ಬ್ಯಾಡ್ಮಿಂಟನ್ ಪಂದ್ಯ ಗೆದ್ದ ಭಾರತೀಯ ಶೆಟ್ಲರ್ ಗೆ ಪದಕ ಸ್ವೀಕಾರ ವೇಳೆ ಹಿಜಾಬ್ ಧರಿಸುವಂತೆ ಒತ್ತಾಯ

19 ವರ್ಷದ ಭಾರತೀಯ ಬ್ಯಾಡ್ಮಿಂಟನ್ ಆಟಗಾರ್ತಿ ತಾನ್ಯಾ ಹೇಮಂತ್ ಅವರು ಇರಾನ್ ಫಜ್ರ್ ಇಂಟರ್ ನ್ಯಾಷನಲ್ ಚಾಲೆಂಜ್‌ ಬ್ಯಾಡ್ಮಿಂಟನ್ ಟೂರ್ನಮೆಂಟ್ ಗೆದ್ದಿದ್ದು ಪದಕ ಸ್ವೀಕಾರ ವೇಳೆ ಹಿಜಾಬ್ ಧರಿಸುವಂತೆ ಅವರನ್ನು ಒತ್ತಾಯಿಸಲಾಗಿದೆ.

ಫೈನಲ್‌ನಲ್ಲಿ ಜಯಗಳಿಸಿದ ನಂತರ ತಾನ್ಯಾ ಹೇಮಂತ್ ಹಿಜಾಬ್ ಧರಿಸಿ ಪದಕ ಸಮಾರಂಭಕ್ಕೆ ಹಾಜರಾಗಬೇಕಾಯಿತು ಎಂದು ವರದಿಯಾಗಿದೆ. ಸಂಘಟಕರು ತಾನ್ಯಾ ಅವರಿಗೆ ಹಿಜಾಬ್ ಧರಿಸುವಂತೆ ಕೇಳಿಕೊಂಡಿದ್ದರು. ಆದರೆ ಪಂದ್ಯಾವಳಿಯ ಪ್ರಾಸ್ಪೆಕ್ಟಸ್‌ನಲ್ಲಿ ಡ್ರೆಸ್ ಕೋಡ್ ಬಗ್ಗೆ ಯಾವುದೇ ಉಲ್ಲೇಖವಿಲ್ಲ.‌

ಟೆಹ್ರಾನ್‌ನಲ್ಲಿ ಮಹಿಳೆಯರು ಹೊರನಡೆಯುವಾಗ ಹಿಜಾಬ್ ಅತ್ಯಗತ್ಯ ಎಂದು ತಿಳಿದಿದ್ದರೂ, ಪಂದ್ಯಾವಳಿಯ ಸಮಯದಲ್ಲಿ ಅವುಗಳ ಬಳಕೆಯ ಬಗ್ಗೆ ಯಾವುದೇ ನಿರ್ದಿಷ್ಟ ಉಲ್ಲೇಖವಿರಲಿಲ್ಲ.

ಫೆಬ್ರವರಿ 05, 2023 ರಂದು ಭಾನುವಾರ ಟೆಹ್ರಾನ್‌ನಲ್ಲಿ ನಡೆದ 2023 ರ ಇರಾನ್ ಫಜ್ರ್ ಇಂಟರ್ನ್ಯಾಷನಲ್ ಚಾಲೆಂಜ್‌ನಲ್ಲಿ ತಾನ್ಯಾ ಸಹ ಭಾರತೀಯ ಶಟ್ಲರ್ ಮತ್ತು ಹಾಲಿ ಚಾಂಪಿಯನ್ ತಸ್ನಿಮ್ ಮಿರ್ ಅವರನ್ನು ಸೋಲಿಸಿ ಸಾಧನೆ ಮಾಡಿದರು.

ಈ ಟೂರ್ನಿಯ ಅಗ್ರ ಶ್ರೇಯಾಂಕಿತೆಯೂ ಆಗಿದ್ದ 17ರ ಹರೆಯದ ತಸ್ನಿಮ್, ಈ ಟೈನಲ್ಲಿ ತಾನ್ಯಾಗೆ ಸರಿಸಾಟಿಯಾಗಲಿಲ್ಲ. ತಾನ್ಯಾ ಆರಂಭದಿಂದಲೂ ಪಂದ್ಯವನ್ನು ನಿಯಂತ್ರಿಸಿದರು ಮತ್ತು ಮೊದಲ ಗೇಮ್ ಅನ್ನು 21-7 ರ ದೊಡ್ಡ ಅಂತರದಿಂದ ಗೆದ್ದರು. ನಂತರ ಅವರು ತಮ್ಮ ಪ್ರಾಬಲ್ಯವನ್ನು ಮುಂದುವರೆಸಿ ಎರಡನೇ ಗೇಮ್ ಅನ್ನು ಅದ್ಭುತ ರೀತಿಯಲ್ಲಿ (21-11) ಗೆದ್ದ ನಂತರ ಪ್ರಶಸ್ತಿಯನ್ನು ಭದ್ರಪಡಿಸಿಕೊಂಡರು.