರು ಪರಾಭವಗೊಂಡಿದ್ದರು.