ಅಚ್ಚರಿಗೆ ಕಾರಣವಾಗಿದೆ ಕೊರೊನಾ ಕಾಲದಲ್ಲಿನ ಈ ಫೋಟೋ

ಕೊರೊನಾ ವೈರಸ್​ ಮಹಾಮಾರಿಗೆ ವಿಶ್ವದ ದೊಡ್ಡ ದೊಡ್ಡ ರಾಷ್ಟ್ರಗಳೇ ತಲೆಬಾಗಿಸಿವೆ. ಲಸಿಕೆ ಇನ್ನೂ ಪ್ರಯೋಗ ಹಂತದಲ್ಲೇ ಇರೋದ್ರಿಂದ ಎಲ್ಲ ದೇಶಗಳಲ್ಲೂ ಸಾಮಾಜಿಕ ಅಂತರ, ಮಾಸ್ಕ್​​ಗಳ ಬಳಕೆ ಕಡ್ಡಾಯವಾಗಿ ಹೋಗಿದೆ. ಆದರೆ ನ್ಯೂಜಿಲೆಂಡ್​ನಲ್ಲಿ ಮಾತ್ರ ಜನತೆ ಸಾಮಾಜಿಕ ಅಂತರವನ್ನೆಲ್ಲ ಮರೆತು ಸಹಜ ಸ್ಥಿತಿಗೆ ಮರಳಿದಂತೆ ಕಾಣ್ತಿದೆ.

ಭಾನುವಾರ ನ್ಯೂಜಿಲೆಂಡ್​ನ ವೆಲ್ಲಿಂಗ್ಟನ್​​ ಕ್ರೀಡಾಂಗಣದಲ್ಲಿ ರಗ್ಬಿ ಕ್ರೀಡಾ ಆಯೋಜಿಸಲಾಗಿತ್ತು. ಈ ಆಟವನ್ನ ವೀಕ್ಷಿಸೋಕೆ ಕ್ರೀಡಾಂಗಣದಲ್ಲಿ 30 ಸಾವಿರಕ್ಕೂ ಹೆಚ್ಚು ಅಭಿಮಾನಿಗಳು ಜಮಾಯಿಸಿದ್ದಾರೆ. ಸಾಮಾಜಿಕ ಅಂತರವಿಲ್ಲದೇ, ಮಾಸ್ಕ್​ ಕೂಡ ಧರಿಸದೇ ಜನರು ಮೈದಾನದಲ್ಲಿರೋ ದೃಶ್ಯ ಸೋಶಿಯಲ್ ಮೀಡಿಯಾದಲ್ಲಿ ಸಖತ್​ ಸೌಂಡ್​ ಮಾಡಿದೆ.

ಜೂನ್​ ತಿಂಗಳಲ್ಲೇ ನ್ಯೂಜಿಲೆಂಡ್​ ಕೊರೊನಾ ಮುಕ್ತ ರಾಷ್ಟ್ರ ಅಂತಾ ಘೋಷಣೆ ಮಾಡಿಕೊಂಡಿತ್ತು. ಇದಾದ ಬಳಿಕ ಕೆಲವೆಡೆ ಕೊರೊನಾ ಸೋಂಕು ಕಾಣಿಸಿಕೊಂಡ ಬಳಿಕ ಆಕ್ಲೆಂಡ್​ನಲ್ಲಿ ಕಠಿಣ ಲಾಕ್​ಡೌನ್ ಜಾರಿಮಾಡಲಾಗಿತ್ತು. ಇದಾದ ಬಳಿಕ ತುಂಬಾ ಕಡಿಮೆ ಸಂಖ್ಯೆಯಲ್ಲಿ ಸೋಂಕು ಬೆಳಕಿಗೆ ಬಂದಿದೆ. ​

ಬರೋಬ್ಬರಿ 7 ತಿಂಗಳ ಬಳಿಕ ಮೊದಲ ರಗ್ಬಿ ಪಂದ್ಯ ಆಯೋಜಿಸಲಾಗಿತ್ತು ಅಂತಾ ಪತ್ರಿಕೆಗಳು ವರದಿ ಮಾಡಿವೆ. ಇನ್ನು ಈ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗ್ತಿದ್ದಂತೆ ಅನೇಕರು ನ್ಯೂಜಿಲೆಂಡ್​ ಸರ್ಕಾರದ ಕಾರ್ಯಕ್ಷಮತೆಯನ್ನ ಕೊಂಡಾಡಿದರೆ ಇನ್ನೂ ಕೆಲವರು ಕೊರೊನಾವನ್ನ ಕಡೆಗಣಿಸಬೇಡಿ ಅಂತಾ ಟೀಕಿಸಿದ್ದಾರೆ.