ಅತ್ಯಂತ ಪುಟ್ಟ ಗಿಟಾರ್ ರಚಿಸಿ ದಾಖಲೆಗೆ ಪಾತ್ರರಾಗಿದ್ದಾರೆ ಈ ಕಲಾವಿದ

ಉತ್ತರಾಖಂಡದ ಕಲಾವಿದ ಪ್ರಕಾಶ್ ಉಪಾಧ್ಯಾಯ ಅವರು ವಿಶಿಷ್ಟವಾದ ಗಿಟಾರ್ ತಯಾರಿಸುವ ಮೂಲಕ ಲಿಮ್ಕಾ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್‌ ದಾಖಲೆಗೆ ಪಾತ್ರರಾಗಿದ್ದಾರೆ.

ಅಂದಹಾಗೆ, ಪ್ರಕಾಶ್ ಉಪಾಧ್ಯಾಯ ಅವರು ಗಮನ ಸೆಳೆದಿರುವುದು ಇದೇ ಮೊದಲಲ್ಲ. ಈಗಾಗಲೇ ಅವರ ಹೆಸರಿನಲ್ಲಿ ಅನೇಕ ಸಾಧನೆಗಳನ್ನು ಹೊಂದಿದ್ದಾರೆ. ಅವರು ತಮ್ಮ ಅನನ್ಯ ಪ್ರತಿಭೆಯಿಂದ ವಿಶ್ವದ ಅತ್ಯಂತ ಚಿಕ್ಕ ಪುಸ್ತಕವನ್ನು ರಚಿಸಿದ್ದಾರೆ ಮತ್ತು ಚಿಕ್ಕ ಹನುಮಾನ್ ಚಾಲೀಸಾವನ್ನು ಸಹ ರಚಿಸಿದ್ದಾರೆ.

ಅಷ್ಟೇ ಅಲ್ಲ, ವಿಶ್ವದ ಅತಿ ಚಿಕ್ಕ ನೂಲುವ ಚಕ್ರ, ಪೆನ್ಸಿಲ್ ಮತ್ತು ಸಮುದ್ರ ಹಡಗು ತಯಾರಿಸಿದ ದಾಖಲೆಯೂ ಅವರದ್ದಾಗಿದೆ. ಇದೀಗ, ಪ್ರಕಾಶ್ ಉಪಾಧ್ಯಾಯ ಅವರು ಕೇವಲ ಮೂರು ಸೆಂಟಿಮೀಟರ್‌ಗಳ ಗಿಟಾರ್ ಮಾಡುವ ಮೂಲಕ ಲಿಮ್ಕಾ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್‌ನ ದಾಖಲೆಗೆ ಪಾತ್ರರಾಗಿದ್ದಾರೆ.

ಹೌದು, ಉಪಾಧ್ಯಾಯ ಅವರು ವಿಶ್ವದ ಅತ್ಯಂತ ಚಿಕ್ಕ ಗಿಟಾರ್ ಅನ್ನು ರಚಿಸಿದ್ದಾರೆ ಮಾತ್ರವಲ್ಲದೆ ಸಾಧನವು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತದೆ. ಇದು ಕೇವಲ 3 ಸೆಂ.ಮೀ ಉದ್ದದ ಗಿಟಾರ್‌ನ ವರ್ಕಿಂಗ್ ಮಾಡೆಲ್‌ನೊಂದಿಗೆ ಉಪಾಧ್ಯಾಯರ ಏಳನೇ ವೈಯಕ್ತಿಕ ವಿಶ್ವದಾಖಲೆಯಾಗಿದೆ.

ಕಲಾವಿದರು ಶುದ್ಧ ಶ್ರೀಗಂಧ, ತಾಮ್ರ, ಅಲ್ಯೂಮಿನಿಯಂ ತಂತಿಗಳು ಮತ್ತು ಪಿನ್‌ಗಳನ್ನು ಬಳಸಿ ವಿಶಿಷ್ಟವಾದ ಗಿಟಾರ್ ಅನ್ನು ರಚಿಸಿದ್ದಾರೆ. ಈ ಗಿಟಾರ್‌ನ ಸ್ಟ್ರಮ್ಮಿಂಗ್‌ನಿಂದ ಉತ್ಪತ್ತಿಯಾಗುವ ಸಂಗೀತವನ್ನು ಮೈಕ್ರೋಫೋನ್ ಮೂಲಕ ಚೆನ್ನಾಗಿ ಕೇಳಬಹುದು. ಈ ಗಿಟಾರ್ ಅನ್ನು 29 ಏಪ್ರಿಲ್ 2022 ರಂದು ಕೇವಲ 4 ಗಂಟೆ 30 ನಿಮಿಷಗಳಲ್ಲಿ ತಯಾರಿಸಲಾಯಿತು ಮತ್ತು ಈ ಅದ್ಭುತವನ್ನು ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್ (2021-22) ನಲ್ಲಿ ದಾಖಲಿಸಲಾಗಿದೆ.

ಲಿಮ್ಕಾ ಪುಸ್ತಕವು ತನ್ನ ಪುಸ್ತಕದ ಹಿಂಬದಿಯಲ್ಲಿ ಈ ದಾಖಲೆಗೆ ಪ್ರಮುಖ ಸ್ಥಾನವನ್ನು ನೀಡಿದೆ ಮತ್ತು ಪ್ರಕಾಶ್ ಅವರಿಗೆ ಪ್ರಮಾಣಪತ್ರವನ್ನು ಒದಗಿಸಲಾಗಿದೆ. ಈ ದಾಖಲೆಯ ಹೊರತಾಗಿ, 6 ವೈಯಕ್ತಿಕ ವಿಶ್ವ ದಾಖಲೆಗಳು ಮತ್ತು ಮೂರು ಸಾಮೂಹಿಕ, (ಗಿನ್ನಿಸ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್) ಪ್ರಕಾಶ್ ಉಪಾಧ್ಯಾಯ ಅವರ ಹೆಸರಿನಲ್ಲಿ ದಾಖಲಾಗಿವೆ.