ಇತರರ ಮಾತು, ನಿರೀಕ್ಷೆ ಹಾಗೂ ಅನಗತ್ಯ ವಿಚಾರಗಳಿಗೆ ಹೆಚ್ಚು ತಲೆಕೆಡಿಸಿಕೊಂಡರೆ ನಮ್ಮ ನೆಮ್ಮದಿಯೇ ಕಳೆದುಹೋಗಬಹುದು. ಪ್ರತಿಯೊಂದು ವಿಷಯದಲ್ಲೂ ನೇರವಾಗಿ ಸತ್ಯ ಹೇಳುವುದೇ ಉತ್ತಮ ಎಂಬುದು ಎಲ್ಲ ಸಂದರ್ಭಗಳಲ್ಲೂ ಅನ್ವಯಿಸುವುದಿಲ್ಲ. ಕೆಲವೊಮ್ಮೆ ನಮ್ಮ ಸಮಯ, ಹಣ, ವೈಯಕ್ತಿಕ ಜೀವನ ಮತ್ತು ಮಾನಸಿಕ ನೆಮ್ಮದಿಯನ್ನು ಕಾಪಾಡಿಕೊಳ್ಳಲು ಕೆಲವು ವಿಷಯಗಳಲ್ಲಿ ‘ಸುಳ್ಳು’ ಹೇಳುವುದೂ ಅಗತ್ಯವಾಗಬಹುದು.
ತಲೆಮಾರುಗಳು ಬದಲಾದರೂ, ಕಾಲ ಬದಲಾದರೂ ಇಂದಿಗೂ ಬಹುತೇಕ ಜನರಿಗೆ ಪಕ್ಕದವರ ಜೀವನದ ಬಗ್ಗೆ ಇರುವ ಆಸಕ್ತಿ ತಮ್ಮ ಜೀವನದ ಮೇಲಿರುವುದಿಲ್ಲ. ಇತರರ ಜೀವನ ಎಷ್ಟು ಚೆನ್ನಾಗಿದೆ, ಅವರು ಎಷ್ಟು ಕಷ್ಟಗಳನ್ನು ಎದುರಿಸುತ್ತಿದ್ದಾರೆ, ಅವರ ವೈಯಕ್ತಿಕ ವಿಚಾರಗಳೇನು ಎಂಬುದನ್ನು ತಿಳಿದುಕೊಳ್ಳಲು ಹೆಚ್ಚಿನ ಆಸಕ್ತಿ ತೋರಿಸುತ್ತಾರೆ.
ಇನ್ನು ಕೆಲವರು ತಮ್ಮ ಆಡಂಬರವನ್ನು ತೋರಿಸಿಕೊಳ್ಳಲು ಇಲ್ಲದ ವಿಚಾರಗಳನ್ನೂ ಸುಳ್ಳು ಹೇಳುತ್ತಿರುತ್ತಾರೆ. ಆದರೆ ಇದರಿಂದ ಎದುರಾಗುವ ಪರಿಣಾಮಗಳ ಬಗ್ಗೆ ಅವರಿಗೆ ಅರಿವಿರುವುದಿಲ್ಲ. ಆದರೆ ಜೀವನವನ್ನು ನೆಮ್ಮದಿಯಾಗಿ ಕಳೆಯಬೇಕೆಂದರೆ ಈ ಐದು ಸುಳ್ಳುಗಳನ್ನು ಹೇಳುವುದನ್ನು ಕಲಿಯಲೇಬೇಕು ಎಂದು ಮನೋವಿಜ್ಞಾನ ತಜ್ಞರು ಹೇಳುತ್ತಾರೆ. ಅವು ಯಾವುವೆಂದರೆ..
1. ನನ್ನ ಬಳಿ ಹಣ ಇಲ್ಲ, ಸಾರಿ..!
ಸ್ನೇಹಿತರು ಅಥವಾ ಸಂಬಂಧಿಕರು ಯಾರಾದರೂ ಕಷ್ಟದಲ್ಲಿದ್ದಾಗ ನಿಮ್ಮ ಬಳಿ ಹಣ ಕೇಳಿದರೆ, ಇಲ್ಲ ಎಂದು ಹೇಳಲಾಗದೆ ತಕ್ಷಣ ಹಣ ನೀಡುವವರಿರುತ್ತಾರೆ. ಆದರೆ ಕೆಲವರು ಸಮಯಕ್ಕೆ ಸರಿಯಾಗಿ ಹಣ ಹಿಂದಿರುಗಿಸಿದರೆ, ಇನ್ನು ಕೆಲವರು ಹಣ ಪಡೆಯುವ ಮೊದಲು ಒಂದು ರೀತಿಯಲ್ಲಿ, ಅಗತ್ಯ ಮುಗಿದ ಬಳಿಕ ಮತ್ತೊಂದು ರೀತಿಯಲ್ಲಿ ವರ್ತಿಸುತ್ತಾರೆ.
ಇದರಿಂದ ಹಣ ನೀಡಿದವರ ಪರಿಸ್ಥಿತಿ ಕಷ್ಟಕರವಾಗುತ್ತದೆ. ಸಾಲ ನೀಡಿದ ಹಣವನ್ನು ವಾಪಸ್ ಪಡೆಯಲು ಸಾಕಷ್ಟು ತೊಂದರೆ ಅನುಭವಿಸಬೇಕಾಗುತ್ತದೆ. ಹೀಗಾಗಿ ಸಾಲ ನೀಡಿ ನಂತರ ಹಣ ವಾಪಸ್ ಪಡೆಯುವುದು, ಜಗಳ ಮುಂತಾದ ಅನಗತ್ಯ ತಲೆನೋವುಗಳನ್ನು ತಪ್ಪಿಸಿ ನೆಮ್ಮದಿಯಾಗಿರಬೇಕೆಂದರೆ, ‘ಸಾರಿ, ನನ್ನ ಬಳಿ ಹಣ ಇಲ್ಲ’ ಎಂದು ಹೇಳುವುದು ಉತ್ತಮ. ಎದುರಿನ ವ್ಯಕ್ತಿಯ ಸ್ವಭಾವವನ್ನು ಆಧರಿಸಿ ಹಣ ನೀಡಬೇಕೋ ಬೇಡವೋ ಎಂಬ ನಿರ್ಧಾರ ತೆಗೆದುಕೊಳ್ಳಿ.
2. ನೀನು ಸೂಪರ್ ಆಗಿ ಕಾಣುತ್ತಿದ್ದೀಯಾ..!
ಯಾರಾದರೂ ತಮಗೆ ಇಷ್ಟವಾದ ಬಟ್ಟೆ ಧರಿಸಿ, ‘ಹೇಗಿದ್ದೀನಿ?’ ಎಂದು ನಿಮ್ಮನ್ನು ಕೇಳಿದಾಗ ಅದು ನಿಮಗೆ ಇಷ್ಟವಾಗದಿದ್ದರೆ ಮುಖದ ಮೇಲೆಯೇ ‘ಚೆನ್ನಾಗಿಲ್ಲ’ ಎಂದು ಹೇಳುವ ಅಭ್ಯಾಸವಿದ್ದರೆ ಅದನ್ನು ಬದಲಿಸಿಕೊಳ್ಳಿ.
ನಿಜ ಹೇಳಿ ಅವರ ಮನಸ್ಸಿಗೆ ನೋವುಂಟು ಮಾಡುವುದಕ್ಕಿಂತ, ಸಣ್ಣದೊಂದು ಸುಳ್ಳು ಹೇಳಿ ಅವರನ್ನು ಸಂತೋಷಪಡಿಸುವುದು ಉತ್ತಮ.
3. ಬ್ಯುಸಿಯಾಗಿದ್ದೇನೆ, ಬರಲು ಆಗುವುದಿಲ್ಲ..!
ಕೆಲವರು ಯಾವುದೇ ಕೆಲಸವಿಲ್ಲದಿದ್ದಾಗ ಅಥವಾ ಸಮಯ ಕಳೆಯಲು ನಿಮ್ಮನ್ನು ಫೋನ್ ಮಾಡಿ ಎಲ್ಲಿಗಾದರೂ ಬರಲು ಹೇಳಿದರೆ ತಕ್ಷಣ ಓಡಿಹೋಗಬೇಡಿ. ಹೀಗೆ ಮಾಡುವುದರಿಂದ ಅವರ ದೃಷ್ಟಿಯಲ್ಲಿ ನಿಮ್ಮ ಮೌಲ್ಯ ಕಡಿಮೆಯಾಗಬಹುದು.
ಅವರು ಯಾವಾಗ ಕರೆದರೂ ನೀವು ಬರುತ್ತೀರಿ, ನಿಮಗೆ ಯಾವಾಗಲೂ ಖಾಲಿ ಸಮಯ ಇರುತ್ತದೆ ಎಂಬ ಅಭಿಪ್ರಾಯ ಅವರಲ್ಲಿ ಮೂಡಬಹುದು. ಆದ್ದರಿಂದ ಯಾರಾದರೂ ಕರೆದ ತಕ್ಷಣ ಹೋಗುವ ಬದಲು, ‘ನಾನು ಬ್ಯುಸಿಯಾಗಿದ್ದೇನೆ, ಬರಲು ಆಗುವುದಿಲ್ಲ’ ಎಂದು ಹೇಳಿಬಿಡಿ. ಎಲ್ಲರಿಗೂ ಸಮಯ ನೀಡುತ್ತಾ ಹೋದರೆ, ನಿಮ್ಮ ಜೀವನಕ್ಕಾಗಿ ನಿಮಗೆ ಸಮಯವೇ ಉಳಿಯುವುದಿಲ್ಲ ಎಂಬುದನ್ನು ನೆನಪಿನಲ್ಲಿಡಿ.
4. ಇನ್ನೂ ಯಾವುದೇ ಪ್ಲಾನ್ ಮಾಡಿಲ್ಲ..!
ಕೆಲವರು ತಮ್ಮ ಕುತೂಹಲವನ್ನು ತಡೆಯಲಾಗದೆ ತಮ್ಮ ಜೀವನದಲ್ಲಿ ನಡೆದ ವಿಚಾರಗಳು, ಭವಿಷ್ಯದ ಯೋಜನೆಗಳು ಹಾಗೂ ಪ್ಲಾನ್ಗಳನ್ನು ಎಲ್ಲರೊಂದಿಗೂ ಹಂಚಿಕೊಳ್ಳುತ್ತಾರೆ. ಆದರೆ ಹೀಗೆ ಮಾಡುವುದು ಸರಿಯಲ್ಲ.
ಯಾರಾದರೂ ನಿಮ್ಮ ಭವಿಷ್ಯದ ಯೋಜನೆಗಳ ಬಗ್ಗೆ ಕೇಳಿದರೆ, ‘ಇನ್ನೂ ಏನೂ ಪ್ಲಾನ್ ಮಾಡಿಲ್ಲ’ ಎಂದು ಹೇಳುವುದು ಉತ್ತಮ. ನಿಮ್ಮ ವೈಯಕ್ತಿಕ ವಿಚಾರಗಳು ಮತ್ತು ಭವಿಷ್ಯದ ಯೋಜನೆಗಳನ್ನು ಎಲ್ಲರಿಗೂ ಹೇಳಿಕೊಂಡರೆ, ಅವರು ನಿಮ್ಮನ್ನು ನೆಮ್ಮದಿಯಾಗಿ ಕೆಲಸ ಮಾಡಲು ಬಿಡದೇ ಇರಬಹುದು.
5. ನನಗೆ ಆ ವಿಷಯ ಗೊತ್ತಿಲ್ಲ..!
ಮನೆಯಲ್ಲಾಗಲಿ, ಹೊರಗಾಗಲಿ ಅಥವಾ ಕೆಲಸ ಮಾಡುವ ಸ್ಥಳದಲ್ಲಾಗಲಿ, ಇತರರ ವಿಚಾರಗಳಲ್ಲಿ ಅನಗತ್ಯವಾಗಿ ಮೂಗು ತೂರಿಸದೆ ನಿಮ್ಮ ಕೆಲಸವನ್ನು ನೀವು ಮಾಡಿಕೊಂಡು ಹೋಗುವುದು ಉತ್ತಮ.
ನಿಮಗೆ ಸಂಬಂಧವಿಲ್ಲದ ವಿಚಾರಗಳು ಅಥವಾ ನಿಮ್ಮನ್ನು ಪ್ರಚೋದಿಸುವ ವಿಷಯಗಳಲ್ಲಿ ತಲೆ ಹಾಕಬೇಡಿ. ಯಾರಾದರೂ ಯಾವುದಾದರೂ ಜಗಳದ ಬಗ್ಗೆ ಕೇಳಿದಾಗ ನಿಮಗೆ ವಿಷಯ ತಿಳಿದಿದ್ದರೂ, ‘ನನಗೆ ಗೊತ್ತಿಲ್ಲ’ ಎಂದು ಹೇಳಿ ಆ ವಿಚಾರದಿಂದ ದೂರ ಸರಿಯುವುದು ಉತ್ತಮ.
ನೆಮ್ಮದಿಯ ಜೀವನಕ್ಕಾಗಿ ಈ ಐದು ಸೂತ್ರಗಳನ್ನು (ಸುಳ್ಳುಗಳನ್ನು) ಪಾಲಿಸುವುದು ಅಗತ್ಯ ಎಂದು ತಜ್ಞರು ಹೇಳುತ್ತಾರೆ.
