ಸೋಷಿಯಲ್ ಮೀಡಿಯಾದಲ್ಲಿ ಸದಾ ವಿಭಿನ್ನ ಫ್ಯಾಷನ್ ಪ್ರಯೋಗಗಳ ಮೂಲಕ ಸುದ್ದಿಯಲ್ಲಿರುವ ನಟಿ ಉರ್ಫಿ ಜಾವೇದ್ ತಮ್ಮ ಬದುಕಿನ ಅತ್ಯಂತ ಕಷ್ಟದ ಹಂತವೊಂದರ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ. ಹೊರಜಗತ್ತಿಗೆ ಗ್ಲಾಮರಸ್ ಆಗಿ ಕಾಣುವ ಸೆಲೆಬ್ರಿಟಿಗಳ ಜೀವನದ ಹಿಂದೆ ಎಂತಹ ನೋವುಗಳಿರಬಹುದು ಎಂಬುದಕ್ಕೆ ಉರ್ಫಿ ಹಂಚಿಕೊಂಡಿರುವ ವಿಷಯಗಳು ಈಗ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಗ್ರಾಸವಾಗಿವೆ.
ಇತ್ತೀಚೆಗೆ ತಮ್ಮ ಇನ್ ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಹಳೆಯ ಫೋಟೋವೊಂದನ್ನು ಹಂಚಿಕೊಂಡಿರುವ ಉರ್ಫಿ ತಾವು ಅನುಭವಿಸಿದ ದೈಹಿಕ ಮತ್ತು ಮಾನಸಿಕ ಕಿರುಕುಳದ ಬಗ್ಗೆ ವಿವರಿಸಿದ್ದಾರೆ. ಒಂದು ಕಾಲದಲ್ಲಿ ಅವರ ದೇಹದ ತೂಕ ಕೇವಲ 38 ಕೆಜಿಗೆ ಇಳಿದಿತ್ತಂತೆ. ಆ ಸಮಯದಲ್ಲಿ ಅವರು ತೀವ್ರವಾದ ಖಿನ್ನತೆಯಿಂದ ಬಳಲುತ್ತಿದ್ದರು. ಆಹಾರದ ಬಗ್ಗೆ ಕಾಳಜಿ ವಹಿಸದೆ ದಿನಕ್ಕೆ ಒಂದೇ ಬಾರಿ ಊಟ ಮಾಡುತ್ತಿದ್ದ ಕಾರಣ ಅವರ ಆರೋಗ್ಯ ಸಂಪೂರ್ಣ ಹದಗೆಟ್ಟಿತ್ತು. ದೇಹಕ್ಕೆ ಅಗತ್ಯವಾದ ಕಾರ್ಬೋಹೈಡ್ರೇಟ್ ಅಂಶಗಳನ್ನು ಸಂಪೂರ್ಣವಾಗಿ ತ್ಯಜಿಸಿದ್ದರಿಂದ ಅವರು ಸದಾ ಕೋಪ ಮತ್ತು ಕಿರಿಕಿರಿ ಅನುಭವಿಸುತ್ತಿದ್ದರು ಎಂದು ಹೇಳಿಕೊಂಡಿದ್ದಾರೆ.
ಇನ್ನು ವಿಶೇಷವೆಂದರೆ ಉರ್ಫಿ ಜಾವೇದ್ ಅತ್ಯಂತ ತೆಳ್ಳಗಿದ್ದರೂ ಅವರ ಮುಖ ಮಾತ್ರ ಸದಾ ಉಬ್ಬಿದಂತೆ ಅಥವಾ ಊದಿಕೊಂಡಂತೆ ಕಾಣುತ್ತಿತ್ತು. ಇದನ್ನು ಕಂಡ ಅನೇಕರು ಅವರು ಮುಖಕ್ಕೆ ಸರ್ಜರಿ ಮಾಡಿಸಿಕೊಂಡಿದ್ದಾರೆ ಅಥವಾ ಫಿಲ್ಲರ್ಸ್ ಹಾಕಿಸಿಕೊಂಡಿದ್ದಾರೆ ಎಂದು ಟೀಕೆ ಮಾಡುತ್ತಿದ್ದರು. ಆದರೆ ಈ ಊತಕ್ಕೆ ಅಸಲಿ ಕಾರಣ ಸರ್ಜರಿಯಲ್ಲ ಬದಲಾಗಿ ಅವರ ಅನಾರೋಗ್ಯಕರ ಜೀವನಶೈಲಿ ಮತ್ತು ಅಲರ್ಜಿಗಳಾಗಿದ್ದವು. ದೇಹಕ್ಕೆ ಸರಿಯಾದ ಪೋಷಕಾಂಶ ಸಿಗದಿದ್ದಾಗ ಉಂಟಾದ ಇನ್ ಫ್ಲಮೇಷನ್ ನಿಂದಾಗಿ ಅವರ ಮುಖದ ಸೌಂದರ್ಯ ಹಾಳಾಗಿತ್ತು.
ಈ ಕರಾಳ ಹಂತದಿಂದ ಹೊರಬರಲು ಉರ್ಫಿ ಅವರಿಗೆ ಸಹಾಯ ಮಾಡಿದ್ದು ವೇಯ್ಟ್ ಟ್ರೈನಿಂಗ್ ಅಂದರೆ ತೂಕ ಎತ್ತುವ ವ್ಯಾಯಾಮ. ನಿಯಮಿತವಾಗಿ ಜಿಮ್ ಅಭ್ಯಾಸ ಮತ್ತು ಸರಿಯಾದ ಆಹಾರ ಪದ್ಧತಿಯನ್ನು ಅಳವಡಿಸಿಕೊಂಡ ನಂತರ ಅವರ ಆರೋಗ್ಯ ಸುಧಾರಿಸಿದೆ. ಈಗ ಅವರು ದೈಹಿಕವಾಗಿ ಬಲಿಷ್ಠರಾಗಿರುವುದು ಮಾತ್ರವಲ್ಲದೆ ಮಾನಸಿಕವಾಗಿಯೂ ನೆಮ್ಮದಿಯಾಗಿದ್ದಾರೆ. ಕೇವಲ ತೆಳ್ಳಗಿರುವುದೇ ಸೌಂದರ್ಯವಲ್ಲ ಆರೋಗ್ಯವಾಗಿರುವುದು ಮುಖ್ಯ ಎಂಬ ಸಂದೇಶವನ್ನು ಉರ್ಫಿ ಈ ಮೂಲಕ ಸಾರಿದ್ದಾರೆ.
