ಆಸ್ಪತ್ರೆಗೆ ಹೋದಾಗ ವೈದ್ಯರು ನೀಡುವ ಚೀಟಿಯಲ್ಲಿ ನಮಗೆ ಅರ್ಥವಾಗದ ಹಲವು ಪದಗಳಿರುತ್ತವೆ. ಆದರೆ ಆ ಪುಟ್ಟ ಪದಗಳಲ್ಲೇ ನಿಮ್ಮ ಆರೋಗ್ಯದ ಸಂಪೂರ್ಣ ಜಾತಕ ಅಡಗಿರುತ್ತದೆ. ನಿಮ್ಮ ಕಾಯಿಲೆ ಯಾವುದು? ನೀಡುತ್ತಿರುವ ಚಿಕಿತ್ಸೆ ಏನು? ಎಂಬಿತ್ಯಾದಿ ವಿಚಾರಗಳನ್ನು ಸಾಮಾನ್ಯ ಜನರೂ ಸುಲಭವಾಗಿ ಅರ್ಥಮಾಡಿಕೊಳ್ಳಲು ಈ ವೈದ್ಯಕೀಯ ಸಂಕೇತಗಳ ಮಾಹಿತಿ ಇಲ್ಲಿದೆ.
ಹೌದು, ನಾವು ವೈದ್ಯರನ್ನು ಭೇಟಿಯಾದಾಗ ಅವರು ನೀಡುವ ಪ್ರಿಸ್ಕ್ರಿಪ್ಷನ್ನಲ್ಲಿ ಮದ್ದುಗಳ ಹೆಸರಿನ ಜೊತೆಗೆ ಕೆಲವು ಸಂಕ್ಷಿಪ್ತ ಪದಗಳು ಕಾಣಿಸುತ್ತವೆ. ಇವುಗಳನ್ನು ನೋಡಿ ಅನೇಕರು ಗೊಂದಲಕ್ಕೊಳಗಾಗುತ್ತಾರೆ. ಸಾಮಾನ್ಯವಾಗಿ ವೈದ್ಯಕೀಯ ಕ್ಷೇತ್ರದಲ್ಲಿ ಲ್ಯಾಟಿನ್, ಗ್ರೀಕ್ ಅಥವಾ ರೋಮನ್ ಪದಗಳನ್ನು ಹೆಚ್ಚಾಗಿ ಬಳಸಲಾಗುತ್ತದೆ. ಈ ಸಂಕ್ಷಿಪ್ತ ಪದಗಳ ಹಿಂದೆ ರೋಗಿಯ ಪ್ರಸ್ತುತ ಸ್ಥಿತಿ, ಹಳೆಯ ಇತಿಹಾಸ ಮತ್ತು ಮುಂದಿನ ಚಿಕಿತ್ಸಾ ವಿಧಾನಗಳ ಸಂಪೂರ್ಣ ಮಾಹಿತಿ ಅಡಗಿರುತ್ತದೆ. Rx, Dx, Tx ನಂತಹ ಪದಗಳ ಅರ್ಥ ತಿಳಿಯುವುದರಿಂದ ನಿಮ್ಮ ಆರೋಗ್ಯದ ಬಗ್ಗೆ ನಿಮಗೆ ಸ್ಪಷ್ಟ ಅವಾಹನೆ ಲಭಿಸುತ್ತದೆ.
Rx ನಿಂದ Dx ವರೆಗೆ..
ವೈದ್ಯರು ಪ್ರಿಸ್ಕ್ರಿಪ್ಷನ್ ಬರೆಯುವಾಗ ಸಮಯ ಉಳಿಸಲು ಮತ್ತು ಸ್ಪಷ್ಟತೆಗಾಗಿ ಕೆಲವು ಅಂತರಾಷ್ಟ್ರೀಯ ಗುಣಮಟ್ಟದ ಸಂಕೇತಗಳನ್ನು ಬಳಸುತ್ತಾರೆ.
• Rx (Prescription): ಇದು ಅತ್ಯಂತ ಪ್ರಮುಖವಾದುದು. ಇದು ಲ್ಯಾಟಿನ್ ಪದ ‘ರೆಸಿಪಿ’ (Recipe) ಇಂದ ಬಂದಿದೆ, ಇದರ ಅರ್ಥ “ತೆಗೆದುಕೊಳ್ಳಿ” ಎಂದು. ಅಂದರೆ, ವೈದ್ಯರು ಸೂಚಿಸಿದ ಮದ್ದನ್ನು ನೀವು ಸೇವಿಸಬೇಕು ಎಂದರ್ಥ.
• Dx (Diagnosis): ಇದರ ಅರ್ಥ “ರೋಗ ನಿರ್ಧರಣೆ”. ರೋಗಿಯು ಯಾವ ಕಾಯಿಲೆಯಿಂದ ಬಳಲುತ್ತಿದ್ದಾರೆ ಎಂಬುದನ್ನು ಗುರುತಿಸಿ ಅದರ ಹೆಸರನ್ನು ಇಲ್ಲಿ ಬರೆಯಲಾಗುತ್ತದೆ.
• Sx (Symptoms): ರೋಗಿ ಅನುಭವಿಸುತ್ತಿರುವ ನೋವು, ಜ್ವರ ಅಥವಾ ಶಾರೀರಿಕ ಬದಲಾವಣೆಗಳನ್ನು ಅಂದರೆ “ಲಕ್ಷಣಗಳನ್ನು” ವಿವರಿಸಲು ಇದನ್ನು ಬಳಸುತ್ತಾರೆ.
• Tx (Treatment): ಕಾಯಿಲೆಯನ್ನು ಗುಣಪಡಿಸಲು ವೈದ್ಯರು ಅನುಸರಿಸುವ “ಚಿಕಿತ್ಸಾ ವಿಧಾನ”ಕ್ಕಾಗಿ ಈ ಪದ ಬಳಸಲಾಗುತ್ತದೆ.
ಇತಿಹಾಸ ಮತ್ತು ಭವಿಷ್ಯದ ಅಂದಾಜು (Hx, Px)
ರೋಗ ನಿರ್ಣಯಕ್ಕೆ ಕೇವಲ ಪ್ರಸ್ತುತ ಲಕ್ಷಣಗಳು ಸಾಕಾಗುವುದಿಲ್ಲ, ಹಳೆಯ ಇತಿಹಾಸವೂ ಮುಖ್ಯ.
• Hx (History): ಇದರಲ್ಲಿ ರೋಗಿಯ ಹಳೆಯ ಅನಾರೋಗ್ಯಗಳು, ಶಸ್ತ್ರಚಿಕಿತ್ಸೆಗಳು ಅಥವಾ ಅಲರ್ಜಿಗಳ ವಿವರ ಇರುತ್ತದೆ.
• Px (Prognosis): ಅಂದರೆ ಕಾಯಿಲೆಯ ಗತಿಯನ್ನು ನೋಡಿ ರೋಗಿ ಗುಣಮುಖರಾಗುವ ಸಾಧ್ಯತೆ ಎಷ್ಟಿದೆ ಎಂದು ಅಂದಾಜಿಸುವುದು. ಉದಾಹರಣೆಗೆ Px ‘Good’ ಎಂದಿದ್ದರೆ ರೋಗಿ ಬೇಗ ಗುಣವಾಗುತ್ತಾರೆ ಎಂದರ್ಥ.
ಪರೀಕ್ಷೆಗಳು ಮತ್ತು ಮದ್ದುಗಳು (Bx, ABx, Fx)
• Bx (Biopsy): ಅಂದರೆ ಪರೀಕ್ಷೆಗಾಗಿ ದೇಹದ ಕಣಜಾಲದ ನಮೂನೆಯನ್ನು ತೆಗೆದು ಪರೀಕ್ಷಿಸುವುದು. ಕ್ಯಾನ್ಸರ್ ನಂತಹ ಗಂಭೀರ ಸೋಂಕುಗಳನ್ನು ಪತ್ತೆಹಚ್ಚಲು ಇದನ್ನು ಬಳಸುತ್ತಾರೆ.
• Fx (Fracture): ಮೂಳೆ ಮುರಿತ ಅಥವಾ ಸಣ್ಣ ಬಿರುಕು ಬಿಟ್ಟ ಸಂದರ್ಭದಲ್ಲಿ ವೈದ್ಯರು ಇದನ್ನು ಬಳಸುತ್ತಾರೆ.
• ABx (Antibiotics): ಬ್ಯಾಕ್ಟೀರಿಯಾ ಸೋಂಕುಗಳನ್ನು ತಡೆಗಟ್ಟುವ ಮದ್ದುಗಳಿಗಾಗಿ (ಆಂಟಿಬಯೋಟಿಕ್ಸ್) ಈ ಸಂಕ್ಷಿಪ್ತ ರೂಪ ಬಳಸಲಾಗುತ್ತದೆ.
ಗಮನಿಸಿ: ಈ ಮಾಹಿತಿಯು ಸಾಮಾನ್ಯ ಜ್ಞಾನಕ್ಕಾಗಿ ಮಾತ್ರ. ನಿಮ್ಮ ಪ್ರಿಸ್ಕ್ರಿಪ್ಷನ್ ಬಗ್ಗೆ ಯಾವುದೇ ಅನುಮಾನವಿದ್ದರೆ ನಿಮ್ಮ ವೈದ್ಯರನ್ನು ಅಥವಾ ಫಾರ್ಮಾಸಿಸ್ಟ್ ಅನ್ನು ಸಂಪರ್ಕಿಸಿ. ಸ್ವಯಂ ವೈದ್ಯ ಪದ್ಧತಿ ಯಾವಾಗಲೂ ಅಪಾಯಕಾರಿ.
