ಗೊರಿಲ್ಲಾಗಳಿಗೂ ವಕ್ಕರಿಸಿದ ಕೊರೊನಾ

ಕೊರೊನಾ ಸಾಂಕ್ರಾಮಿಕ ಕೇವಲ ಮನುಷ್ಯನಿಗೆ ಮಾತ್ರವಲ್ಲದೇ ಪ್ರಾಣಿಗಳಿಗೂ ಬರುತ್ತದೆ ಎಂಬ ವಿಚಾರ ಮತ್ತೊಮ್ಮೆ ಸಾಬೀತಾಗಿದೆ. ಕ್ಯಾಲಿಫೋರ್ನಿಯಾದ ಸ್ಯಾನ್​ ಡಿಯಾಗೋ ಮೃಗಾಲಯದಲ್ಲಿ 2 ಗೊರಿಲ್ಲಾಗಳು ಕೊರೊನಾ ಸೋಂಕಿಗೀಡಾಗಿವೆ.

ಎರಡು ಗೊರಿಲ್ಲಾಗಳಿಗೆ ಕಳೆದ ವಾರ ಕೆಮ್ಮು ಶುರುವಾಗಿತ್ತು. ಬಳಿಕ ಇವುಗಳನ್ನ ಕೊರೊನಾ ಪರೀಕ್ಷೆಗೆ ಒಳಪಡಿಸಲಾಗಿದ್ದು ಪರೀಕ್ಷಾ ವರದಿ ಪಾಸಿಟಿವ್​ ಬಂದಿದೆ. ಇದೀಗ ಮೂರನೇ ಗೊರಿಲ್ಲಾ ಕೂಡ ಕೊರೊನಾ ಲಕ್ಷಣಗಳನ್ನ ತೋರಿಸುತ್ತಿದೆ ಎಂದು ಮೃಗಾಲಯದ ಸಿಬ್ಬಂದಿ ಹೇಳಿದ್ದಾರೆ.

ರೋಗಲಕ್ಷಣ ಹೊಂದಿರದ ಸೋಂಕಿಗೆ ಒಳಗಾಗಿದ್ದ ಮೃಗಾಲಯದ ಕೆಲಸಗಾರರಿಂದ ಈ ವೈರಸ್​ ಗೊರಿಲ್ಲಾಗೆ ಬಂದಿರಬಹುದು ಎಂದು ಅಂದಾಜಿಸಲಾಗಿದೆ. ಆದರೆ ಈ ಬಗ್ಗೆ ಸ್ಪಷ್ಟ ಮಾಹಿತಿ ಲಭ್ಯವಾಗಿಲ್ಲ.

ಕೆಮ್ಮಿನ ಹೊರತಾಗಿ ಗೊರಿಲ್ಲಾದ ಆರೋಗ್ಯ ಸ್ಥಿರವಾಗಿದೆ ಎಂದು ವಿಶ್ವ ಪ್ರಸಿದ್ಧ ಮೃಗಾಲಯದ ಕಾರ್ಯನಿರ್ವಾಹಕ ನಿರ್ದೇಶಕಿ ಲಿಸಾ ಪೀಟರ್​​ಸನ್​ ಮಾಹಿತಿ ನೀಡಿದ್ದಾರೆ. ಗೊರಿಲ್ಲಾದ ಡಿಎನ್​ಎಗಳು 98 ಪ್ರತಿಶತದಷ್ಟು ಮಾನವನಿಗೆ ಹೋಲಿಕೆ ಹೊಂದಿರುತ್ತವೆ. ಮಾನವನ ಜಾತಿಗೆ ಸೇರಿದ ಈ ಸಸ್ತನಿಗಳು ಕೊರೊನಾ ಸೊಂಕಿಗೆ ಒಳಗಾಗುವ ಅಪಾಯ ಹೆಚ್ಚಿದೆ ಎಂದು ಅಧ್ಯಯನಗಳು ತಿಳಿಸಿವೆ. ಆದರೆ ಮನುಷ್ಯರಂತೆಯೇ ಗೊರಿಲ್ಲಾದ ಮೇಲೂ ಕೊರೊನಾ ಗಂಭೀರ ಪರಿಣಾಮ ಬೀರುತ್ತದೆಯೇ ಅನ್ನೋದ್ರ ಬಗ್ಗೆ ಸ್ಪಷ್ಟ ಮಾಹಿತಿ ಲಭ್ಯವಾಗಿಲ್ಲ.