ಅಫ್ಘನ್​ ಜನರ ನೆರವಿಗೆ ನಿಂತ ಭಾರತದ ಸಹೋದರಿಯರು..! ನಿರಾಶ್ರಿತರ ಸ್ಥಳಾಂತರಕ್ಕೆ ಕೋಟಿಗಟ್ಟಲೇ ಹಣ ನೆರವು

ಅಪ್ಘಾನಿಸ್ತಾನವು ತಾಲಿಬಾನ್​ ಆಡಳಿತದಲ್ಲಿ ನರಕವೇ ಆಗಿದೆ. ಅಲ್ಲಿ ಸಂಕಷ್ಟ ಪಡುತ್ತಿರುವವರ ಪಾಲಿಗೆ ಭಾರತದ ಸಹೋದರಿಯರು ಸಹಾಯ ಹಸ್ತ ಚಾಚಿದ್ದಾರೆ. ಅಫ್ಘಾನಿಸ್ತಾನದಿಂದ 92 ಮಂದಿ ನಿರಾಶ್ರಿತರು, ಐದು ನಾಯಿಗಳು ಹಾಗೂ 1 ಬೆಕ್ಕನ್ನು ಸ್ಥಳಾಂತರಿಸಲು ಈ ಸಹೋದರಿಯರು ಕೋಟಿಗಟ್ಟಲೇ ಹಣ ಖರ್ಚು ಮಾಡಿದ್ದಾರೆ. ಇವರೆಲ್ಲರನ್ನು ಇಸ್ಲಾಮಾಬಾದ್​ಗೆ ಸುರಕ್ಷಿತವಾಗಿ ಸ್ಥಳಾಂತರಿಸಲಾಗಿದ್ದು ಮೂರನೇ ದೇಶಕ್ಕೆ ಇನ್ನೇನು ಕೆಲವೇ ದಿನಗಳಲ್ಲಿ ತೆರಳಲಿದ್ದಾರೆ.

ಜಿಬ್ರಾಲ್ಟರ್​ನಲ್ಲಿ ಓರ್ವ ಸಹೋದರಿ ವಾಸವಾಗಿದ್ದರೆ ಮತ್ತೊಬ್ಬ ಸಹೋದರಿ ಭಾರತದಲ್ಲಿ ನೆಲೆಸಿದ್ದಾರೆ. ವಿಭಜನೆಯ ಸಂದರ್ಭದಲ್ಲಿ ಇವರಿಬ್ಬರ ಮೃತ ತಾಯಿ ಪಾಕಿಸ್ತಾನದಿಂದ ಭಾರತಕ್ಕೆ ಪಲಾಯನ ಮಾಡಿದ್ದರು. ಹೀಗಾಗಿ ಇವರಿಗೆ ಅಪ್ಘನ್​ನ ಜನರು ಪ್ರಸ್ತುತ ಎಷ್ಟು ಸಂಕಷ್ಟದಲ್ಲಿ ಇರಬಹುದು ಎಂಬ ಅರಿವಿದೆ.

ಅಪ್ಘನ್​​ನಲ್ಲಿ ನೆಲೆಸಿದ ಜನರನ್ನು ಸ್ಥಳಾಂತರಿಸಲು ಈ ಸಹೋದರಿಯರು 3 ಕೋಟಿಗೂ ಅಧಿಕ ಮೊತ್ತ ಖರ್ಚು ಮಾಡಿದ್ದಾರೆ. ಇದಕ್ಕೆ ಅನೇಕರು ದೇಣಿಗೆ ರೂಪದಲ್ಲಿ ಸಹಾಯ ಮಾಡಿದ್ದಾರೆ. ಆದರೆ 1.5 ಕೋಟಿ ರೂಪಾಯಿ ಹಣವನ್ನು ಈ ಸಹೋದರಿಯರು ವೈಯಕ್ತಿಕ ರೂಪದಲ್ಲಿ ನೀಡಿದ್ದಾರೆ.

ಆಪರೇಷನ್​ ಮ್ಯಾಜಿಕ್​ ಕಾರ್ಪೆಟ್​ ಎಂಬ ಹೆಸರಿನಲ್ಲಿ 30 ಮಹಿಳೆಯರು, 32 ಮಕ್ಕಳು ಹಾಗೂ ಆರು ಪ್ರಾಣಿಗಳನ್ನು ಕಾಬೂಲ್​ನಿಂದ ಇಸ್ಲಾಮಾಬಾದ್​​ಗೆ ಸ್ಥಳಾಂತರಿಸಲಾಗಿದೆ. ಈ ಸ್ಥಳಾಂತರ ಕಾರ್ಯದಲ್ಲಿ 90 ವರ್ಷದ ಮಹಿಳೆ ಕೂಡ ಭಾಗಿಯಾಗಿದ್ದಾರೆ. ಹಾಗೂ ಓರ್ವ ಮಹಿಳೆ ಈ ಸಂದರ್ಭದಲ್ಲಿ ಮಗುವಿಗೆ ಜನ್ಮ ನೀಡಿದ್ದಾರೆ.