ಸಾಮಾಜಿಕ ಜಾಲತಾಣದಲ್ಲಿ ಸಖತ್​ ಸೌಂಡ್​ ಮಾಡ್ತಿದೆ ಯುವ ಕ್ರಿಕೆಟಿಗ ಮೊಹಮ್ಮದ್​​ ಅಜರುದ್ದೀನ್​ ಡ್ರೀಮ್ ಲಿಸ್ಟ್..!

ಟೀಂ ಇಂಡಿಯಾ ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹ್ವಾಗ್​ ಕೂಡ ಟ್ವಿಟರ್​ನಲ್ಲಿ ಅಜರುದ್ದೀನ್​​ ಇನ್ನಿಂಗ್ಸ್​ ಪ್ರದರ್ಶನ ನೋಡಿ ಸಂತಸ ವ್ಯಕ್ತಪಡಿಸಿದ್ದಾರೆ. ಬುಧವಾರ ನಡೆದ ಪಂದ್ಯದಲ್ಲಿ 197 ರನ್​ಗಳ ಕಠಿಣ ಗುರಿಯನ್ನ ಬೆನ್ನಟ್ಟಿದ ಅಜರುದ್ದೀನ್​ 10 ಸಿಕ್ಸ್ ಹಾಗೂ 9 ಬೌಂಡರಿಗಳನ್ನ ಬಾರಿಸಿದ್ದಾರೆ. 54 ಎಸೆತಗಳಲ್ಲಿ 137 ರನ್​ಗಳನ್ನ ಗಳಿಸಿ ಅಜೇಯರಾಗಿ ಉಳಿದಿದ್ದಾರೆ. ಕೇವಲ 17 ಓವರ್​ಗಳಲ್ಲಿ ಕೇರಳ ತಂಡ ಗೆಲವು ಸಾಧಿಸುವಂತೆ ಮಾಡುವಲ್ಲಿ ಅಜರುದ್ದೀನ್​ ಪಾತ್ರ ಮಹತ್ವದಾಗಿತ್ತು.

ಸೈಯದ್​ ಮುಷ್ತಾಕ್​ ಅಲಿ ಟ್ರೋಫಿ ಇತಿಹಾಸದಲ್ಲೇ ಅಜರುದ್ದೀನ್​ ಎರಡನೇ ಅತಿ ವೇಗದ ಶತಕ ಗಳಿಸಿದ ಆಟಗಾರ ಎಂಬ ಕೀರ್ತಿಗೆ ಪಾತ್ರರಾಗಿದ್ದಾರೆ. 2018ರಲ್ಲಿ ರಿಷಭ್​ ಪಂತ್​​ 32 ಎಸೆತಗಳಲ್ಲಿ ಶತಕ ಸಿಡಿಸುವ ಮೂಲಕ ಸಾಧನೆ ಮಾಡಿದ್ದರು.

ಇನ್ನು ವಾಂಖೆಡೆ ಕ್ರೀಡಾಂಗಣದಲ್ಲಿ ಅಜರುದ್ದೀನ್​ ಸಾಧನೆ ಕಂಡ ಸ್ಥಳೀಯ ನ್ಯೂಸ್​ ಚಾನೆಲ್​ ವೊಂದು ಕಾಸರಗೋಡಿನಲ್ಲಿರುವ ಪ್ರತಿಭಾವಂತ ಕ್ರಿಕೆಟಿಗನ ನಿವಾಸಕ್ಕೆ ಭೇಟಿ ನೀಡಿ ಸಂದರ್ಶನ ನಡೆಸಿತು. ಸಂದರ್ಶನದ ವೇಳೆ ಅಜರುದ್ದೀನ್​ ತಮ್ಮ ಗುರಿಗಳ ಲಿಸ್ಟ್​ ಬರೆದು ಅಂಟಿಸಿದ್ದ ಚೀಟಿಯೊಂದು ಮಾಧ್ಯಮದ ಕಣ್ಣಿಗೆ ಬಿದ್ದಿದೆ. ಈ ಲಿಸ್ಟ್​ನಲ್ಲಿ ಅಜರುದ್ದೀನ್​ ಐಪಿಲ್​, ರಣಜಿ ಪಂದ್ಯದಲ್ಲಿ ನಾಲ್ಕು ಶತಕ, ಸ್ವಂತ ಮನೆ, ಬೆಂಜ್​ ಕಾರು ಹಾಗೂ 2023ರಲ್ಲಿ ವಿಶ್ವಕಪ್​ ಪಂದ್ಯದ ಟೀಂ ಇಂಡಿಯಾ ತಂಡದಲ್ಲಿ ಭಾಗಿಯಾಗುವ ಕನಸನ್ನ ಹೊಂದಿದ್ದಾರೆ. ಅಜರುದ್ದೀನ್​ ಕನಸಿನ ಲಿಸ್ಟ್ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಸಖತ್​ ವೈರಲ್​ ಆಗ್ತಿದೆ .