ಸಂಜೆ ಚಹಾ ಸಮಯಕ್ಕೆ ಬಿಸಿಬಿಸಿಯಾದ ಬ್ರೆಡ್ ಪಕೋಡಾ ಇದ್ದರೆ ಅದರ ಮಜವೇ ಬೇರೆ. ಆದರೆ ಎಣ್ಣೆಯಲ್ಲಿ ಕರಿದ ತಿಂಡಿ ಆರೋಗ್ಯಕ್ಕೆ ಅಷ್ಟು ಹಿತವಲ್ಲ ಎಂಬ ಕಾರಣಕ್ಕೆ ಅನೇಕರು ಇದರಿಂದ ದೂರ ಉಳಿಯುತ್ತಾರೆ. ಅಂತಹವರಿಗಾಗಿ ಇಲ್ಲಿದೆ ಎಣ್ಣೆಯ ಬಳಕೆಯಿಲ್ಲದೆ ತಯಾರಿಸಬಹುದಾದ ‘ಏರ್ ಫ್ರೈಯರ್ ಬ್ರೆಡ್ ಪಕೋಡಾ’. ಹಬೆಯಾಡುವ ಚಹಾದೊಂದಿಗೆ ಸವಿಯಲು ಇದು ಅತ್ಯುತ್ತಮ ಸ್ನ್ಯಾಕ್ ಆಗಿದೆ.
ಬೇಕಾಗುವ ಪದಾರ್ಥಗಳು: ಒಂದು ಕಪ್ ಕಡಲೆ ಹಿಟ್ಟು (ಬೇಸನ್), ಒಂದು ಚಮಚ ರವೆ (ಸೂಜಿ), 5 ರಿಂದ 6 ಬ್ರೆಡ್ ಸ್ಲೈಸ್‌ಗಳು, ಒಂದು ಚಿಟಿಕೆ ಅಡುಗೆ ಸೋಡಾ, ಅರ್ಧ ಚಮಚ ಅರಿಶಿನ ಪುಡಿ, ಒಂದು ಬೇಯಿಸಿ ಪುಡಿ ಮಾಡಿದ ಆಲೂಗಡ್ಡೆ, ಅರ್ಧ ಚಮಚ ಅಚ್ಚಖಾರ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು, ಪುದೀನಾ ಚಟ್ನಿ, ಅಲ್ಪ ಪ್ರಮಾಣದ ಎಣ್ಣೆ ಮತ್ತು ಅಗತ್ಯಕ್ಕೆ ತಕ್ಕಷ್ಟು ನೀರು.
ತಯಾರಿಸುವ ವಿಧಾನ: ಮೊದಲು ಬ್ರೆಡ್ ಸ್ಲೈಸ್‌ಗಳನ್ನು ತೆಗೆದುಕೊಂಡು ಅದರ ಒಂದು ಬದಿಗೆ ಪುದೀನಾ ಚಟ್ನಿಯನ್ನು ಹಚ್ಚಿ. ನಂತರ ಅದರ ಮೇಲೆ ಸಿದ್ಧಪಡಿಸಿದ ಆಲೂಗಡ್ಡೆ ಮಿಶ್ರಣವನ್ನು ಹರಡಿ ಮತ್ತೊಂದು ಬ್ರೆಡ್ ಸ್ಲೈಸ್‌ನಿಂದ ಮುಚ್ಚಿ. ಈಗ ಈ ಬ್ರೆಡ್ ಅನ್ನು ಓರೆಯಾಗಿ (Triangular shape) ಕತ್ತರಿಸಿ ಪಕ್ಕಕ್ಕೆ ಇರಿಸಿ.
ನಂತರ ಒಂದು ಪಾತ್ರೆಯಲ್ಲಿ ಕಡಲೆ ಹಿಟ್ಟು, ರವೆ, ಅರಿಶಿನ, ಖಾರದ ಪುಡಿ, ಉಪ್ಪು ಮತ್ತು ಅಡುಗೆ ಸೋಡಾವನ್ನು ಹಾಕಿ ನೀರು ಬೆರೆಸಿ ಗಟ್ಟಿಯಾದ ಹಿಟ್ಟಿನ ಮಿಶ್ರಣವನ್ನು ತಯಾರಿಸಿಕೊಳ್ಳಿ. ಸಿದ್ಧಪಡಿಸಿದ ಬ್ರೆಡ್ ತುಂಡುಗಳನ್ನು ಈ ಹಿಟ್ಟಿನಲ್ಲಿ ಅದ್ದಿ ಹೆಚ್ಚುವರಿ ಹಿಟ್ಟು ಸೋರಿ ಹೋಗುವಂತೆ ನೋಡಿಕೊಳ್ಳಿ.
ಏರ್ ಫ್ರೈಯರ್ ಅನ್ನು 180 ಡಿಗ್ರಿ ಸೆಲ್ಸಿಯಸ್‌ನಲ್ಲಿ 5-7 ನಿಮಿಷಗಳ ಕಾಲ ಪ್ರಿ-ಹೀಟ್ ಮಾಡಿ. ನಂತರ ಏರ್ ಫ್ರೈಯರ್ ಬಾಸ್ಕೆಟ್‌ನಲ್ಲಿ ಪಾರ್ಚ್‌ಮೆಂಟ್ ಪೇಪರ್ ಹರಡಿ ಅದರ ಮೇಲೆ ಬ್ರೆಡ್ ತುಂಡುಗಳನ್ನು ಇರಿಸಿ. ಸುಮಾರು 10 ನಿಮಿಷಗಳ ಕಾಲ ಏರ್ ಫ್ರೈ ಮಾಡಿ. ಮಧ್ಯದಲ್ಲಿ ಒಮ್ಮೆ ಬ್ರೆಡ್ ತುಂಡುಗಳನ್ನು ಮಗುಚಿ ಹಾಕಿ ಸ್ವಲ್ಪ ಎಣ್ಣೆಯನ್ನು ಬ್ರಷ್ ಮಾಡಿ. ಪಕೋಡಾ ಗೋಲ್ಡನ್ ಬ್ರೌನ್ ಬಣ್ಣಕ್ಕೆ ಬಂದ ನಂತರ ಹೊರತೆಗೆದು ಬಿಸಿಯಾಗಿರುವಾಗಲೇ ನಿಮ್ಮ ನೆಚ್ಚಿನ ಚಟ್ನಿಯೊಂದಿಗೆ ಸವಿಯಿರಿ.
