ಹಿಂದೂ ದೇವಾಲಯಕ್ಕೆ ಕೋಟಿ ರೂ. ಮೌಲ್ಯದ ಜಾಗ ಬಿಟ್ಟುಕೊಟ್ಟ ಮುಸ್ಲಿಂ ಉದ್ಯಮಿ

ಭಕ್ತರು ತಮ್ಮ ನೆಚ್ಚಿನ ದೇವತೆಗೆ ಪ್ರಾರ್ಥನೆ ಸಲ್ಲಿಸಲು ಕಷ್ಟಪಡುತ್ತಿರುವುದನ್ನು ನೋಡಿದ ಮುಸ್ಲಿಂ ಉದ್ಯಮಿಯೊಬ್ಬರು ಬೆಂಗಳೂರು ಹೊರವಲಯದಲ್ಲಿರುವ ಹೊಸಕೋಟೆ ಶ್ರೀ ವೀರಾಂಜನೇಯ ಸ್ವಾಮಿ ದೇವಸ್ಥಾನಕ್ಕೆ ಸುಮಾರು 1 ಕೋಟಿ ಮೌಲ್ಯದ 1650 ಚದರ ಅಡಿ ಜಾಗವನ್ನ ದಾನ ಮಾಡಿದ್ದಾರೆ.

ಈ ದೇವಾಲಯವು ಬೆಂಗಳೂರಿನಿಂದ 40 ಕಿಲೋಮೀಟರ್​ ದೂರದಲ್ಲಿದೆ. ವೈಟ್​ಫೀಲ್ಡ್​​ನಲ್ಲಿ ಸದ್ಯ ಐಟಿ ಕಂಪನಿಗಳು ಹೆಚ್ಚಾಗಿ ತಲೆಯೆತ್ತುತ್ತಿದೆ. ಹೀಗಾಗಿ ಹೊಸಕೋಟೆ ಧೂಳಿನ ಪಟ್ಟಣವಾಗಿ ಮಾರ್ಪಾಡಾಗಿದೆ.

ವಾಲಗೇರಪುರದ ಶ್ರೀ ವೀರಾಂಜನೇಯಸ್ವಾಮಿ ದೇವಾಲಯ ರಾಷ್ಟ್ರೀಯ ಹೆದ್ದಾರಿ ನಿರ್ಮಾಣಕ್ಕೆ ಜಾಗ ಬಿಟ್ಟುಕೊಡಬೇಕು ಎಂದು ಸರ್ಕಾರ ಆದೇಶ ಮಾಡಿತ್ತು.

ಹೀಗಾಗಿ ದೇಗುಲದ ಟ್ರಸ್ಟ್​ ಸುಮಾರು ಮೂರು ದಶಕಗಳ ಹಿಂದೆ ನಿರ್ಮಾಣವಾದ ದೇಗುಲದ ಹಿಂಭಾಗದಲ್ಲಿರುವ ಮೂರು ಎಕರೆ ಜಾಗವನ್ನ ಬಿಟ್ಟುಕೊಟ್ಟಿತ್ತು. ಹೀಗಾಗಿ ಇಕ್ಕಟ್ಟಿನಲ್ಲಿ ಸಿಲುಕಿದ್ದ ಈ ದೇವಾಲಯಕ್ಕೆ ಬಾಷಾ ತಮ್ಮ ಜಾಗವನ್ನ ಬಿಟ್ಟುಕೊಡುವ ಮೂಲಕ ಹಿಂದೂ – ಮುಸ್ಲಿಂ ಸೌಹಾರ್ದತೆಯನ್ನು ಮೆರೆದಿದ್ದಾರೆ.