ಬೆಂಗಳೂರು: ಮಾನವನ ದೇಹಕ್ಕೆ ಪ್ರೋಟೀನ್, ವಿಟಮಿನ್ ಹಾಗೂ ಕ್ಯಾಲ್ಸಿಯಂ ಎಷ್ಟು ಮುಖ್ಯವೋ, ಹಾಗೆಯೇ ಅಗತ್ಯ ಖನಿಜಾಂಶಗಳ ಪೂರೈಕೆಯೂ ಅಷ್ಟೇ ಅಗತ್ಯ. ದೇಹದ ಪ್ರಮುಖ ದೈಹಿಕ ಪ್ರಕ್ರಿಯೆಗಳಲ್ಲಿ ಪ್ರಮುಖ ಪಾತ್ರ ವಹಿಸುವ ಮೆಗ್ನೀಸಿಯಮ್ ಕೊರತೆಯಾದಾಗ ದೇಹದ ಸ್ವಾಸ್ಥ್ಯದಲ್ಲಿ ಏರುಪೇರಾಗುತ್ತದೆ. ಸ್ನಾಯುಗಳ ಕಾರ್ಯ, ನರಗಳ ಚಟುವಟಿಕೆ, ಮೂಳೆಗಳ ಬಲ ಮತ್ತು ದೇಹದಲ್ಲಿ ಶಕ್ತಿ ಉತ್ಪಾದನೆಗೆ ಮೆಗ್ನೀಸಿಯಮ್ ಅತ್ಯಗತ್ಯ. ಆದರೆ ಆಹಾರ ಕ್ರಮದಲ್ಲಿನ ಲೋಪದಿಂದ ದೇಹದಲ್ಲಿ ಮೆಗ್ನೀಸಿಯಮ್ ಮಟ್ಟ ಕಡಿಮೆಯಾದಾಗ, ಅನೇಕರು ಇದನ್ನು ಸಾಮಾನ್ಯ ಆಯಾಸವೆಂದು ಭಾವಿಸಿ ನಿರ್ಲಕ್ಷಿಸುತ್ತಾರೆ.
ಮೆಗ್ನೀಸಿಯಮ್ ಕೊರತೆಯ ಪ್ರಮುಖ ಲಕ್ಷಣಗಳು:
ಸ್ನಾಯುಗಳ ಸೆಳೆತ ಹಾಗೂ ನೋವು: ಮೆಗ್ನೀಸಿಯಮ್ ಸ್ನಾಯುಗಳ ಸಂಕೋಚನ ಮತ್ತು ವಿಶ್ರಾಂತಿಗೆ ನೆರವಾಗುತ್ತದೆ. ಇದರ ಅಭಾವದಿಂದ ಕಾಲುಗಳಲ್ಲಿ ಸೆಳೆತ, ಹಠಾತ್ ನೋವು ಅಥವಾ ಸ್ನಾಯುಗಳಲ್ಲಿ ಒತ್ತಡ ಉಂಟಾಗುತ್ತದೆ.
ನಿರಂತರ ಆಯಾಸ ಮತ್ತು ದೌರ್ಬಲ್ಯ: ಸಾಕಷ್ಟು ನಿದ್ರೆ ಮಾಡಿದ ನಂತರವೂ ದೇಹದಲ್ಲಿ ಆಲಸ್ಯ ಹಾಗೂ ನಿರಂತರ ದೌರ್ಬಲ್ಯ ಕಾಣಿಸಿಕೊಳ್ಳುತ್ತದೆ.
ನಿದ್ರಾಹೀನತೆ: ನರಮಂಡಲವನ್ನು ಶಾಂತಗೊಳಿಸುವ ಸಾಮರ್ಥ್ಯ ಮೆಗ್ನೀಸಿಯಮ್ಗಿದೆ. ಇದರ ಕೊರತೆಯಿಂದ ಸರಿಯಾಗಿ ನಿದ್ರೆ ಬಾರದಿರುವುದು ಅಥವಾ ರಾತ್ರಿ ಆಗಾಗ್ಗೆ ಎಚ್ಚರಗೊಳ್ಳುವ ಸಮಸ್ಯೆ ಎದುರಾಗುತ್ತದೆ.
ಮನಸ್ಥಿತಿಯಲ್ಲಿ ದಿಢೀರ್ ಬದಲಾವಣೆ: ಮೆದುಳಿನ ಸಮತೋಲನ ತಪ್ಪಿ ಕಿರಿಕಿರಿ, ಚಡಪಡಿಕೆ ಹಾಗೂ ಉದ್ವೇಗ ಕಾಣಿಸಿಕೊಳ್ಳಬಹುದು.
ಹಸಿವಿನ ಅಭಾವ ಹಾಗೂ ಜೀರ್ಣಕ್ರಿಯೆ ತೊಂದರೆ: ಖನಿಜಗಳ ಸಮತೋಲನ ತಪ್ಪುವುದರಿಂದ ಹಸಿವಾಗದಿರುವುದು, ವಾಕರಿಕೆ ಮತ್ತು ಹೊಟ್ಟೆಗೆ ಸಂಬಂಧಿಸಿದ ಸಮಸ್ಯೆಗಳು ಎದುರಾಗುತ್ತವೆ.
ಮೆಗ್ನೀಸಿಯಮ್ ಕೊರತೆ ನೀಗಿಸಲು ಸೇವಿಸಬೇಕಾದ ಆಹಾರಗಳು:
ಸೊಪ್ಪುಗಳು: ಪಾಲಕ್ನಂತಹ ಹಸಿರು ತರಕಾರಿಗಳು.
ಒಣ ಹಣ್ಣುಗಳು: ಬಾದಾಮಿ ಮತ್ತು ಗೋಡಂಬಿ.
ಬೀಜಗಳು : ವಿಶೇಷವಾಗಿ ಕುಂಬಳಕಾಯಿ ಬೀಜಗಳು (ಮೆಗ್ನೀಸಿಯಮ್ನ ಮುಖ್ಯ ಆಗರ).
ಇತರ ಆಹಾರಗಳು: ಧಾನ್ಯಗಳು, ಮಸೂರ ಬೇಳೆ ಮತ್ತು ಡಾರ್ಕ್ ಚಾಕೊಲೇಟ್.
