ಸಾಮಾಜಿಕ ಜಾಲತಾಣಗಳಲ್ಲಿ ‘ಲೈಕ್ಸ್’ ಮತ್ತು ‘ವ್ಯೂಸ್’ ಗಳಿಸುವ ಹುಚ್ಚು ಇತ್ತೀಚಿನ ಯುವಜನತೆಯನ್ನು ಎಂತಹ ಅಪಾಯಕ್ಕೂ ತಳ್ಳುತ್ತಿದೆ ಎಂಬುದಕ್ಕೆ ಚೆನ್ನೈನಲ್ಲಿ ನಡೆದ ಈ ಘಟನೆಯೇ ಸಾಕ್ಷಿ. ಸುಮಾರು 60 ಅಡಿ ಎತ್ತರದ ಮೇಲ್ಸೇತುವೆಯ (Flyover) ಮೇಲಿಂದ ಕೇಬಲ್ ವೈರ್ ಸಹಾಯದಿಂದ ಜಾರಲು ಹೋಗಿ ಯುವಕನೊಬ್ಬ ಕೆಳಕ್ಕೆ ಬಿದ್ದಿರುವ ಭೀಕರ ವಿಡಿಯೋ ಈಗ ವೈರಲ್ ಆಗಿದೆ.
ನಡುರಸ್ತೆಯಲ್ಲಿ ನಡೆದಿದ್ದೇನು? ವೈರಲ್ ಆಗಿರುವ ವಿಡಿಯೋದಲ್ಲಿ, ಯುವಕನೊಬ್ಬ ಫ್ಲೈಓವರ್‌ನ ಮೇಲ್ಭಾಗಕ್ಕೆ ಅಳವಡಿಸಲಾಗಿದ್ದ ತೆಳುವಾದ ಕೇಬಲ್ ವೈರ್ ಹಿಡಿದುಕೊಂಡು ಕೆಳಕ್ಕೆ ಜಾರಲು ಪ್ರಯತ್ನಿಸುತ್ತಾನೆ. ಅರ್ಧ ಹಾದಿ ತಲುಪುವಷ್ಟರಲ್ಲಿ ಆ ಕೇಬಲ್ ವೈರ್ ದಿಢೀರನೆ ತುಂಡಾಗುತ್ತದೆ. ಇದರಿಂದ ನಿಯಂತ್ರಣ ತಪ್ಪಿದ ಯುವಕ ನೇರವಾಗಿ 60 ಅಡಿ ಎತ್ತರದಿಂದ ಕೆಳಗಿನ ರಸ್ತೆಗೆ ಬಿದ್ದಿದ್ದಾನೆ.
ಪೊಲೀಸ್ ವಶಕ್ಕೆ ಸ್ಟಂಟ್ ವೀರ ಕೆಳಕ್ಕೆ ಬಿದ್ದ ರಭಸಕ್ಕೆ ಯುವಕನಿಗೆ ತೀವ್ರ ಪೆಟ್ಟಾಗಿದ್ದು, ಆತ ನೋವಿನಿಂದ ಕುಂಟುತ್ತಾ ನಡೆಯಲು ಪ್ರಯತ್ನಿಸುವುದು ವಿಡಿಯೋದಲ್ಲಿ ಕಂಡುಬಂದಿದೆ. ಘಟನಾ ಸ್ಥಳಕ್ಕೆ ತಕ್ಷಣವೇ ಆಗಮಿಸಿದ ಪೊಲೀಸರು ಆತನನ್ನು ಸುತ್ತುವರೆದು ವಶಕ್ಕೆ ಪಡೆದಿದ್ದಾರೆ. ಈ ಅಪಾಯಕಾರಿ ಕೃತ್ಯದಿಂದ ಸಾರ್ವಜನಿಕರಿಗೂ ತೊಂದರೆಯಾಗಿದ್ದು, ಪೊಲೀಸರು ಆತನ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಯುವಕನ ಗುರುತು ಮತ್ತು ಆತನ ಪ್ರಸ್ತುತ ಆರೋಗ್ಯ ಸ್ಥಿತಿಯ ಬಗ್ಗೆ ಹೆಚ್ಚಿನ ಮಾಹಿತಿ ಇನ್ನು ಲಭ್ಯವಾಗಬೇಕಿದೆ.
ಉತ್ತರ ಪ್ರದೇಶದಲ್ಲೂ ಇಂತಹದ್ದೇ ಹುಚ್ಚಾಟ ಇದೇ ವೇಳೆ ಉತ್ತರ ಪ್ರದೇಶದ ಹಾಪುರ್ ಎಂಬಲ್ಲಿಯೂ ಇಂತಹದ್ದೇ ಒಂದು ವಿಡಿಯೋ ವೈರಲ್ ಆಗಿದೆ. ಅಲ್ಲಿ ವ್ಯಕ್ತಿಯೊಬ್ಬ ಬಿಜಿಯಾದ ರಾಷ್ಟ್ರೀಯ ಹೆದ್ದಾರಿಯ ಮೇಲಿರುವ ರೈಲ್ವೆ ಸೇತುವೆಗೆ ನೇತಾಡಿಕೊಂಡು ‘ಚಿನ್-ಅಪ್ಸ್’ (Chin-ups) ವ್ಯಾಯಾಮ ಮಾಡುತ್ತಿರುವುದು ಕಂಡುಬಂದಿದೆ. ಇಂತಹ ಪ್ರಾಣಾಪಾಯ ತಂದೊಡ್ಡುವ ಸ್ಟಂಟ್‌ಗಳ ಬಗ್ಗೆ ಪೊಲೀಸ್ ಇಲಾಖೆ ತೀವ್ರ ಎಚ್ಚರಿಕೆ ನೀಡಿದೆ.
