ವಧುವಿಗೆ ಕೇಕ್​ ತಿನ್ನಿಸಬೇಕು ಎನ್ನುವಷ್ಟರಲ್ಲಿಯೇ ಕೇಕ್​ ಹಾಳು ಮಾಡಿದ ವ್ಯಕ್ತಿ; ವರನಿಂದ ಕಪಾಳಮೋಕ್ಷ

ಮದುವೆ ಸುಸೂತ್ರವಾಗಿ ಯಾವುದೇ ಸಮಸ್ಯೆ ಇಲ್ಲದೇ ನಡೆಯಲಿ ಎನ್ನುವ ಕಾರಣಕ್ಕೆ ಕುಟುಂಬಸ್ಥರು ಏನೆಲ್ಲಾ ಸರ್ಕಸ್​ ಮಾಡುತ್ತಾರೆ. ಭಾರತೀಯ ಸಂಪ್ರದಾಯವು ಸ್ವಲ್ಪ ಜೋರಾಗಿಯೇ ಇದ್ದ ಕಾರಣದಿಂದ ಭಾರತೀಯ ಮದುವೆಗಳಲ್ಲಿ ಅದರಲ್ಲಿಯೂ ಹೆಣ್ಣಿನ ಮನೆಯವರು ಮದುವೆ ಸರಿಯಾಗಿ ನೆರವೇರಬೇಕೆಂದು ಎಲ್ಲಾ ದೇವರಿಗೂ ಹರಕೆ ಹೊತ್ತುಕೊಳ್ಳುವುದು ಇದೆ.

ಮದುವೆಗೆ ಬಂದ ಅತಿಥಿಗಳನ್ನು ಚೆನ್ನಾಗಿ ನೋಡಿಕೊಳ್ಳಬೇಕು ಎನ್ನುವುದು ನಿಜ. ಆದರೆ ಆ ಅತಿಥಿಯೇ ಎಡವಟ್ಟು ಮಾಡಿದರೆ? ಆಗಲೂ ಅವರನ್ನು ಬೈಯಬಾರದು ಎಂದು ಸಂಪ್ರದಾಯ ಹೇಳುತ್ತದೆ.

ವಿದೇಶಗಳಲ್ಲಿ ಈ ಸಂಪ್ರದಾಯ ಇದೆಯೋ ಇಲ್ಲವೋ ತಿಳಿಯದು. ಆದರೆ ಹೀಗೆ ಎಡವಟ್ಟು ಮಾಡಲು ಹೋದ ಅತಿಥಿಯೊಬ್ಬನನ್ನು ವರ ಮಹಾಶಯ ಕಪಾಳಮೋಕ್ಷ ಮಾಡಿರುವ ಘಟನೆ ನಡೆದಿದೆ.

ಕೆಲವು ದೇಶಗಳಲ್ಲಿ ಮದುವೆ, ಹುಟ್ಟುಹಬ್ಬ ಯಾವುದೇ ಸಂಪ್ರದಾಯವಿದ್ದರೂ ಅದರಲ್ಲಿ ಕೇಕ್​ ಕತ್ತರಿಸುವುದೇ ಮಹತ್ವದ ಪಾತ್ರ ವಹಿಸುತ್ತದೆ. ಮದುವೆಯಾಗಿದ್ದರೆ ಕೇಕ್​ ಕತ್ತರಿಸಿ ವಧು ತನ್ನ ವರನಿಗೂ, ವರ ತನ್ನ ವಧುವಿಗೂ ಅದನ್ನು ತಿನ್ನಿಸುವುದು ನಂತರ ಉಂಗುರ ಬದಲಾಯಿಸಿಕೊಳ್ಳುವುದೇ ಇಲ್ಲಿ ಮಹತ್ವದ್ದು. ಅಂಥ ಮಹತ್ವದ ಕಾರ್ಯಕ್ಕೇ ಅಡ್ಡಿಪಡಿಸಿದರೆ ಹೇಗಿರುತ್ತದೆ? ಈ ವಿಡಿಯೋದಲ್ಲಿ ನೋಡಿದರೆ ಇಲ್ಲಿ ವರ ಸಿಟ್ಟುಗೊಳ್ಳಲೂ ಅದೇ ಕಾರಣ.

ಇನ್ನೇನು ವರ ಕೇಕ್​ ಕತ್ತರಿಸಿ ವಧುವಿನ ಬಾಯಿಗೆ ಇಡಬೇಕು ಎನ್ನುವಷ್ಟರಲ್ಲಿ ಫುಲ್​ ಟೈಟ್​ ಆಗಿ ಬಂದ ವ್ಯಕ್ತಿಯೊಬ್ಬ ಕೇಕ್​ ಅನ್ನು ನಾಶಪಡಿಸಿದ್ದಾನೆ. ವಧು-ವರರ ಸಮೀಪ ಹೋದ ವ್ಯಕ್ತಿ ಕೇಕ್ ಅನ್ನು ಕೈಯಿಂದ ಹಿಡಿದು ವರ ಮತ್ತು ವಧುವಿನ ಮುಖದ ಮೇಲೆ ಹಾಕಲು ಪ್ರಯತ್ನಿಸುತ್ತಾನೆ. ಆಘಾತಗೊಂಡ ವಧು ಹಿಂದಕ್ಕೆ ಸರಿಯುತ್ತಾಳೆ.

ಆ ಅತಿಥಿಯ ಕ್ರಮಕ್ಕೆ ಸಿಟ್ಟಿಗೆದ್ದ ವರ ಮಹಾಶಯ ಅತಿಥಿಯ ಕಪಾಳಕ್ಕೆ ಹೊಡೆಯುತ್ತಾನೆ. ಕೇಕ್​ ನಾಶಪಡಿಸಿದ ಆ ವ್ಯಕ್ತಿ ಕೊನೆಗೆ ವರನನ್ನು ಅಪ್ಪಿಕೊಳ್ಳಲು ಮುಂದಾದಾಗ ಸಿಟ್ಟಿಗೆದ್ದ ವರ ಕಪಾಳಕ್ಕೆ ಹೊಡೆಯುವುದನ್ನು ವಿಡಿಯೋದಲ್ಲಿ ಕಾಣಬಹುದು.

https://twitter.com/spurked/status/1590603405814554625?ref_src=twsrc%5Etfw%7Ctwcamp%5Etweetembed%7Ctwterm%5E1590603405814554625%7Ctwgr%5E68893b74c74a4bb0573a9d208059b7ffabc8a342%7Ctwcon%5Es1_&ref_url=https%3A%2F%2Fwww.news18.com%2Fnews%2Fbuzz%2Fwatch-tipsy-guest-ruins-wedding-cake-groom-punches-him-in-the-face-6370669.html