ಹೊಸ ವರ್ಷ ಆರಂಭಕ್ಕೆ ಕೆಲವೇ ದಿನಗಳು ಬಾಕಿ ಇರುವಾಗ, ಮುಂದಿನ ವರ್ಷ ಏನಾಗಬಹುದು ಎಂಬ ಕುತೂಹಲ ಎಲ್ಲರಲ್ಲೂ ಇರುವುದು ಸಹಜ. ಈ ನಡುವೆ 500 ವರ್ಷಗಳ ಹಿಂದೆಯೇ ಜಗತ್ತಿನ ಭವಿಷ್ಯ ನುಡಿದಿದ್ದ ಫ್ರೆಂಚ್ ಪ್ರವಾದಿ ನಾಸ್ಟ್ರಾಡಾಮಸ್ ಅವರ 2026ರ ಭವಿಷ್ಯವಾಣಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸಂಚಲನ ಮೂಡಿಸುತ್ತಿವೆ. ರಷ್ಯಾ-ಉಕ್ರೇನ್ ಯುದ್ಧ ಮತ್ತು ಹೆಚ್ಚುತ್ತಿರುವ ಹಣದುಬ್ಬರದ ನಡುವೆ, ಇವರ ಭವಿಷ್ಯ ನಿಜವಾಗಲಿದೆಯೇ ಎಂಬ ಆತಂಕ ಜಗತ್ತನ್ನು ಆವರಿಸಿದೆ.
ಮೂರನೇ ಮಹಾಯುದ್ಧದ ಕಾರ್ಮೋಡ
ನಾಸ್ಟ್ರಾಡಾಮಸ್ ಅವರ ಮೊದಲ ಭವಿಷ್ಯವಾಣಿಯ ಪ್ರಕಾರ, 2026ರ ಮಧ್ಯಭಾಗದಲ್ಲಿ ಮೂರನೇ ಮಹಾಯುದ್ಧ ಪ್ರಾರಂಭವಾಗುವ ಸಾಧ್ಯತೆಯಿದೆ. ಧರ್ಮ ಮತ್ತು ರಾಷ್ಟ್ರೀಯತೆಯ ಹೆಸರಿನಲ್ಲಿ ಜನರು ಪರಸ್ಪರ ಕೊಲ್ಲುವಂತಹ ಭೀಕರ ಪರಿಸ್ಥಿತಿ ನಿರ್ಮಾಣವಾಗಲಿದೆ ಎಂದು ಅವರು ನುಡಿದಿದ್ದಾರೆ. ಈಗಿನ ಜಾಗತಿಕ ರಾಜಕೀಯ ವಿದ್ಯಮಾನಗಳನ್ನು ಗಮನಿಸಿದರೆ ಈ ಭವಿಷ್ಯವಾಣಿ ನಿಜವಾಗುವ ಮುನ್ಸೂಚನೆಗಳು ಸಿಗುತ್ತಿವೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಸಾಗರದಲ್ಲಿ ಯುದ್ಧ ಮತ್ತು ಅಣ್ವಸ್ತ್ರದ ಭೀತಿ
ಸಮುದ್ರದಲ್ಲಿ ದೊಡ್ಡ ಹಡಗೊಂದು ಮುಳುಗುವ ಮೂಲಕ ಜಾಗತಿಕ ರಾಜಕೀಯದಲ್ಲಿ ಅಲ್ಲೋಲ ಕಲ್ಲೋಲ ಉಂಟಾಗಲಿದೆ. ಬಲಿಷ್ಠ ರಾಷ್ಟ್ರಗಳ ನಡುವೆ ನೌಕಾ ಸಮರ ಆರಂಭವಾಗಲಿದ್ದು, ಒಂದು ದೇಶದ ತಪ್ಪು ನಿರ್ಧಾರವು ಅಣುಬಾಂಬ್ ದಾಳಿಗೆ ದಾರಿ ಮಾಡಿಕೊಡಬಹುದು ಎಂದು ನಾಸ್ಟ್ರಾಡಾಮಸ್ ಎಚ್ಚರಿಸಿದ್ದಾರೆ. ಅಷ್ಟೇ ಅಲ್ಲದೆ, ಮಂಗಳ ಗ್ರಹಕ್ಕೆ ಸಂಬಂಧಿಸಿದ ಬಾಹ್ಯಾಕಾಶ ಯೋಜನೆಗಳೂ ವಿಫಲವಾಗಲಿವೆ ಎಂದು ಅವರು ಹೇಳಿದ್ದಾರೆ.
ಎಲ್ಲವನ್ನೂ ನಿಯಂತ್ರಿಸಲಿದೆ ಕೃತಕ ಬುದ್ಧಿಮತ್ತೆ (AI)
2026ರಲ್ಲಿ ಕೃತಕ ಬುದ್ಧಿಮತ್ತೆ ಅಥವಾ ಎಐ ಕೇವಲ ಸಲಹೆಗಾರನಾಗಿ ಉಳಿಯದೆ, ನಿರ್ಧಾರ ತೆಗೆದುಕೊಳ್ಳುವ ಶಕ್ತಿಯಾಗಿ ಹೊರಹೊಮ್ಮಲಿದೆ. ಸರ್ಕಾರಗಳು ಮತ್ತು ದೇಶದ ವ್ಯವಸ್ಥೆಗಳನ್ನು ಮಾನವರಿಗಿಂತ ಹೆಚ್ಚಾಗಿ ಎಐ ಯಂತ್ರಗಳೇ ನಡೆಸಲಿವೆ ಎಂಬ ಅಚ್ಚರಿಯ ವಿಷಯವನ್ನು ನಾಸ್ಟ್ರಾಡಾಮಸ್ 500 ವರ್ಷಗಳ ಹಿಂದೆಯೇ ಪ್ರಸ್ತಾಪಿಸಿದ್ದರು.
ಆರ್ಥಿಕ ಕುಸಿತ ಮತ್ತು ಪರಿಸರ ವಿಕೋಪ
ಅಮೆರಿಕ ಮತ್ತು ಬ್ರಿಟನ್ನಂತಹ ಬಲಿಷ್ಠ ರಾಷ್ಟ್ರಗಳು ಭೀಕರ ಆರ್ಥಿಕ ಬಿಕ್ಕಟ್ಟನ್ನು ಎದುರಿಸಲಿದ್ದು, ಇದರಿಂದ ಸಾಮಾಜಿಕ ಅಸ್ಥಿರತೆ ಉಂಟಾಗಲಿದೆ. ಇದರ ಜೊತೆಗೆ ಅತಿಯಾದ ಶಾಖದಿಂದಾಗಿ ಭೂಮಿ ಮರುಭೂಮಿಯಾಗುವುದು ಮತ್ತು ನಂತರ ದಿಢೀರ್ ಮಳೆ ಬಂದು ಮಹಾಪೂರ ಉಂಟಾಗುವ ಮೂಲಕ ಪರಿಸರಕ್ಕೆ ದೊಡ್ಡ ಹಾನಿಯಾಗಲಿದೆ. ಜಾಗತಿಕವಾಗಿ ಆಹಾರ ಧಾನ್ಯಗಳ ಬೆಲೆ ಗಗನಕ್ಕೇರಲಿದೆ ಎಂಬುದು ಈ ಭವಿಷ್ಯವಾಣಿಯ ಸಾರಾಂಶವಾಗಿದೆ.
