ಪ್ರಯಾಣಿಕರು ವಿಮಾನಯಾನ ಸಿಬ್ಬಂದಿಯೊಂದಿಗೆ ಅಸಭ್ಯವಾಗಿ ವರ್ತಿಸಿದ ಮತ್ತು ಅಗೌರವ ತೋರಿದ ಹಲವಾರು ನಿದರ್ಶನಗಳಿವೆ. ಆದರೆ ಇಲ್ಲೊಂದು ವಿಭಿನ್ನ ಘಟನೆಯಾಗಿದೆ. ಈ ಘಟನೆಯಿಂದಾಗಿ ಗಗನಸಖಿಯೊಬ್ಬರು ತಾವು ಕನಸಿನಲ್ಲಿಯೂ ಊಹಿಸಿರದ ಗಿಫ್ಟ್ ಒಂದನ್ನು ಪ್ರಯಾಣಿಕರೊಬ್ಬರಿಂದ ಪಡೆದುಕೊಂಡಿದ್ದಾಳೆ.
ವಿಮಾನದಲ್ಲಿದ್ದ ಪ್ರಯಾಣಿಕರೊಬ್ಬರು ಗಗನಸಖಿಯೊಬ್ಬಳ ರೇಖಾಚಿತ್ರವನ್ನು ಚಿತ್ರಿಸಿ ಆಕೆಗೆ ನೀಡಿದ್ದಾರೆ. ಇದೇನು ದೊಡ್ಡ ವಿಷಯ ಅಲ್ಲ ಎಂದು ತೋರಿದರೂ ಈ ಚಿತ್ರವನ್ನು ನೋಡಿ ಆಕೆ ಪುಳಕಿತಳಾಗಿ ಆನಂದಬಾಷ್ಪ ಹರಿಸಿದ ಕ್ಷಣ ಮಾತ್ರ ನೋಡುಗರನ್ನು ಭಾವುಕರನ್ನಾಗಿಸುತ್ತದೆ.
ರೆಡ್ಡಿಟ್‌ನಲ್ಲಿ 50 ಸೆಕೆಂಡ್‌ಗಳ ಈ ವಿಡಿಯೋ ಶೇರ್ ಮಾಡಲಾಗಿದೆ. ಗಗನಸಖಿಯೊಬ್ಬಳು ಪ್ರಯಾಣಿಕರಿಗೆ ಆಹಾರ ಸರಬರಾಜು ಮಾಡುತ್ತಿರುವುದನ್ನು ವಿಡಿಯೋದಲ್ಲಿ ಕಾಣಬಹುದು. ಮಾಸ್ಕ್ ಧರಿಸಿ ಆಕೆ ಆಹಾರ ನೀಡುತ್ತಿರುವ ಸಂದರ್ಭದಲ್ಲಿ ಅಲ್ಲಿಯೇ ಇದ್ದ ಪ್ರಯಾಣಿಕರೊಬ್ಬರು ಆಕೆಯ ರೇಖಾಚಿತ್ರವನ್ನು ಚಿತ್ರಿಸಿದ್ದಾರೆ.
ನಂತರ ಆಕೆ ಇದ್ದಲ್ಲಿಗೆ ಹೋಗಿ ಆ ರೇಖಾಚಿತ್ರ ಕೊಟ್ಟಿದ್ದಾರೆ. ಇದೇನೆಂದು ತಿಳಿಯದ ಗಗನಸಖಿ ರೇಖಾಚಿತ್ರ ನೋಡಿದಾಗ ಚಕಿತ, ಅಚ್ಚರಿ, ಸಂತೋಷ ಎಲ್ಲವೂ ಒಟ್ಟಿಗೇ ಆಗಿರುವುದನ್ನು ವಿಡಿಯೋದಲ್ಲಿ ಕಾಣಬಹುದು. ಇದನ್ನು ತಾನೇ ಇಟ್ಟುಕೊಳ್ಳಬಹುದು ಎಂದು ಕೇಳಿ ಆಕೆ ಖುಷಿಯಿಂದ ಅದನ್ನು ಪಡೆದುಕೊಂಡಿದ್ದಾಳೆ.
Loading ...