ಸರ್ಕಾರಿ ಇಲಾಖೆಗಳಲ್ಲಿ ಶೇ.100 EV ವಾಹನ ಹೊಂದುವ ದೇಶದ ಮೊದಲ ರಾಜ್ಯವಾಗಲಿದೆ ಉತ್ತರ ಪ್ರದೇಶ

ಎಲೆಕ್ಟ್ರಿಕ್ ವಾಹನಗಳ (ಇವಿ) ಮಾರಾಟ ಮತ್ತು ಬಳಕೆಯನ್ನು ಉತ್ತೇಜಿಸುವ ಕ್ರಮದಲ್ಲಿ ಉತ್ತರಪ್ರದೇಶ ಸರ್ಕಾರ ಮಹತ್ವದ ನಿರ್ಧಾರ ಕೈಗೊಂಡಿದೆ.

ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರ ಸರ್ಕಾರವು ಎಲ್ಲಾ ಸರ್ಕಾರಿ ಇಲಾಖೆಗಳಲ್ಲಿ ಬಳಸುವ ವಾಹನಗಳನ್ನು ಇವಿಗಳಾಗಿ ಪರಿವರ್ತಿಸುವ ಗುರಿಯನ್ನು ಹೊಂದಿದೆ. 2030 ರ ವೇಳೆಗೆ ಹಂತಹಂತವಾಗಿ ಈ ಗುರಿ ಸಾಧಿಸಲು ಯೋಜಿಸಿದೆ. ಈ ಮೂಲಕ ಇಡೀ ದೇಶದಲ್ಲಿ ಇಂತಹ ಸಾಧನೆ ಮಾಡುವ ಮೊದಲ ರಾಜ್ಯ ಉತ್ತರಪ್ರದೇಶ ಆಗಲಿದೆ.

ಇದಕ್ಕಾಗಿ ಎಲ್ಲಾ ಸರ್ಕಾರಿ ಇಲಾಖೆಗಳು ಟೆಂಡರ್ ಇಲ್ಲದೆಯೂ ನಾಮನಿರ್ದೇಶನದ ಆಧಾರದ ಮೇಲೆ ಇವಿಗಳನ್ನು ಖರೀದಿಸಬಹುದು. ಆದರೆ ಇವಿಗಳ ಖರೀದಿಗೆ ಅಗತ್ಯಕ್ಕೆ ಅನುಗುಣವಾಗಿ ಗರಿಷ್ಠ ಮಿತಿಗಿಂತ ಹೆಚ್ಚು ಖರ್ಚು ಮಾಡಬಹುದು ಎಂದು ಸೂಚನೆಗಳನ್ನು ನೀಡಲಾಗಿದೆ. 2030 ರ ಮೊದಲು ಈ ಗುರಿಯನ್ನು ಸಾಧಿಸುವ ಮೂಲಕ, ಉತ್ತರ ಪ್ರದೇಶವು ಸರ್ಕಾರಿ ಇಲಾಖೆಗಳಲ್ಲಿ 100 ಪ್ರತಿಶತ ಇವಿ ಹೊಂದಿರುವ ದೇಶದ ಮೊದಲ ರಾಜ್ಯವಾಗಬಹುದು ಎಂದು ಸರ್ಕಾರವು ಪ್ರಕಟಣೆಯ ಮೂಲಕ ತಿಳಿಸಿದೆ.

ಗಮನಾರ್ಹವಾಗಿ ರಾಜ್ಯದಲ್ಲಿ EV ವಾಹನಗಳನ್ನು ಉತ್ತೇಜಿಸಲು ಸರ್ಕಾರವು, ಉತ್ತರ ಪ್ರದೇಶ ಎಲೆಕ್ಟ್ರಿಕ್ ವೆಹಿಕಲ್ ಮ್ಯಾನುಫ್ಯಾಕ್ಚರಿಂಗ್ ಮತ್ತು ಮೊಬಿಲಿಟಿ ಪಾಲಿಸಿ 2022 ಅನ್ನು ಕಳೆದ ಅಕ್ಟೋಬರ್ 14 ರಂದು ಆದೇಶಿಸಿತ್ತು.

ಇದರ ಅಡಿಯಲ್ಲಿ, ಸರ್ಕಾರವು ಇವಿಗಳ ಖರೀದಿಯ ಮೇಲೆ ಮೂರು ವರ್ಷಗಳವರೆಗೆ ತೆರಿಗೆ ಮತ್ತು ನೋಂದಣಿ ಶುಲ್ಕದಿಂದ ವಿನಾಯಿತಿಯನ್ನು ಒದಗಿಸಿದೆ. ಅದೇ ಸಮಯದಲ್ಲಿ ಈ ವಿನಾಯಿತಿಯು ರಾಜ್ಯದಲ್ಲಿ ತಯಾರಿಸಿದ ಇವಿಗಳ ಖರೀದಿಯ ಮೇಲೆ ಐದು ವರ್ಷಗಳವರೆಗೆ ಮಾನ್ಯವಾಗಿರುತ್ತದೆ.

ಮುಖ್ಯ ಕಾರ್ಯದರ್ಶಿ ದುರ್ಗಾ ಶಂಕರ್ ಮಿಶ್ರಾ ಹೊರಡಿಸಿದ ಆದೇಶದಲ್ಲಿ, ಇವಿ ನೀತಿಯ ಪ್ರಕಾರ 2030 ರ ವೇಳೆಗೆ ಶೇಕಡಾ 100 ರಷ್ಟು ವಾಹನಗಳನ್ನು ಇವಿಗಳಾಗಿ ಪರಿವರ್ತಿಸಲು ತಮ್ಮ ಅಡಿಯಲ್ಲಿ ಕಾರ್ಯನಿರ್ವಹಿಸುವ ಎಲ್ಲಾ ಇಲಾಖೆಗಳು ಮತ್ತು ಸಂಸ್ಥೆಗಳಿಗೆ ಸೂಚನೆ ನೀಡಲಾಗಿದೆ.

ಟೆಂಡರ್ ಇಲ್ಲದೆ ನಾಮನಿರ್ದೇಶನದ ಆಧಾರದ ಮೇಲೆ EV ವಾಹನಗಳನ್ನು ಖರೀದಿಸಬೇಕು ಮತ್ತು ಅಧಿಕೃತ ಕಾರ್ಯಕ್ರಮಗಳಿಗಾಗಿ ವಾಹನಗಳ ಖರೀದಿಯ ಮೇಲಿನ ಚಾಲ್ತಿಯಲ್ಲಿರುವ ಮಿತಿಯನ್ನು ಸಡಿಲಗೊಳಿಸಬೇಕು ಎಂದು ಹೇಳಲಾಗಿದೆ.

ಉತ್ತರ ಪ್ರದೇಶ ಸಾರಿಗೆ ಇಲಾಖೆಯ ಅಧಿಕಾರಿಯೊಬ್ಬರ ಪ್ರಕಾರ, ಇದುವರೆಗೆ ಸರ್ಕಾರಿ ವಾಹನಗಳನ್ನು ಜಿಇಎಂ ಪೋರ್ಟಲ್‌ನಲ್ಲಿ ಟೆಂಡರ್‌ಗಳ ಮೂಲಕ ಖರೀದಿಸಲಾಗಿರುವುದರಿಂದ, ಇವಿ ಕಂಪನಿಗಳು ಅದರಲ್ಲಿ ನೋಂದಣಿಯಾಗಿಲ್ಲ. ಅದಕ್ಕಾಗಿಯೇ ಟೆಂಡರ್ ಇಲ್ಲದೆಯೇ ನಾಮನಿರ್ದೇಶನದ ಆಧಾರದ ಮೇಲೆ ರಾಜಸ್ಥಾನ ಎಲೆಕ್ಟ್ರಾನಿಕ್ಸ್ ಇನ್‌ಸ್ಟ್ರುಮೆಂಟ್ ಲಿಮಿಟೆಡ್ (REIL) ಮತ್ತು ಎನರ್ಜಿ ಎಫಿಷಿಯನ್ಸಿ ಸರ್ವಿಸಸ್ ಲಿಮಿಟೆಡ್ (EESL) ಇತ್ಯಾದಿ ಸರ್ಕಾರಿ ಸಂಸ್ಥೆಗಳಿಂದ EV ಗಳನ್ನು ಖರೀದಿಸಬಹುದು ಎಂಬ ನಿಬಂಧನೆಯನ್ನು ನೀತಿಯಲ್ಲಿ ಮಾಡಲಾಗಿದೆ.