ಕೊರೊನಾ ಮಾರ್ಗಸೂಚಿ ಉಲ್ಲಂಘಿಸಿದ ಪ್ರಧಾನಿಗೆ ದಂಡ ವಿಧಿಸಿದ ಪೊಲೀಸರು..!

ಕೊರೊನಾ ಮಾರ್ಗಸೂಚಿಗಳನ್ನ ಉಲ್ಲಂಘಿಸಿದ ಹಿನ್ನೆಲೆ ನಾರ್ವೆ ದೇಶದ ಪೊಲೀಸರು ಸ್ವತಃ ಅಲ್ಲಿನ ಪ್ರಧಾನಿ ಎರ್ನಾ ಸೋಲ್​ಬರ್ಗ್​ಗೆ ದಂಡವನ್ನ ವಿಧಿಸಿದ್ದಾರೆ. ಹುಟ್ಟು ಹಬ್ಬದ ಸಂಭ್ರಮಾಚರಣೆ ನಿಮಿತ್ತ ಮನೆಯಲ್ಲೇ ಸಣ್ಣ ಔತಣಕೂಟ ಏರ್ಪಡಿಸಿದ್ದ ಪ್ರಧಾನಿ ಎರ್ನಾ ಸಾಮಾಜಿಕ ಅಂತರವನ್ನ ಉಲ್ಲಂಘಿಸಿದ್ದರು.

ನಾರ್ವೆ ಪ್ರಧಾನಿ ಎರ್ನಾ ಸೋಲ್​ಬರ್ಗ್​ರಿಂದ ದಂಡದ ರೂಪದಲ್ಲಿ 175764.25 ರೂಪಾಯಿ ವಸೂಲಿ ಮಾಡಲಾಗಿದೆ ಎಂದು ನಾರ್ವೆ ಪೊಲೀಸ್​ ಮುಖ್ಯಸ್ಥ ಒಲೆ ಸವೆರುಡ್​ ಮಾಹಿತಿ ನೀಡಿದ್ರು.

ಎರಡು ಬಾರಿ ದೇಶದ ಪ್ರಧಾನಿಯಾಗಿ ಸೇವೆ ಸಲ್ಲಿಸುತ್ತಿರುವ ಎರ್ನಾ ತಮ್ಮ 60ನೇ ವರ್ಷದ ಜನ್ಮದಿನದ ಪ್ರಯುಕ್ತ 13 ಮಂದಿ ಕುಟುಂಬಸ್ಥರಿಗೆ ಔತಣ ಕೂಟವನ್ನ ಏರ್ಪಡಿಸಿದ್ದರು. ಆದರೆ ಕೊರೊನಾ ವೈರಸ್​ ಸೋಂಕು ಹರಡುವಿಕೆ ತಪ್ಪಿಸುವುದಕ್ಕೋಸ್ಕರ ನಾರ್ವೆಯಲ್ಲಿ 10ಕ್ಕಿಂತ ಹೆಚ್ಚು ಮಂದಿ ಒಂದೆಡೆ ಸೇರೋದನ್ನ ನಿರ್ಬಂಧಿಸಲಾಗಿದೆ.

ಇಂತಹ ಹೆಚ್ಚಿನ ಪ್ರಕರಣದಲ್ಲಿ ಪೊಲೀಸರು ದಂಡ ವಿಧಿಸೋದಿಲ್ಲವಾದರೂ ಸಹ ನಿರ್ಬಂಧಗಳನ್ನ ರೂಪಿಸುವ ಸರ್ಕಾರದ ಮುಖ್ಯಸ್ಥರೇ ಈ ರೀತಿ ಮಾಡೋದು ತಪ್ಪು ಎಂಬ ಕಾರಣಕ್ಕೆ ಫೈನ್​ ಹಾಕಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಕಾನೂನಿನ ಮುಂದೆ ಎಲ್ಲರೂ ಸಮಾನರು ಎಂದು ಹೇಳುವ ಮೂಲಕ​ ಪ್ರಧಾನಿಗೆ ದಂಡ ಹಾಕಿದ್ದನ್ನ ಸಮರ್ಥಿಸಿಕೊಂಡಿದ್ದಾರೆ.