ಬಾಲಸೋರ್ (ಒಡಿಶಾ): ದೇಶಾದ್ಯಂತ ಇಂದು (ಮೇ 10) ತಾಯಂದಿರ ದಿನವನ್ನು (Mother’s Day) ಸಾಮಾಜಿಕ ಜಾಲತಾಣಗಳಲ್ಲಿ ಫೋಟೋ ಹಂಚಿಕೊಳ್ಳುವ ಮೂಲಕ ಮತ್ತು ಕೇಕ್ ಕತ್ತರಿಸಿ ಸಂಭ್ರಮದಿಂದ ಆಚರಿಸಲಾಗುತ್ತಿದೆ. ಆದರೆ ಒಡಿಶಾದ ಬಾಲಸೋರ್ನಲ್ಲಿರುವ ವೃದ್ಧಾಶ್ರಮವೊಂದರಲ್ಲಿರುವ ತಾಯಂದಿರ ಬದುಕು ಈ ಸಂಭ್ರಮಕ್ಕೆ ತದ್ವಿರುದ್ಧವಾಗಿದೆ. ಮಕ್ಕಳ ಪ್ರೀತಿ ಮತ್ತು ಆರೈಕೆಯಿಂದ ವಂಚಿತರಾದ ಈ ಹಿರಿಯ ಜೀವಗಳು ಏಕಾಂಗಿತನದಲ್ಲಿ ದಿನ ಕಳೆಯುತ್ತಿದ್ದಾರೆ.
ವೃದ್ಧಾಶ್ರಮದಲ್ಲಿರುವ ದುರ್ಗಾಮಣಿ ಪ್ರಾಮಾಣಿಕ್ ಎಂಬುವವರ ಕಥೆ ಮನಕಲಕುವಂತಿದೆ. ಮೂವರು ಗಂಡು ಮಕ್ಕಳಿದ್ದರೂ ಇವರು ಇಂದು ಅನಾಥರಾಗಿದ್ದಾರೆ. “ಮಕ್ಕಳು ಮತ್ತು ಸೊಸೆಯಂದಿರ ಕಿರುಕುಳ ತಾಳಲಾರದೆ ಇಲ್ಲಿಗೆ ಬಂದಿದ್ದೇನೆ. ಅವರು ನನಗೆ ಊಟ ನೀಡದಿದ್ದರೂ ಪರವಾಗಿಲ್ಲ, ಆದರೆ ಮಾನಸಿಕ ಹಿಂಸೆ ನೀಡಬಾರದು. ಮಕ್ಕಳಿಲ್ಲದವರೇ ಇಂದು ಸುಖವಾಗಿದ್ದಾರೆ ಅನಿಸುತ್ತದೆ. ನನ್ನ ಮಕ್ಕಳು ಚೆನ್ನಾಗಿರಲಿ ಎಂದು ಇಂದಿಗೂ ಪ್ರಾರ್ಥಿಸುತ್ತೇನೆ, ಆದರೆ ಮತ್ತೆ ಅವರ ಮನೆಗೆ ಮರಳುವ ಆಸೆ ನನಗಿಲ್ಲ” ಎಂದು ಅವರು ಅಳಲು ತೋಡಿಕೊಂಡಿದ್ದಾರೆ.
ಇನ್ನೊಂದೆಡೆ, ಪಾರ್ಶ್ವವಾಯುವಿನಿಂದ ಬಳಲುತ್ತಿರುವ ಆಶಾ ಪಾತ್ರಾ ಮತ್ತು ಅವರ ಪತಿ ಜೋಗೇಂದ್ರ ಕೂಡ ಇದೇ ವೃದ್ಧಾಶ್ರಮದಲ್ಲಿ ಆಶ್ರಯ ಪಡೆದಿದ್ದಾರೆ. ಮನೆಯಲ್ಲಿ ಸೊಸೆಯು ಆಶಾ ಅವರಿಗೆ ಸರಿಯಾಗಿ ಊಟ ನೀಡದೆ ಮತ್ತು ಮಾತನಾಡಿಸದೆ ಕಡೆಗಣಿಸುತ್ತಿದ್ದಳು ಎನ್ನಲಾಗಿದೆ. ಪತ್ನಿಯ ಮೇಲಾಗುತ್ತಿದ್ದ ಈ ದೌರ್ಜನ್ಯವನ್ನು ಸಹಿಸದ ಜೋಗೇಂದ್ರ ಅವರು ಪತ್ನಿಯ ಜೊತೆ ಮನೆಯನ್ನು ಬಿಟ್ಟು ವೃದ್ಧಾಶ್ರಮ ಸೇರಿದ್ದಾರೆ.
‘ಅಮೃತ ಧಾರಾ’ ವೃದ್ಧಾಶ್ರಮದ ಕಾರ್ಯದರ್ಶಿ ಸರೋಜ ಮಹಾಪಾತ್ರ ಮಾತನಾಡಿ, “ತಮ್ಮ ಜೀವನವನ್ನೇ ಮಕ್ಕಳಿಗಾಗಿ ಮುಡಿಪಿಟ್ಟ ತಾಯಂದಿರೇ ಇಂದು ಅತಿ ಹೆಚ್ಚು ನಿರ್ಲಕ್ಷ್ಯಕ್ಕೆ ಒಳಗಾಗುತ್ತಿರುವುದು ವಿಷಾದನೀಯ. ಮನೆಯ ಕೆಲಸ ಮಾಡಲು ಶಕ್ತಿ ಇಲ್ಲದಾಗ ಅವರನ್ನು ಹೊರಹಾಕಲಾಗುತ್ತಿದೆ. ಘನತೆಯಿಂದ ಬದುಕಲು ಇವರೆಲ್ಲಾ ವೃದ್ಧಾಶ್ರಮಕ್ಕೆ ಬರುತ್ತಿದ್ದಾರೆ” ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. ಜಗತ್ತಿನಾದ್ಯಂತ ಮದರ್ಸ್ ಡೇ ಟ್ರೆಂಡ್ ಆಗುತ್ತಿರುವಾಗ, ಈ ತಾಯಂದಿರ ಕಥೆಗಳು ಸಮಾಜದ ಕ್ರೂರ ಮುಖವನ್ನು ಪರಿಚಯಿಸುತ್ತಿವೆ.
