ಬೆಳಗ್ಗೆ ಮಕ್ಕಳನ್ನು ಶಾಲೆಗೆ ಕಳುಹಿಸುವಾಗ, ಕಚೇರಿಗೆ ಹೋಗುವಾಗ ಅಥವಾ ಸಂಜೆ ವಾಕಿಂಗ್‌ಗೆ ತೆರಳುವಾಗ ಸುತ್ತಮುತ್ತಲಿನ ಗಾಳಿಯ ಗುಣಮಟ್ಟದ ಬಗ್ಗೆ ಎಂದಾದರೂ ಯೋಚಿಸಿದ್ದೀರಾ? ನಾವು ಉಸಿರಾಡುವ ಗಾಳಿ ಶುದ್ಧವಾಗಿದೆಯೇ ಅಥವಾ ಮಾಲಿನ್ಯದಿಂದ ಕೂಡಿದೆಯೇ ಎಂಬುದನ್ನು ತಿಳಿದುಕೊಳ್ಳುವುದು ಈಗಿನ ದಿನಗಳಲ್ಲಿ ಅತ್ಯಂತ ಅಗತ್ಯವಾಗಿದೆ.
ವಿಶೇಷವಾಗಿ ಮಕ್ಕಳು, ವೃದ್ಧರು ಮತ್ತು ಉಸಿರಾಟದ ಸಮಸ್ಯೆ ಇರುವವರು ವಾಯುಮಾಲಿನ್ಯದ ಬಗ್ಗೆ ಹೆಚ್ಚು ಜಾಗರೂಕರಾಗಿರಬೇಕು. ಆದರೆ ಬಹುತೇಕರು ಟಿವಿ ಅಥವಾ ಮೊಬೈಲ್‌ನಲ್ಲಿ ನಗರದ ಒಟ್ಟಾರೆ ವಾಯು ಗುಣಮಟ್ಟ ಸೂಚ್ಯಂಕ (AQI) ನೋಡಿ ಸುಮ್ಮನಾಗುತ್ತಾರೆ. ವಾಸ್ತವದಲ್ಲಿ ನಿಮ್ಮ ಮನೆಯ ಸುತ್ತಲಿನ ಗಾಳಿ ಮತ್ತು ನಗರದ ಮತ್ತೊಂದು ಪ್ರದೇಶದ ಗಾಳಿಯ ಗುಣಮಟ್ಟ ಒಂದೇ ಆಗಿರುವುದಿಲ್ಲ.
ಉದಾಹರಣೆಗೆ, ಮುಂಬೈನಲ್ಲಿ ಇತ್ತೀಚೆಗೆ CPCBಯ Sameer ಆ್ಯಪ್‌ನಲ್ಲಿ ವರ್ಲಿಯಲ್ಲಿ 169, ಮಜಗಾಂವ್‌ನಲ್ಲಿ 143 ಮತ್ತು ಭಾಂಡುಪ್‌ನಲ್ಲಿ 125 AQI ದಾಖಲಾಗಿತ್ತು. ಅಂದರೆ ಒಂದೇ ನಗರದಲ್ಲಿದ್ದರೂ ಪ್ರದೇಶದಿಂದ ಪ್ರದೇಶಕ್ಕೆ ಮಾಲಿನ್ಯದ ಪ್ರಮಾಣ ಬದಲಾಗಬಹುದು.
ಹಾಗಾದರೆ ನಿಮ್ಮ ಮನೆ, ಕಚೇರಿ ಅಥವಾ ಮಕ್ಕಳ ಶಾಲೆಯ ಸುತ್ತಲಿನ ಗಾಳಿ ಎಷ್ಟು ಶುದ್ಧವಾಗಿದೆ ಎಂಬುದನ್ನು ತಿಳಿದುಕೊಳ್ಳುವುದು ಹೇಗೆ? ಇದಕ್ಕಾಗಿ ದುಬಾರಿ ಉಪಕರಣಗಳ ಅಗತ್ಯವಿಲ್ಲ. ನಿಮ್ಮ ಮೊಬೈಲ್‌ನಲ್ಲೇ ಐದು ಸರಳ ಮಾರ್ಗಗಳ ಮೂಲಕ AQI ಪರಿಶೀಲಿಸಬಹುದು.
1. Sameer ಆ್ಯಪ್ ಮೂಲಕ ತಕ್ಷಣ ಮಾಹಿತಿ ಪಡೆಯಿರಿ
ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (CPCB) ಬಿಡುಗಡೆ ಮಾಡಿರುವ Sameer ಆ್ಯಪ್ ವಾಯು ಗುಣಮಟ್ಟ ತಿಳಿದುಕೊಳ್ಳಲು ಸಹಾಯಕವಾಗಿದೆ.
-
ಪ್ರತಿ ಗಂಟೆಗೊಮ್ಮೆ ರಾಷ್ಟ್ರೀಯ AQI ಮಾಹಿತಿ ಅಪ್‌ಡೇಟ್ ಆಗುತ್ತದೆ.
-
ಹತ್ತಿರದ ವಾಯು ಗುಣಮಟ್ಟ ಮಾಪನ ಕೇಂದ್ರಗಳ ವಿವರ ಲಭ್ಯ.
-
ಸ್ಥಳದ ಆಧಾರದ ಮೇಲೆ ಮಾಲಿನ್ಯ ಮಟ್ಟ ಪರಿಶೀಲಿಸಬಹುದು.
-
AQI ಕ್ಯಾಲೆಂಡರ್ ಮತ್ತು ವೈಯಕ್ತಿಕ ಎಚ್ಚರಿಕೆಗಳ ಸೌಲಭ್ಯವಿದೆ.
ನಿಮ್ಮ ಮನೆಯ ಸ್ಥಳವನ್ನು ಮಾತ್ರವಲ್ಲದೆ ಮಕ್ಕಳ ಶಾಲೆ ಅಥವಾ ಕಚೇರಿ ಇರುವ ಪ್ರದೇಶದ ಹೆಸರನ್ನೂ ನಮೂದಿಸಿ ಅಲ್ಲಿನ AQI ತಿಳಿದುಕೊಳ್ಳಬಹುದು.
2. CPCB ವೆಬ್‌ಸೈಟ್‌ನಲ್ಲಿ ಪರಿಶೀಲಿಸಿ
CPCB ಅಧಿಕೃತ ವೆಬ್‌ಸೈಟ್‌ನಲ್ಲಿ ದೇಶದ ವಿವಿಧ ನಗರಗಳ ವಾಯು ಗುಣಮಟ್ಟ ಮಾಪನ ಕೇಂದ್ರಗಳ ಮಾಹಿತಿಯನ್ನು ಪಡೆಯಬಹುದು.
ಇಲ್ಲಿ AQI ಜೊತೆಗೆ PM2.5 ಮತ್ತು PM10 ಮಾಲಿನ್ಯಕಾರಕಗಳ ಪ್ರಮಾಣವನ್ನೂ ಪರಿಶೀಲಿಸಬಹುದು. ಇದರಿಂದ ನಿಮ್ಮ ಪ್ರದೇಶದಲ್ಲಿ ಗಾಳಿಯ ಗುಣಮಟ್ಟ ಹದಗೆಡಲು ಯಾವ ಮಾಲಿನ್ಯಕಾರಕ ಕಾರಣವಾಗಿದೆ ಎಂಬುದನ್ನು ಅರ್ಥಮಾಡಿಕೊಳ್ಳಬಹುದು.
3. Google Mapsನಲ್ಲೇ AQI ನೋಡಿ
ಪ್ರತ್ಯೇಕ ಆ್ಯಪ್ ಡೌನ್‌ಲೋಡ್ ಮಾಡಲು ಇಷ್ಟವಿಲ್ಲದಿದ್ದರೆ Google Maps ಮೂಲಕವೂ ವಾಯು ಗುಣಮಟ್ಟದ ಮಾಹಿತಿ ಪಡೆಯಬಹುದು.
ಇದಕ್ಕಾಗಿ ಈ ಹಂತಗಳನ್ನು ಅನುಸರಿಸಿ:
-
ಮೊಬೈಲ್‌ನಲ್ಲಿ Google Maps ತೆರೆಯಿರಿ.
-
ಮೇಲಿರುವ Layers ಆಯ್ಕೆ ಕ್ಲಿಕ್ ಮಾಡಿ.
-
Map Details ವಿಭಾಗದಲ್ಲಿ Air Quality ಆಯ್ಕೆ ಮಾಡಿ.
-
ನಿಮಗೆ ಬೇಕಾದ ಪ್ರದೇಶವನ್ನು ಆಯ್ಕೆ ಮಾಡಿ AQI ಮಾಹಿತಿ ಪರಿಶೀಲಿಸಿ.
Google Maps ಸೆನ್ಸರ್‌ಗಳು, ಉಪಗ್ರಹ ಮಾಹಿತಿ, ಸರ್ಕಾರಿ ದತ್ತಾಂಶ ಮತ್ತು ಹವಾಮಾನ ಪರಿಸ್ಥಿತಿಗಳನ್ನು ಆಧರಿಸಿ ಸ್ಥಳೀಯ ವಾಯು ಗುಣಮಟ್ಟದ ಅಂದಾಜು ನೀಡುತ್ತದೆ.
4. SAFAR ಆ್ಯಪ್ ಬಳಸಿ
SAFAR ಆ್ಯಪ್ ಮೂಲಕವೂ ಸ್ಥಳೀಯ ವಾಯು ಗುಣಮಟ್ಟದ ಮಾಹಿತಿ ಪಡೆಯಬಹುದು. ಇದು BMC, ಮುಂಬೈ ಹವಾಮಾನ ಇಲಾಖೆ ಮತ್ತು ಪುಣೆಯ IITM ಸಹಯೋಗದ ಯೋಜನೆಯಾಗಿದೆ.
ಮುಂಬೈನ ಚೆಂಬೂರು, ಕೊಲಾಬಾ, ಕುರ್ಲಾ, ಪೊವಾಯಿ ಮತ್ತು ಸಯಾನ್ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಎಲ್‌ಇಡಿ ಫಲಕಗಳ ಮೂಲಕ AQI ಮಾಹಿತಿ ಪ್ರದರ್ಶಿಸಲಾಗುತ್ತದೆ.
5. IQAirನಂತಹ ಖಾಸಗಿ ಆ್ಯಪ್‌ಗಳನ್ನು ಬಳಸಿ
IQAir ಸೇರಿದಂತೆ ಹಲವು ಖಾಸಗಿ ಡಿಜಿಟಲ್ ವೇದಿಕೆಗಳಲ್ಲಿಯೂ AQI ಮಾಹಿತಿ ಲಭ್ಯವಿದೆ. ಇವು ಸರ್ಕಾರಿ ಮಾಪನ ಕೇಂದ್ರಗಳ ಮಾಹಿತಿಯ ಜೊತೆಗೆ ತಮ್ಮದೇ ಆದ ಪರಿಶೀಲಿತ ಸೆನ್ಸರ್‌ಗಳ ದತ್ತಾಂಶವನ್ನೂ ಬಳಸುತ್ತವೆ.
ಆದರೆ ಬೇರೆಬೇರೆ ಆ್ಯಪ್‌ಗಳಲ್ಲಿ AQI ಅಂಕಿ-ಅಂಶಗಳು ವ್ಯತ್ಯಾಸವಾಗಿರಬಹುದು. ಹೀಗಾಗಿ ಒಂದೇ ಆ್ಯಪ್‌ನ ಮಾಹಿತಿಯನ್ನು ನಂಬುವ ಬದಲು ಸರ್ಕಾರಿ ಮತ್ತು ಖಾಸಗಿ ವೇದಿಕೆಗಳ ಮಾಹಿತಿಯನ್ನು ಹೋಲಿಕೆ ಮಾಡುವುದು ಉತ್ತಮ.
AQI ಎಷ್ಟಿದ್ದರೆ ಗಾಳಿ ಸುರಕ್ಷಿತ?
ರಾಷ್ಟ್ರೀಯ ವಾಯು ಗುಣಮಟ್ಟ ಸೂಚ್ಯಂಕದ ಪ್ರಕಾರ AQI ಅನ್ನು 0ರಿಂದ 500ರವರೆಗೆ ವಿಂಗಡಿಸಲಾಗಿದೆ. 0ರಿಂದ 50ರವರೆಗಿನ AQI ಉತ್ತಮ ಗಾಳಿಯ ಗುಣಮಟ್ಟವನ್ನು ಸೂಚಿಸಿದರೆ, 51ರಿಂದ 100 ತೃಪ್ತಿಕರ, 101ರಿಂದ 200 ಮಧ್ಯಮ, 201ರಿಂದ 300 ಕಳಪೆ, 301ರಿಂದ 400 ಅತ್ಯಂತ ಕಳಪೆ ಹಾಗೂ 401ರಿಂದ 500 ತೀವ್ರ ಅಪಾಯಕಾರಿ ಗಾಳಿಯ ಗುಣಮಟ್ಟವನ್ನು ಸೂಚಿಸುತ್ತದೆ.
ಮಕ್ಕಳ ಆರೋಗ್ಯದ ದೃಷ್ಟಿಯಿಂದ ಈ ಎಚ್ಚರಿಕೆ ಇರಲಿ
-
ಮನೆಯ ಹತ್ತಿರದ ಮಾಪನ ಕೇಂದ್ರದ ದೂರವನ್ನು ಗಮನಿಸಿ. ಸಾಧ್ಯವಾದರೆ ಎರಡು ಅಥವಾ ಹೆಚ್ಚಿನ ಕೇಂದ್ರಗಳ ಮಾಹಿತಿಯನ್ನು ಹೋಲಿಕೆ ಮಾಡಿ.
-
ಬೆಳಗ್ಗೆ ಶಾಲೆಗೆ ಹೋಗುವ ಮತ್ತು ಸಂಜೆ ಮನೆಗೆ ಬರುವ ಸಮಯದಲ್ಲಿ AQI ಪರಿಶೀಲಿಸಿ.
-
ಗಾಳಿಯ ಗುಣಮಟ್ಟ ಕಳಪೆಯಾಗಿದ್ದರೆ ಮಕ್ಕಳ ಹೊರಾಂಗಣ ಆಟ ಮತ್ತು ಕ್ರೀಡಾ ಚಟುವಟಿಕೆಗಳನ್ನು ಕಡಿಮೆ ಮಾಡುವ ಬಗ್ಗೆ ಗಮನಹರಿಸಿ.
-
ಮಕ್ಕಳು, ವೃದ್ಧರು ಮತ್ತು ಆರೋಗ್ಯ ಸಮಸ್ಯೆ ಇರುವವರು ಹೆಚ್ಚಿನ ಮಾಲಿನ್ಯದ ಸಮಯದಲ್ಲಿ ದೀರ್ಘಕಾಲ ಹೊರಗಿರುವುದನ್ನು ತಪ್ಪಿಸಿ.
