ಆನೆಮರಿಯ ತುಂಟಾಟದ ವಿಡಿಯೋ ವೈರಲ್

ಸಾಧಾರಣವಾಗಿ ಸಾಕುಪ್ರಾಣಿಗಳಲ್ಲಿ ಕಂಡುಬರುವ ಈ ತುಂಟಾಟಗಳು ವನ್ಯಜೀವಿಗಳಲ್ಲೂ ಅಪರೂಪಕ್ಕೊಮ್ಮೆ ಕಾಣುತ್ತದೆ‌.

ಐಎಫ್ಎಸ್ ಅಧಿಕಾರಿ ಸುಶಾಂತಾ ನಂದ ಟ್ವೀಟ್ ಮಾಡಿರುವ ಅಂತಹುದೇ ಒಂದು ಮುದ್ದಾದ ವಿಡಿಯೋ ನೆಟ್ಟಿಗರನ್ನು ಸೆಳೆದಿದೆ. 47,100 ಜನರು ವಿಡಿಯೋ ವೀಕ್ಷಿಸಿದ್ದು, 3,400 ಮಂದಿ ಮೆಚ್ಚಿಕೊಂಡಿರುವುದೂ ಅಲ್ಲದೆ, 468 ಮಂದಿ ರೀಟ್ವೀಟ್ ಮಾಡಿದ್ದಾರೆ.

ಆನೆಯ ಮರಿಯೊಂದು ತನ್ನ ಅಗಲವಾದ ಕಿವಿ, ಸೊಂಡಿಲನ್ನು ಆಡಿಸುತ್ತಾ ನೀರಿನ ಬಳಿಗೆ ಬರುತ್ತದೆ‌. ಸೊಂಡಿಲಿನಿಂದ ನೀರು ತೆಗೆದುಕೊಂಡು ಲಘುಬಗೆಯ ಹೆಜ್ಜೆ ಇಟ್ಟು ಒಂಟೆ ಮರಿಯತ್ತ ಓಡುತ್ತದೆ.

ಮುಖ ತಿರುಗಿಸಿ ನಿಂತಿರುವ ಒಂಟೆ ಮರಿಯ ಮೇಲೆ ಸೊಂಡಿಲಿನಿಂದ ನೀರು ಸಿಂಪಡಿಸುವ ಆನೆಮರಿ, ತಾನೇನೋ ಸಾಹಸ ಮೆರೆದಂತೆ, ಒಂಟೆಮರಿಯನ್ನು ಕೆಣಕಿದಂತೆ ನಗೆ ಬೀರುತ್ತದೆ.