ಬಾಲನಟನಾಗಿ ಕಾಣದಂತೆ ಮಾಯವಾದನೋ ಎಂಬ ಹಾಡನ್ನ ಹಾಡಿದ ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ಇಂದು ನಿಜವಾಗಿಯೂ ಅಭಿಮಾನಿಗಳ ಕಣ್ಣಿಂದ ಮಾಯವಾಗಿ ಬಿಟ್ಟಿದ್ದಾರೆ. ಪುನೀತ್ರನ್ನು ಈ ರೀತಿಯಾಗಿ ನೋಡುವ ದಿನ ಇಷ್ಟು ಬೇಗ ಬರಬಹುದು ಎಂಬ ಸಣ್ಣ ಕಲ್ಪನೆಯೂ ಇಲ್ಲದ ವೇಳೆಯಲ್ಲಿಯೇ ದೊಡ್ಮನೆ ಕುಡಿ ಬಾರದ ಲೋಕಕ್ಕೆ ಪ್ರಯಾಣ ಬೆಳೆಸಿದ್ದಾರೆ.
ಕನ್ನಡದ ಮೇರು ನಟ ಪುನೀತ್ ರಾಜ್ಕುಮಾರ್ಗೆ ಅಂಜನಾದ್ರಿ ಬೆಟ್ಟ ಅತ್ಯಂತ ನೆಚ್ಚಿನ ತಾಣವಾಗಿತ್ತು. ಹನುಮಂತನ ಜನ್ಮಸ್ಥಳವೆಂದೇ ಕರೆಯಲ್ಪಡುವ ಈ ಬೆಟ್ಟಕ್ಕೆ ಪುನೀತ್ ಪದೇ ಪದೇ ಭೇಟಿ ನೀಡುತ್ತಿದ್ದರು. ದೊಡ್ಮನೆ ಹುಡುಗ, ರಣವಿಕ್ರಮ, ಜೇಮ್ಸ್ ಸೇರಿದಂತೆ ಅನೇಕ ಸಿನಿಮಾಗಳ ಚಿತ್ರೀಕರಣವನ್ನೂ ಪುನೀತ್ ಈ ಭಾಗದಲ್ಲಿಯೇ ಮಾಡಿದ್ದಾರೆ.
2 ತಿಂಗಳ ಹಿಂದೆಯಷ್ಟೇ ಜೇಮ್ಸ್ ಚಿತ್ರದ ಚಿತ್ರೀಕರಣಕ್ಕಾಗಿ ಪುನೀತ್ ಅಂಜನಾದ್ರಿಗೆ ಆಗಮಿಸಿದ್ದರು. ಈ ವೇಳೆ ಅಂಜನಾದ್ರಿ ಬೆಟ್ಟವನ್ನು ಏರಿದ್ದರು. ಬಳಿಕ ಮಣಿಭದ್ರೇಶ್ವರ ತಳವಾರಘಟ್ಟ ಆನೆಗೊಂದಿಯನ್ನು ಕಣ್ತುಂಬಿಕೊಂಡಿದ್ದರು. ಅಂಜನಾದ್ರಿ ಬೆಟ್ಟ ಏರಿದ್ದ ಪುನೀತ್ ಅಲ್ಲಿದ್ದ ಮಂಗಗಳಿಗೂ ಬಾಳೆ ಹಣ್ಣು ನೀಡಿದ್ದರು.
ಪುನೀತ್ ರಾಜ್ಕುಮಾರ್ ನಿಧನದ ಬಳಿಕ ಈ ಎಲ್ಲಾ ಘಟನೆಗಳು ನೆನಪಾಗಿ ಕಾಡುತ್ತಿವೆ. ಪುನೀತ್ ಒಬ್ಬ ನಟನಾಗಿ ಅಲ್ಲ ವ್ಯಕ್ತಿತ್ವದ ಮೂಲಕವೇ ಕರುನಾಡಿನ ಪಾಲಿಗೆ ರಾಜಕುಮಾರ ಎನಿಸಿದವರು. ಎಲ್ಲರನ್ನೂ ಒಂದೇ ರೀತಿ ಕಾಣುತ್ತಿದ್ದ ಪುನೀತ್ ಮತ್ತೊಮ್ಮೆ ಇದೇ ನಾಡಿನಲ್ಲಿ ಹುಟ್ಟಿ ಬರಲಿ ಎಂಬುದೇ ಎಲ್ಲರ ಆಶಯವಾಗಿದೆ.
Loading ...