ದಂಗಾಗಿಸುತ್ತೆ ಈ ಸಾರ್ವಜನಿಕ ಶೌಚಾಲಯದಲ್ಲಿರುವ ಐಷಾರಾಮಿ ಸೌಲಭ್ಯ

ದಿನ ಪತ್ರಿಕೆಗಳನ್ನ ಹೊಂದಿರುವ ಕಾಯುವಿಕೆ ಕೊಠಡಿ, ವೈ-ಫೈ ವ್ಯವಸ್ಥೆ, ಟಿವಿ ಹೀಗೆ ಸಾಕಷ್ಟು ಸೌಲಭ್ಯಗಳನ್ನ ಹೊಂದಿರುವ ಐಷಾರಾಮಿ ಸಾರ್ವಜನಿಕ ಶೌಚಾಲಯವು ಮುಂಬೈನ ಜುಹು ಗಲ್ಲಿಯಲ್ಲಿ ಲೋಕಾರ್ಪಣೆಗೊಂಡಿದೆ. ಬರೋಬ್ಬರಿ 4000 ಚದರ ಅಡಿ ವಿಸ್ತೀರ್ಣದಲ್ಲಿ ನಿರ್ಮಾಣಗೊಂಡಿರುವ 2 ಅಂತಸ್ತಿನ ಶೌಚಾಲಯ ಇದಾಗಿದೆ. ನೆಲ ಮಹಡಿಯಲ್ಲಿ 60 ಶೌಚಾಲಯಗಳಿದ್ದರೆ ಮೇಲ್ಮಹಡಿಯಲ್ಲಿ 28 ಶೌಚಾಲಯಗಳಿವೆ. ಈ ಸಾರ್ವಜನಿಕ ಶೌಚಾಲಯವನ್ನ ಬಿಎಂಸಿ ನಿರ್ಮಾಣ ಮಾಡಿದೆ.

ಈ ಸಾರ್ವಜನಿಕ ಶೌಚಾಲಯವು 60 ಸಾವಿರ ಕೊಳಗೇರಿ ನಿವಾಸಿಗಳನ್ನ ಗಮನದಲ್ಲಿಟ್ಟು ನಿರ್ಮಾಣ ಮಾಡಲಾಗಿದೆ. ಈ ಶೌಚಾಲಯದ ಅನಿಯಮಿತ ಬಳಕೆಗಾಗಿ ಪ್ರತಿ ಕುಟುಂಬವು ತಿಂಗಳಿಗೆ 60 ರೂಪಾಯಿ ಪಾವತಿ ಮಾಡಬೇಕು ಎಂದು ಬಿಎಂಸಿ ಹೇಳಿದೆ. ಮುಂಬೈ ಪ್ರಾದೇಶಿಕ ಕಾಂಗ್ರೆಸ್​ ಸಮಿತಿ ಅಧ್ಯಕ್ಷ ಭಾಯ್​ ಜಗ್ತಾಪ್​ ಈ ಸಾರ್ವಜನಿಕ ಶೌಚಾಲಯವನ್ನ ಉದ್ಘಾಟನೆ ಮಾಡಿದ್ದಾರೆ.

ಇದು ನಗರದ ಅತಿದೊಡ್ಡ ಸಾರ್ವಜನಿಕ ಶೌಚಾಲಯ ಮಾತ್ರವಲ್ಲ ಇದರ ಜೊತೆಯಲ್ಲಿ 24 ಗಂಟೆಯೂ ಸ್ವಚ್ಛತೆಗೆ ಆದ್ಯತೆ ನೀಡಲಾಗುತ್ತದೆ. ಮೇಲ್ಮಹಡಿ ಪುರುಷರ ವಿಭಾಗವಾಗಿದ್ದರೆ, ನೆಲಮಹಡಿ ಮಹಿಳೆಯರಿಗೆ ಎಂದು ಮೀಸಲಿಡಲಾಗಿದೆ. ಇದರ ಜೊತೆಯಲ್ಲಿ ನಾಲ್ಕು ಬ್ಲಾಕ್​ಗಳನ್ನ ವಿಕಲಾಂಗ ಚೇತನರಿಗೆ ನೀಡಲಾಗಿದೆ ಎಂದು ಕಾಂಗ್ರೆಸ್​ ಕಾರ್ಪೋರೇಟರ್​ ಮೆಹರ್​​ ಮೊಹ್ಸಿನ್​ ಹೈದರ್​ ಹೇಳಿದ್ರು.

ಮುಂಬೈನ ಟ್ರಾಫಿಕ್​​​ ಸಿಗ್ನಲ್​​​ಗಳಲ್ಲಿ 80 ಸುಸಜ್ಜಿತ ಹವಾನಿಯಂತ್ರಿತ ಮೊಬೈಲ್​ ಶೌಚಾಲಯಗಳ ವ್ಯಾನ್​ಗಳನ್ನ ಸ್ಥಾಪಿಸಲು ಬಿಎಂಸಿ ಸಿದ್ಧತೆ ನಡೆಸುತ್ತಿದೆ. ಆದರೆ ಕೊರೊನಾ ಕಾರಣದಿಂದಾಗಿ ಈ ಯೋಜನೆಯು ವಿಳಂಬಗತಿಯಲ್ಲಿ ಸಾಗುತ್ತಿದೆ.