ನಮ್ಮ ದೇಶದಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಶಿಕ್ಷಣವು ಸಾಕಷ್ಟು ದುಬಾರಿಯಾಗುತ್ತಿದೆ. ಗುಣಮಟ್ಟದ ಶಿಕ್ಷಣಕ್ಕಾಗಿ ಪೋಷಕರು ಲಕ್ಷಾಂತರ ರೂಪಾಯಿ ಖರ್ಚು ಮಾಡುವುದನ್ನು ನಾವು ನೋಡಿದ್ದೇವೆ. ಮುಖೇಶ್ ಅಂಬಾನಿ ಮಾಲೀಕತ್ವದ ಧೀರೂಭಾಯಿ ಅಂಬಾನಿ ಇಂಟರ್ನ್ಯಾಷನಲ್ ಸ್ಕೂಲ್ ಭಾರತದ ಪ್ರತಿಷ್ಠಿತ ಮತ್ತು ದುಬಾರಿ ಶಾಲೆಗಳಲ್ಲಿ ಒಂದು ಎಂಬುದು ನಮಗೆಲ್ಲರಿಗೂ ಗೊತ್ತು. ಆದರೆ ನೀವು ನಂಬಲೇಬೇಕಾದ ಒಂದು ಸತ್ಯವೆಂದರೆ, ಜಗತ್ತಿನಲ್ಲಿ ಇಂತಹ ಹತ್ತಾರು ಶಾಲೆಗಳನ್ನು ಮೀರಿಸುವಂತಹ ಅತ್ಯಂತ ದುಬಾರಿ ಶಾಲೆಯೊಂದು ಸ್ವಿಟ್ಜರ್ಲೆಂಡ್ನಲ್ಲಿದೆ.
ಇನ್ಸ್ಟಿಟ್ಯೂಟ್ ಲೆ ರೋಸಿ ಎಂಬ ಹೆಸರಿನ ಈ ಶಾಲೆಯನ್ನು ವಿಶ್ವದ ಅತ್ಯಂತ ದುಬಾರಿ ಶಿಕ್ಷಣ ಸಂಸ್ಥೆ ಎಂದು ಕರೆಯಲಾಗುತ್ತದೆ. ಇಲ್ಲಿ ಒಬ್ಬ ವಿದ್ಯಾರ್ಥಿಯ ಒಂದು ವರ್ಷದ ವ್ಯಾಸಂಗಕ್ಕೆ ತಗಲುವ ವೆಚ್ಚ ಕೇಳಿದರೆ ನೀವು ಬೆರಗಾಗುವುದು ಖಂಡಿತ. ಮಾಧ್ಯಮ ವರದಿಗಳ ಪ್ರಕಾರ, ಈ ಶಾಲೆಯಲ್ಲಿ ಓದಲು ಒಬ್ಬ ವಿದ್ಯಾರ್ಥಿ ವಾರ್ಷಿಕ ಸುಮಾರು ಒಂದು ಕೋಟಿ ಹದಿನಾರು ಲಕ್ಷ ರೂಪಾಯಿಗೂ ಅಧಿಕ ಹಣವನ್ನು ಶುಲ್ಕವಾಗಿ ಪಾವತಿಸಬೇಕಾಗುತ್ತದೆ. ಅಂದರೆ ಇಲ್ಲಿನ ಒಬ್ಬ ವಿದ್ಯಾರ್ಥಿಯ ಶಿಕ್ಷಣದ ವೆಚ್ಚದಲ್ಲಿ ಒಂದು ಇಡೀ ಹಳ್ಳಿಯ ಮಕ್ಕಳ ಶಿಕ್ಷಣವನ್ನೇ ಪೂರೈಸಬಹುದು.
ಏನಿದರ ವಿಶೇಷತೆ? 1880 ರಲ್ಲಿ ಪಾಲ್ ಕಾರ್ನಲ್ ಎಂಬುವವರಿಂದ ಸ್ಥಾಪಿಸಲ್ಪಟ್ಟ ಈ ಶಾಲೆಗೆ ಶತಮಾನಗಳ ಇತಿಹಾಸವಿದೆ. ಇಲ್ಲಿ ಕೇವಲ ಶ್ರೀಮಂತರು ಮಾತ್ರವಲ್ಲದೆ, ವಿವಿಧ ದೇಶಗಳ ರಾಜಮನೆತನದ ಮಕ್ಕಳು ಶಿಕ್ಷಣ ಪಡೆಯುತ್ತಾರೆ. ಸ್ಪೇನ್, ಈಜಿಪ್ಟ್, ಬೆಲ್ಜಿಯಂ ಮತ್ತು ಗ್ರೀಸ್ ದೇಶದ ರಾಜರುಗಳು ಈ ಹಿಂದೆ ಇಲ್ಲಿ ವ್ಯಾಸಂಗ ಮಾಡಿದ್ದರು ಎಂಬುದು ವಿಶೇಷ. ಸುಮಾರು 50 ಕ್ಕೂ ಹೆಚ್ಚು ರಾಷ್ಟ್ರಗಳ ಕೇವಲ 280 ವಿದ್ಯಾರ್ಥಿಗಳಿಗೆ ಮಾತ್ರ ಇಲ್ಲಿ ಪ್ರವೇಶವಿರುತ್ತದೆ.
ವಿಶ್ವದ ಏಕೈಕ ಎರಡು ಕ್ಯಾಂಪಸ್ ಹೊಂದಿರುವ ಶಾಲೆ ಈ ಶಾಲೆಯ ಮತ್ತೊಂದು ವಿಶಿಷ್ಟ ಅಂಶವೆಂದರೆ ಇದು ವರ್ಷದಲ್ಲಿ ಎರಡು ವಿಭಿನ್ನ ಕ್ಯಾಂಪಸ್ಗಳಲ್ಲಿ ಕಾರ್ಯನಿರ್ವಹಿಸುತ್ತದೆ. ಋತುಮಾನಕ್ಕೆ ಅನುಗುಣವಾಗಿ ವಿದ್ಯಾರ್ಥಿಗಳ ಅನುಕೂಲಕ್ಕಾಗಿ ಈ ವ್ಯವಸ್ಥೆ ಮಾಡಲಾಗಿದೆ. ಇಲ್ಲಿನ ಸೌಲಭ್ಯಗಳು ಐಷಾರಾಮಿ ಹೋಟೆಲ್ಗಳನ್ನೂ ಮೀರಿಸುವಂತಿವೆ. ಸುಮಾರು 400 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಲಾದ ಬೃಹತ್ ಕನ್ಸರ್ಟ್ ಹಾಲ್, ಟೆನ್ನಿಸ್ ಕೋರ್ಟ್ಗಳು, ಕುದುರೆ ಸವಾರಿ ಕೇಂದ್ರ, ಶೂಟಿಂಗ್ ರೇಂಜ್ ಮತ್ತು ನೌಕಾಯಾನ ಕೇಂದ್ರಗಳು ಈ ಶಾಲೆಯ ಆವರಣದಲ್ಲಿವೆ.
ಇಲ್ಲಿನ ಶಿಸ್ತು ಕೂಡ ಅಷ್ಟೇ ಕಟ್ಟುನಿಟ್ಟಾಗಿರುತ್ತದೆ. ರಾತ್ರಿಯ ಭೋಜನದ ಸಮಯದಲ್ಲಿ ವಿದ್ಯಾರ್ಥಿಗಳು ಔಪಚಾರಿಕ ಉಡುಪುಗಳಲ್ಲೇ ಇರಬೇಕು. ಹುಡುಗರು ಕಡ್ಡಾಯವಾಗಿ ಕೋಟು ಮತ್ತು ಟೈ ಧರಿಸಬೇಕೆಂಬ ನಿಯಮವಿದೆ. ಕೇವಲ ಪಠ್ಯವಲ್ಲದೆ ಸಂಗೀತ, ಕ್ರೀಡೆ ಮತ್ತು ಕಲೆಗೆ ಇಲ್ಲಿ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗುತ್ತದೆ. ಒಟ್ಟಿನಲ್ಲಿ ಸಾಮಾನ್ಯ ಜನರಿಗೆ ಮರೀಚಿಕೆಯಾಗಿರುವ ಈ ಶಾಲೆ, ವಿಶ್ವದ ಸಿರಿವಂತರ ನೆಚ್ಚಿನ ತಾಣವಾಗಿದೆ.
