ಟೀಂ ಇಂಡಿಯಾದ ಮುಖ್ಯ ಕೋಚ್ ಆಗಿ ಸೇವೆ ಸಲ್ಲಿಸಿರುವ ರವಿಶಾಸ್ತ್ರಿ, ನಮೀಬಿಯಾ ವಿರುದ್ಧ ಕೊಹ್ಲಿ ಪಡೆ ಗೆಲ್ಲುತ್ತಿದ್ದಂತೆಯೇ ತಮ್ಮ ಸ್ಥಾನದಿಂದ ಕೆಳಗಿಳಿದಿದ್ದಾರೆ. ಟೀಂ ಇಂಡಿಯಾ ಪಂದ್ಯಗಳಲ್ಲಿ ಸೋತಾಗ ಕೋಚ್ ರವಿಶಾಸ್ತ್ರಿ ಕೂಡ ಟ್ರೋಲಿಗರ ಬಾಯಿಗೆ ಸಿಕ್ಕಿದ್ದಿದೆ. ಆದರೆ ರವಿ ಶಾಸ್ತ್ರಿ ತಂಡವನ್ನು ಮುನ್ನಡೆಸಿದ ರೀತಿ, ವಿದೇಶಿ ನೆಲದಲ್ಲಿ ಟೀಂ ಇಂಡಿಯಾವನ್ನು ಗೆಲ್ಲಿಸಿದ್ದು ಇವು ಯಾವುದನ್ನೂ ನಾವು ಮರೆಯುವಂತಿಲ್ಲ.
ಕೆಲ ವರ್ಷಗಳ ಕಾಲ ಟೀಂ ಇಂಡಿಯಾ ತಂಡದ ಮ್ಯಾನೇಜರ್ ಆಗಿರುವ ಸುನಿಲ್ ಸುಬ್ರಹ್ಮಣ್ಯಂ ಧರ್ಮಶಾಲಾದಲ್ಲಿ ನಡೆದ ಪಂದ್ಯದಲ್ಲಿ ಟೀಂ ಇಂಡಿಯಾ ಶ್ರೀಲಂಕಾ ವಿರುದ್ಧ ಸೋತ ದಿನವನ್ನು ಮೆಲುಕು ಹಾಕಿದ್ದಾರೆ. ಶಾಸ್ತ್ರಿ ರಾತ್ರಿ ವೇಳೆ ತಂಡದ ಸದಸ್ಯರನ್ನು ಕರೆದು ಸಭೆ ನಡೆಸಿದ್ದರು. 8 ಗಂಟೆಗೆ ಸರಿಯಾಗಿ ಎಲ್ಲರೂ ಸಭೆಗೆ ಹಾಜರಾಗಬೇಕು ಎಂದು ಹೇಳಿದ್ದರು. ನಾನಂತೂ ಇವತ್ತು ಏನೋ ಕಾದಿದೆ ಎಂದು ಹೆದರಿ ಹೋಗಿದ್ದೆ. ಆದರೆ ರವಿ ಶಾಸ್ತ್ರಿ ಮಾತ್ರ ಅಂತ್ಯಾಕ್ಷರಿ ಆಟವಾಡಿಸಲು ತಯಾರಿ ನಡೆಸುತ್ತಿದ್ದರಂತೆ..!
ರಾತ್ರಿ 2 ಗಂಟೆಯವರೆಗೂ ಧೋನಿ ಹಳೆಯ ಹಿಂದಿ ಹಾಡುಗಳನ್ನು ಗುನುಗುತ್ತಿದ್ದರು. ಅಲ್ಲಿಂದ ಎದ್ದು ಹೋಗುವಾಗ ಪ್ರತಿಯೊಬ್ಬರ ಮುಖದಲ್ಲೂ ಖುಷಿ ಇತ್ತು. ಹೀನಾಯ ಸೋಲಿನ ಕಹಿಯ ನಡುವೆಯೂ ಅಂದು ಎಲ್ಲರ ಮುಖದಲ್ಲಿ ಸಂತೋಷವಿತ್ತು. ಎಲ್ಲರೂ ಭವಿಷ್ಯದ ಗೆಲುವಿನತ್ತ ಮುಖ ಮಾಡಿದ್ದರು. ರವಿಶಾಸ್ತ್ರಿಗಿಂತ ಉತ್ತಮ ಕೋಚ್ ಇನ್ನೊಬ್ಬರು ಬರಲು ಸಾಧ್ಯವೇ ಇಲ್ಲ. ರವಿಶಾಸ್ತ್ರಿಗೆ ಯಾವ ಸಮಯದಲ್ಲಿ ಏನು ಮಾಡಬೇಕು ಅನ್ನೋದು ಚೆನ್ನಾಗಿ ತಿಳಿದಿತ್ತು ಅಂತಾರೆ ಸುನಿಲ್ ಸುಬ್ರಹ್ಮಣ್ಯಂ.
ಕೇವಲ ಇಷ್ಟು ಮಾತ್ರವಲ್ಲ. ಯಾವ ಆಟಗಾರರ ಜೊತೆಯಲ್ಲಿ ಹೇಗೆ ಮಾತನಾಡಬೇಕು ಅನ್ನೋದು ರವಿಶಾಸ್ತ್ರಿ ಚೆನ್ನಾಗಿ ತಿಳಿದಿದ್ದರು. ವಾಷಿಂಗ್ಟನ್ ಸುಂದರ್ ಜೊತೆಯಲ್ಲಿ ರವಿ ಶಾಸ್ತ್ರಿ ಮಾತನಾಡುವ ರೀತಿಗೂ ಮಹಮ್ಮದ್ ಶಮಿ ಜೊತೆ ಮಾತನಾಡುವ ರೀತಿಗೂ ಅಜಗಜಾಂತರ ವ್ಯತ್ಯಾಸವಿರುತ್ತಿತ್ತು. ಸುಂದರ್ನಲ್ಲಿ ರವಿಶಾಸ್ತ್ರಿ ತಮ್ಮನ್ನೇ ಕಾಣುತ್ತಿದ್ದರು. ಒಬ್ಬ ಬೌಲರ್ ಮನಸ್ಸು ಮಾಡಿದ್ರೆ ಚೆನ್ನಾಗಿ ಬ್ಯಾಟ್ ಮಾಡಬಲ್ಲ ಎಂಬುದನ್ನು ಸುಂದರ್ನಲ್ಲಿ ಕಂಡಿದ್ದರು. ಇದೇ ಕಾರಣಕ್ಕೆ ಸುಂದರ್ ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯದಲ್ಲಿ ಭರ್ಜರಿ ಪ್ರದರ್ಶನ ನೀಡಿದ್ದರು.
ಕೆಲ ಸಮಯದ ಹಿಂದೆ ಮಹಮ್ಮದ್ ಶಮಿ, ಪತ್ನಿಯಿಂದ ಅನೇಕ ಆರೋಪಗಳನ್ನು ಎದುರಿಸುತ್ತಿದ್ದರು. ಇದು ಅವರನ್ನು ಮಾನಸಿಕವಾಗಿ ಕುಗ್ಗಿಸಿತ್ತು. ಆದರೆ ಈ ಸಮಯದಲ್ಲಿ ಶಮಿ ಜೊತೆ ಮಾತನಾಡುತ್ತಿದ್ದ ರವಿಶಾಸ್ತ್ರಿ ಅವರ ಮನಸ್ಸು ಕ್ರಿಕೆಟ್ ಕಡೆಯೇ ಚಿಂತಿಸುವಂತೆ ನೋಡಿಕೊಳ್ಳುತ್ತಿದ್ದರು. ಕ್ರಿಕೆಟ್ನಲ್ಲಿ ಯಶಸ್ಸು ಕಂಡರೆ ಶಮಿ ನೋವನ್ನು ಮರೆಯುತ್ತಾರೆ ಎಂಬುದು ರವಿಶಾಸ್ತ್ರಿ ಲೆಕ್ಕಾಚಾರವಾಗಿತ್ತು. ಹೀಗಾಗಿ ಶಮಿಯಲ್ಲಿ ಆತ್ಮವಿಶ್ವಾಸವನ್ನು ತುಂಬುವ ಕೆಲಸ ಮಾಡುತ್ತಿದ್ದರು.
ಜಸ್ಪ್ರಿತ್ ಬೂಮ್ರಾ ಕೂಡ ರವಿಶಾಸ್ತ್ರಿ ಗರಡಿಯಲ್ಲಿಯೇ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಒಂದು ಸಮಯದಲ್ಲಿ ಸಾಕಷ್ಟು ಗಾಯಗಳಿಂದ ಆಟದಲ್ಲಿ ಹಿನ್ನಡೆ ಅನುಭವಿಸುತ್ತಿದ್ದ ಬೂಮ್ರಾರನ್ನು ವೈಯಕ್ತಿಕವಾಗಿ ಕರೆದಿದ್ದ ಶಾಸ್ತ್ರಿ ಅವರಲ್ಲಿ ಆತ್ಮವಿಶ್ವಾಸ ಹೆಚ್ಚಿಸುವ ಕೆಲಸ ಮಾಡಿದ್ದರು. ನೀನು ಆಟಕ್ಕೆ ಮರಳಲೇಬೇಕು. ನೀನೊಬ್ಬ ಚಾಂಪಿಯನ್. ಇಂತಹ ಗಾಯಗಳು ನಿನ್ನ ಬೌಲಿಂಗ್ ಸಾಮರ್ಥ್ಯವನ್ನು ಕುಗ್ಗಿಸಲು ಸಾಧ್ಯವೇ ಇಲ್ಲ ಎಂದು ಧೈರ್ಯ ತುಂಬಿದ್ದರು. ಈ ರೀತಿ ಸರಿಯಾದ ಸಮಯದಲ್ಲಿ ಸರಿಯಾದ ನಿರ್ಣಯ ಹಾಗೂ ಸರಿಯಾದ ಮಾತುಗಳನ್ನು ಆಡುತ್ತಿದ್ದ ರವಿ ಶಾಸ್ತ್ರಿ ಟೀಂ ಇಂಡಿಯಾ ಪಾಲಿಗೆ ಎಂಟಾನೆ ಬಲದಂತೆ ಇದ್ದಿದ್ದಂತೂ ಸುಳ್ಳಲ್ಲ.
Loading ...