ನಾಯಿಯ ಬಿಪಿ ಚೆಕ್​ ಮಾಡಿದ ಬಾಲಕ: ಕ್ಯೂಟ್‌ ವಿಡಿಯೋ ವೈರಲ್

ಮಕ್ಕಳು ಸ್ಟೆಥಸ್ಕೋಪ್​ ತೆಗೆದುಕೊಂಡೋ ಇಲ್ಲವೇ ಆಟಿಕೆಯಿಂದ ಮನುಷ್ಯರ ಬಿಪಿ ಚೆಕ್​ ಮಾಡುವುದು, ಹೃದಯದ ಬಡಿತ ನೋಡುವುದು ಎಲ್ಲವೂ ಮಾಮೂಲು. ಆದರೆ ಆಟವಾಡಲು ಯಾರೂ ಇಲ್ಲದಿದ್ದರೆ ಹಲವು ಮಕ್ಕಳಿಗೆ ಪ್ರಾಣಿಗಳೇ ಸ್ನೇಹಿತರು.

ಅಂಥದ್ದೇ ಒಂದು ವಿಡಿಯೋ ವೈರಲ್​ ಆಗಿದೆ. ನಾಯಿಗೆ ಹುಡುಗನೊಬ್ಬ ಬಿಪಿ ಚೆಕ್​ ಮಾಡುತ್ತಿದ್ದಾನೆ. ಪಶು ವೈದ್ಯನಾಗುವ ತನ್ನ ಕನಸನ್ನು ಈ ರೀತಿ ಈಡೇರಿಸಿಕೊಳ್ಳುತ್ತಿದ್ದಾನೆ ಎಂದು ನೆಟ್ಟಿಗರು ಕಮೆಂಟ್​ ಮಾಡಿದ್ದಾರೆ.

ಆದರೆ ಈ ನಾಯಿ ಕೂಡ ಬಾಲಕನ ಜೊತೆ ಸುಮ್ಮನೆ ಕುಳಿತಿದ್ದು, ಆತ ಹೇಳಿದಂತೆ ಕೇಳುತ್ತಿದೆ. ಇದಕ್ಕಾಗಿ ಇದು ಕ್ಯೂಟ್​ ವಿಡಿಯೋ ಎನಿಸಿಕೊಂಡಿದೆ. ಬಾಲಕ ಎಳೆಯುತ್ತಿದ್ದರೂ ನಾಯಿ ಸುಮ್ಮನೇ ಕುಳಿತು ಆತ ಹೇಳುವಂತೆ ಕೇಳುತ್ತಿದೆ. ತನ್ನ ಕಾಲನ್ನು ಬಾಲಕನಿಗೆ ನೀಡಿರುವುದನ್ನು ವಿಡಿಯೋದಲ್ಲಿ ನೋಡಬಹುದು. ಯಾವ ಜನ್ಮದ ಬಂಧವೋ ಎಂದು ಹಲವರು ಕಮೆಂಟ್​ ಮಾಡುತ್ತಿದ್ದಾರೆ.