ಭಾರತೀಯ ಮನೆಗಳಲ್ಲಿ ಕಢಿ ಅತ್ಯಂತ ಜನಪ್ರಿಯ ಹಾಗೂ ಆರಾಮದಾಯಕ ಆಹಾರವಾಗಿದೆ. ದೇಶದ ವಿವಿಧ ಭಾಗಗಳಲ್ಲಿ ಇದನ್ನು ಬೇರೆ ಬೇರೆ ಶೈಲಿಯಲ್ಲಿ ತಯಾರಿಸಲಾಗುತ್ತದೆ. ಇವುಗಳಲ್ಲಿ ಪಂಜಾಬಿ ಶೈಲಿಯ ಕಢಿ ತನ್ನ ಅದ್ಭುತ ರುಚಿ ಮತ್ತು ಅದರಲ್ಲಿ ಬಳಸುವ ಗರಿಗರಿಯಾದ ಪಕೋಡಗಳಿಂದಾಗಿ ಎಲ್ಲರ ನೆಚ್ಚಿನ ಅಡುಗೆಯಾಗಿದೆ. ಆದರೆ ಸಾಂಪ್ರದಾಯಿಕ ಪಂಜಾಬಿ ಕಢಿ ಮಾಡುವುದು ಅಷ್ಟು ಸುಲಭವಲ್ಲ. ಮಜ್ಜಿಗೆ ಮತ್ತು ಕಡಲೆಹಿಟ್ಟಿನ ಮಿಶ್ರಣವನ್ನು ನಿಧಾನವಾಗಿ ಕುದಿಸಬೇಕು, ನಂತರ ಪಕೋಡಗಳನ್ನು ಪ್ರತ್ಯೇಕವಾಗಿ ತಯಾರಿಸಬೇಕು ಮತ್ತು ಕೊನೆಯಲ್ಲಿ ಒಗ್ಗರಣೆ ನೀಡಬೇಕು. ಇದಕ್ಕೆ ಸಾಕಷ್ಟು ಸಮಯ ಬೇಕಾಗುತ್ತದೆ. ಒಂದು ವೇಳೆ ನಿಮಗೆ ಕಢಿ ಸವಿಯುವ ಆಸೆ ಇದ್ದು, ಪಕೋಡ ಮಾಡಲು ಸಮಯವಿಲ್ಲದಿದ್ದರೆ ಬೂಂದಿ ಕಢಿ ಅತ್ಯುತ್ತಮ ಆಯ್ಕೆಯಾಗಿದೆ. ಇದು ಸಾಂಪ್ರದಾಯಿಕ ಕಢಿಯಷ್ಟೇ ಅದ್ಭುತ ರುಚಿಯನ್ನು ಅತಿ ಕಡಿಮೆ ಸಮಯದಲ್ಲಿ ನೀಡುತ್ತದೆ.
ಬೂಂದಿ ಕಢಿಯ ವಿಶೇಷತೆ ಏನು?
ಬೂಂದಿ ಕಢಿಯ ಅತಿ ದೊಡ್ಡ ಪ್ಲಸ್ ಪಾಯಿಂಟ್ ಎಂದರೆ ಇದನ್ನು ಅತ್ಯಂತ ವೇಗವಾಗಿ ಸಿದ್ಧಪಡಿಸಬಹುದು. ಕಚೇರಿ ಕೆಲಸದ ಒತ್ತಡವಿರುವ ದಿನಗಳಲ್ಲಿ ಅಥವಾ ದಿಢೀರನೆ ಅಡುಗೆ ಮಾಡಬೇಕಾದ ಸಂದರ್ಭಗಳಲ್ಲಿ ಇದು ತುಂಬಾ ಸಹಕಾರಿಯಾಗಿದೆ. ಅಲ್ಲದೆ, ಪಕೋಡ ಇಷ್ಟಪಡದವರಿಗೆ ಅಥವಾ ಹಗುರವಾದ ಆಹಾರವನ್ನು ಬಯಸುವವರಿಗೆ ಇದು ಸೂಕ್ತವಾಗಿದೆ. ಮೊಸರು, ಕಡಲೆಹಿಟ್ಟು ಮತ್ತು ಮಾರುಕಟ್ಟೆಯಲ್ಲಿ ಸುಲಭವಾಗಿ ಸಿಗುವ ಒಣ ಬೂಂದಿಯನ್ನು ಬಳಸಿ ಇದನ್ನು ಮಾಡಬಹುದು. ಕಡಲೆಹಿಟ್ಟು ಮತ್ತು ಮೊಸರಿನ ಮಿಶ್ರಣವನ್ನು ಚೆನ್ನಾಗಿ ಬೇಯಿಸಿದ ನಂತರ, ಕೊನೆಯಲ್ಲಿ ಬೂಂದಿಯನ್ನು ಸೇರಿಸುವುದರಿಂದ ಅದು ಕಢಿಯ ರುಚಿಯನ್ನು ಹೀರಿಕೊಳ್ಳುತ್ತದೆ. ಕೊನೆಯಲ್ಲಿ ನೀಡುವ ಮಸಾಲೆಯುಕ್ತ ಒಗ್ಗರಣೆ ಇದರ ರುಚಿಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ. ಇದನ್ನು ಜೀರಾ ರೈಸ್, ಬಿಸಿ ಬಿಸಿ ಅನ್ನ ಅಥವಾ ಪರಾಟ ಜೊತೆ ಸವಿಯಬಹುದು.
ಬೇಕಾಗುವ ಪದಾರ್ಥಗಳು
- ಮೊಸರು – 100 ಗ್ರಾಂ
- ಕಡಲೆಹಿಟ್ಟು – 50 ಗ್ರಾಂ
- ಒಣ ಬೂಂದಿ – 1 ಕಪ್
- ಒಣ ಕೆಂಪು ಮೆಣಸಿನಕಾಯಿ – 2
- ಕರಿಬೇವು – 7 ರಿಂದ 8 ಎಲೆಗಳು
- ಅಚ್ಚ ಖಾರದ ಪುಡಿ – ಅರ್ಧ ಚಮಚ
- ಅರಿಶಿನ ಪುಡಿ – ಅರ್ಧ ಚಮಚ
- ಧನಿಯಾ ಪುಡಿ – 1 ಚಮಚ
- ಕಸ್ತೂರಿ ಮೇತಿ – 1 ಚಮಚ
- ಈರುಳ್ಳಿ – 1 ಸಣ್ಣದು (ಉದ್ದಕ್ಕೆ ಹೆಚ್ಚಿದ್ದು)
- ಹಸಿ ಮೆಣಸಿನಕಾಯಿ – 1 (ಹೆಚ್ಚಿದ್ದು)
- ಸಾಸಿವೆ ಎಣ್ಣೆ – 1 ದೊಡ್ಡ ಚಮಚ
- ಜಜ್ಜಿದ ಬೆಳ್ಳುಳ್ಳಿ – 1 ಚಮಚ
- ಕೊತ್ತಂಬರಿ ಸೊಪ್ಪು – ಸ್ವಲ್ಪ
- ಉಪ್ಪು – ರುಚಿಗೆ ತಕ್ಕಷ್ಟು
ತಯಾರಿಸುವ ವಿಧಾನ
ಮೊದಲಿಗೆ ಒಂದು ಪಾತ್ರೆಯಲ್ಲಿ ಮೊಸರನ್ನು ಹಾಕಿ ಚೆನ್ನಾಗಿ ಕಡಿಯಿರಿ. ನಂತರ ಅದಕ್ಕೆ ಕಡಲೆಹಿಟ್ಟನ್ನು ಸೇರಿಸಿ, ಯಾವುದೇ ಗಂಟುಗಳಿಲ್ಲದಂತೆ ನಯವಾಗಿ ಮಿಶ್ರಣ ಮಾಡಿಕೊಳ್ಳಿ.
ಈ ಮಿಶ್ರಣಕ್ಕೆ ಅಗತ್ಯವಿರುವಷ್ಟು ನೀರನ್ನು ಸೇರಿಸಿ ಚೆನ್ನಾಗಿ ಕೈಯಾಡಿಸಿ. ಮಿಶ್ರಣವು ತುಂಬಾ ದಪ್ಪವಾಗಿಯೂ ಇರಬಾರದು ಮತ್ತು ತೀರಾ ತಿಳಿಯಾಗಿಯೂ ಇರಬಾರದು.
ಈಗ ಈ ಪಾತ್ರೆಯನ್ನು ಒಲೆಯ ಮೇಲಿಟ್ಟು ಮಧ್ಯಮ ಉರಿಯಲ್ಲಿ ಬೇಯಿಸಿ. ಮಿಶ್ರಣವು ಕುದಿಯಲು ಪ್ರಾರಂಭಿಸಿದಾಗ ಉರಿಯನ್ನು ಕಡಿಮೆ ಮಾಡಿ, ಸುಮಾರು 15 ನಿಮಿಷಗಳ ಕಾಲ ಹಾಗೆಯೇ ಬಿಡಿ. ಮಿಶ್ರಣವು ಸ್ವಲ್ಪ ದಪ್ಪಗಾಗುವವರೆಗೆ ಆಗಾಗ ಕೈಯಾಡಿಸುತ್ತ ಇರಬೇಕು.
ಮಿಶ್ರಣ ಹದಕ್ಕೆ ಬಂದಾಗ ಅದಕ್ಕೆ ಒಣ ಬೂಂದಿಯನ್ನು ಸೇರಿಸಿ ಲಘುವಾಗಿ ಕೈಯಾಡಿಸಿ. ನಂತರ ಮತ್ತೊಂದು ಸಣ್ಣ ಬಾಣಲೆಯಲ್ಲಿ ಸಾಸಿವೆ ಎಣ್ಣೆಯನ್ನು ಬಿಸಿ ಮಾಡಿ. ಎಣ್ಣೆ ಕಾದ ನಂತರ ಒಣ ಕೆಂಪು ಮೆಣಸಿನಕಾಯಿ, ಕರಿಬೇವು, ಜಜ್ಜಿದ ಬೆಳ್ಳುಳ್ಳಿ, ಹೆಚ್ಚಿದ ಈರುಳ್ಳಿ ಮತ್ತು ಹಸಿ ಮೆಣಸಿನಕಾಯಿಯನ್ನು ಹಾಕಿ ಚೆನ್ನಾಗಿ ಹುರಿಯಿರಿ.
ಈರುಳ್ಳಿ ಹೊಂಬಣ್ಣಕ್ಕೆ ತಿರುಗಿದಾಗ ಅಚ್ಚ ಖಾರದ ಪುಡಿ, ಅರಿಶಿನ ಪುಡಿ, ಧನಿಯಾ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಕಸ್ತೂರಿ ಮೇತಿಯನ್ನು ಸೇರಿಸಿ ಎರಡು ನಿಮಿಷಗಳ ಕಾಲ ಮಸಾಲೆಯನ್ನು ಬೇಯಿಸಿ. ಈಗ ತಯಾರಾದ ಈ ಒಗ್ಗರಣೆಯನ್ನು ಕುದಿಯುತ್ತಿರುವ ಕಢಿಗೆ ಸುರಿದು, ಮತ್ತೆ 5 ನಿಮಿಷಗಳ ಕಾಲ ಸಣ್ಣ ಉರಿಯಲ್ಲಿ ಕುದಿಸಿ.
ಕೊನೆಯಲ್ಲಿ ಸಣ್ಣದಾಗಿ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಮೇಲಿಂದ ಉದುರಿಸಿದರೆ ಘಮಘಮಿಸುವ ಬೂಂದಿ ಕಢಿ ಸಿದ್ಧವಾಗುತ್ತದೆ. ಇದನ್ನು ಬಿಸಿ ಬಿಸಿ ಜೀರಾ ರೈಸ್ ಅಥವಾ ಮೃದುವಾದ ಪರಾಟಗಳೊಂದಿಗೆ ರಾತ್ರಿಯ ಊಟಕ್ಕೆ ಸವಿಯಲು ನೀಡಬಹುದು.
