ಬೆಂಗಳೂರು: ಸಾಮಾನ್ಯ ಮನುಷ್ಯನ ಪಾಲಿಗೆ ಇಡ್ಲಿ ಎಂದರೆ ಅತ್ಯಂತ ಅಗ್ಗದ ಮತ್ತು ಪೌಷ್ಟಿಕ ಆಹಾರ. ರಸ್ತೆ ಬದಿಯ ಅಂಗಡಿಗಳಲ್ಲಿ ₹30ಕ್ಕೆ ಹೊಟ್ಟೆ ತುಂಬುವ ಇಡ್ಲಿ, ಸ್ಟಾರ್ ಹೋಟೆಲ್ಗಳಲ್ಲಿ ದುಬಾರಿ ಎಂಬುದು ನಮಗೆ ಗೊತ್ತು. ಆದರೆ ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ (KIA) ಇಡ್ಲಿ ಬೆಲೆ ಕೇಳಿದರೆ ನೀವು ಹೌಹಾರಿ ಹೋಗುವುದು ಗ್ಯಾರಂಟಿ
ಪ್ರಖ್ಯಾತ ರಾಮೇಶ್ವರಂ ಕೆಫೆಯ ವಿಮಾನ ನಿಲ್ದಾಣದ ಔಟ್ಲೆಟ್ನಲ್ಲಿ ಒಂದು ಪ್ಲೇಟ್ ಘೀ ಪೋಡಿ ಇಡ್ಲಿಗೆ ಬರೋಬ್ಬರಿ ₹315 (ಟ್ಯಾಕ್ಸ್ ಸೇರಿ) ವಿಧಿಸಿರುವುದು ಈಗ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಏನಿದು ವಿವಾದ?
ರೆಡ್ಡಿಟ್ನಲ್ಲಿ ಪ್ರಯಾಣಿಕರೊಬ್ಬರು ಹಂಚಿಕೊಂಡ ಬಿಲ್ ಈಗ ವೈರಲ್ ಆಗಿದೆ. ನಗರದ ಇತರ ಕಡೆಗಳಲ್ಲಿ ಸುಮಾರು ₹90ರ ಆಸುಪಾಸಿನಲ್ಲಿ ಸಿಗುವ ಅದೇ ಇಡ್ಲಿಗೆ ವಿಮಾನ ನಿಲ್ದಾಣದಲ್ಲಿ 4 ಪಟ್ಟು ಹೆಚ್ಚು ಬೆಲೆ ವಸೂಲಿ ಮಾಡಲಾಗುತ್ತಿದೆ ಎಂಬುದು ಗ್ರಾಹಕರ ಆಕ್ರೋಶಕ್ಕೆ ಕಾರಣ.ಏರ್ ಪೋರ್ಟ್ ಒಳಗೆ ಹೋದ ಕೂಡಲೇ ಇಡ್ಲಿ ಚಿನ್ನದ ಬೆಲೆ ಆಗುತ್ತದೆಯೇ? ಎಂದು ನೆಟ್ಟಿಗರು ಪ್ರಶ್ನಿಸುತ್ತಿದ್ದಾರೆ.
https://www.instagram.com/p/DVKobYPk2_U/?utm_source=ig_web_copy_link&igsh=NTc4MTIwNjQ2YQ==
ಜಾಲತಾಣದಲ್ಲಿ:ಪರ-ವಿರೋಧದ ಅಲೆ
ಈ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ಜನರನ್ನು ಎರಡು ಗುಂಪುಗಳಾಗಿ ವಿಭಜಿಸಿದೆ:
ಇದು ಮೋಸ ಎನ್ನುವವರ ವಾದ: ಹಸಿವು ಎಲ್ಲರಿಗೂ ಒಂದೇ. ವಿಮಾನ ನಿಲ್ದಾಣಕ್ಕೆ ಹೋಗುವವರೆಲ್ಲರೂ ಶ್ರೀಮಂತರಲ್ಲ. ಸಾಮಾನ್ಯ ಆಹಾರದ ಮೇಲೆ ಇಷ್ಟು ದೊಡ್ಡ ಮಟ್ಟದ ಬೆಲೆ ಏರಿಕೆ ಮಾಡುವುದು ಅಮಾನವೀಯ. ಇದರ ಮೇಲೆ ಅಧಿಕಾರಿಗಳ ನಿಯಂತ್ರಣವಿಲ್ಲವೇ? ಎಂಬುದು ಇವರ ಪ್ರಶ್ನೆ.
ಅನಿವಾರ್ಯ ಎನ್ನುವವರ ವಾದ: ಏರ್ ಪೋರ್ಟ್ನಲ್ಲಿ ಮಳಿಗೆಗಳ ಬಾಡಿಗೆ ಲಕ್ಷಾಂತರ ರೂಪಾಯಿ ಇರುತ್ತದೆ. ಅಲ್ಲಿ 24/7 ಸರ್ವಿಸ್ ನೀಡಬೇಕು, ಸಾಮಗ್ರಿಗಳ ಸಾಗಾಟಕ್ಕೆ ಕಟ್ಟುನಿಟ್ಟಿನ ಭದ್ರತಾ ತಪಾಸಣೆ ಇರುತ್ತದೆ. ಈ ಎಲ್ಲಾ ನಿರ್ವಹಣಾ ವೆಚ್ಚಗಳು ಗ್ರಾಹಕರ ಬಿಲ್ ಮೇಲೆ ಬೀಳುವುದು ಸಹಜ ಎನ್ನುತ್ತಿದ್ದಾರೆ ಉದ್ಯಮದ ಪರ ಇರುವವರು.
ಇಡ್ಲಿ ಮಹಾತ್ಮೆ ಮತ್ತು ಇಂದಿನ ವಾಸ್ತವ
ಸೌತ್ ಇಂಡಿಯನ್ ಫೇಮಸ್ ಬ್ರೇಕ್ಫಾಸ್ಟ್ ಇಡ್ಲಿಯಲ್ಲಿ ರವಾ, ರಾಗಿ, ಓಟ್ಸ್ ಹೀಗೆ ನೂರಾರು ವೆರೈಟಿಗಳಿವೆ. ಎಲ್ಲೇ ಹೋದರೂ ₹80 ಮೀರದ ಈ ತಿಂಡಿ, ವಿಮಾನ ನಿಲ್ದಾಣದಲ್ಲಿ ₹300 ದಾಟಿರುವುದು ಸಾಮಾನ್ಯ ಪ್ರಯಾಣಿಕರಿಗೆ ನುಂಗಲಾರದ ತುತ್ತಾಗಿದೆ.
ಒಟ್ಟಿನಲ್ಲಿ, ವಿಮಾನದಲ್ಲಿ ಹಾರುವವರಿಗೆ ಇದು ದೊಡ್ಡ ಮೊತ್ತವಲ್ಲ ಎನ್ನುವ ಒಂದು ವರ್ಗವಿದ್ದರೆ, ಮಧ್ಯಮ ವರ್ಗದ ಪ್ರಯಾಣಿಕರಿಗೆ ಇದು ಹಗಲು ಲೂಟಿ ಎನ್ನುವ ಮತ್ತೊಂದು ವರ್ಗದ ನಡುವೆ ಇಡ್ಲಿ ಬೆಲೆಯ ಚರ್ಚೆ ಮಾತ್ರ ಜೋರಾಗಿ ನಡೆಯುತ್ತಿದೆ.
