ಲಗೇಜ್​ ಭಾರ ಕಡಿಮೆ ಮಾಡಿಕೊಳ್ಳಲು ಅಫ್ಘಾನ್ ಯುವಕರ ಮಾಸ್ಟರ್​ ಪ್ಲಾನ್…!

ವರ್ಷಾನುಗಟ್ಟಲೇ ಕಾಲೇಜು ಹಾಸ್ಟೆಲ್​​ನಲ್ಲಿ ನೆಲೆಸಿ ಬಳಿಕ ಅದನ್ನ ಖಾಲಿ ಮಾಡಿಕೊಂಡು ಲಗೇಜ್​ ಸಮೇತ ಮನೆಗೆ ಹೋಗೋದು ಅಂದರೆ ಬಹಳ ಕಷ್ಟದ ಕೆಲಸ. ಅದರಲ್ಲೂ ವಿಮಾನದಲ್ಲಿ ಈ ಎಲ್ಲ ಲಗೇಜ್​ಗಳನ್ನ ಹೊತ್ತುಕ್ಕೊಂಡು ಹೋಗೋ ಕಷ್ಟ ಅನುಭವಿಸಿದವನಿಗೇ ಗೊತ್ತು .

ಆದರೆ ಬೆಂಗಳೂರಿನಲ್ಲಿ ವ್ಯಾಸಂಗ ಪೂರ್ಣಗೊಳಿಸಿದ ಅಫ್ಘಾನಿಸ್ತಾನದ ಇಬ್ಬರು ಯುವಕರು ಈ ಸಮಸ್ಯೆಯಿಂದ ಪಾರಾಗೋಕೆ ಭರ್ಜರಿ ಪ್ಲಾನ್​ ಮಾಡಿದ್ದಾರೆ.

21 ಹಾಗೂ 27 ವರ್ಷದ ಇಬ್ಬರು ಯುವಕರು ವಿದೇಶಿ ವಿದ್ಯಾರ್ಥಿಗಳ ಮಳಿಗೆಯನ್ನ ಆರಂಭಿಸಿದ್ದಾರೆ. ಚರ್ಚ್​ ಸ್ಟ್ರೀಟ್​ನಲ್ಲಿರುವ ಈ ಅಂಗಡಿಯಲ್ಲಿ ಇಬ್ಬರು ಯುವಕರು ಮನೆಗೆ ಸಾಗಿಸಲು ಕಷ್ಟವಾಗುವಂತಹ ವಸ್ತುಗಳನ್ನ ಮಾರಾಟಕ್ಕೆ ಇಟ್ಟಿದ್ದಾರೆ.

ರೇಷ್ಮೆ ಶಾಲುಗಳಿಂದ ಹಿಡಿದು ಅಪ್ಘಾನಿ ಆಭರಣಗಳು ಸೇರಿದಂತೆ ಮುಂದೆ ತಮ್ಮೂರಿನಲ್ಲೇ ಖರೀದಿಸಲು ಸಾಧ್ಯವಾಗುವಂತಹ ವಸ್ತುಗಳನ್ನ ಯುವಕರು ಮಾರಾಟಕ್ಕಿಟ್ಟಿದ್ದಾರೆ. ಈ ಮೂಲಕ ತಮ್ಮ ಲಗೇಜ್​ ತೂಕವನ್ನ ಇಳಿಸೋಕೆ ಪ್ಲಾನ್​ ಮಾಡಿದ್ದಾರೆ.

ಇನ್ನು ಈ ವಿಚಾರವಾಗಿ ಮಾತನಾಡಿದ ಯುವಕರು, ನಾವು ಈ ವಸ್ತುಗಳನ್ನ ಅನಾಥಾಶ್ರಮಕ್ಕೆ ಕೊಡಬೇಕು ಎಂದು ತೀರ್ಮಾನ ಮಾಡಿದ್ದೆವು. ಆದರೆ ಇದರಲ್ಲಿ ಅನೇಕ ವಸ್ತುಗಳು ಅನಾಥಶ್ರಮದಲ್ಲಿ ಬಳಕೆ ಮಾಡುವಂತದ್ದಲ್ಲ. ಹೀಗಾಗಿ ಇವುಗಳನ್ನ ಮಾರಾಟ ಮಾಡುವ ನಿರ್ಧಾರಕ್ಕೆ ಬಂದೆವು. ಮಾರಾಟದಿಂದ ಬಂದ ಹಣದಲ್ಲಿ ಒಂದು ಭಾಗವನ್ನ ಅನಾಥಾಶ್ರಮಕ್ಕೆ ನೀಡಲಿದ್ದೇವೆ ಎಂದು ಹೇಳಿದ್ರು.