ಕೋವಿಡ್ ಸಂಕಷ್ಟದ ನಡುವೆಯೂ ಮುಂಚೂಣಿ ಕಾರ್ಯಕರ್ತರಾಗಿ ಸೇವೆ ಸಲ್ಲಿಸಿದ್ದ ತಮಿಳುನಾಡಿನ 700 ಪೌರ ಕಾರ್ಮಿಕರನ್ನ ಯಾವುದೇ ಸೂಚನೆ ನೀಡದೇ ಕೆಲಸದಿಂದ ಕಿತ್ತೆಸೆಯಲಾಗಿದೆ. ಪೊಂಗಲ್ ಹಬ್ಬದ ಸಂಭ್ರಮದಲ್ಲಿರಬೇಕಿದ್ದ ಕಾರ್ಮಿಕರಿಗೆ ಚೆನ್ನೈ ಕಾರ್ಪೋರೇಶನ್ನ ಈ ನಿರ್ಧಾರ ಬರಸಿಡಿಲು ಬಡಿದಂತಾಗಿದೆ.
ಕೋವಿಡ್ 19 ನಡುವೆಯೂ ಜೀವದ ಹಂಗು ತೊರೆದು ಕೆಲಸ ಮಾಡಿದ್ದ ಕಾರ್ಮಿಕರಿಗೆ ಚೆನ್ನೈ ಕಾರ್ಪೋರೇಷನ್ ಈ ಶಿಕ್ಷೆಯನ್ನ ನೀಡಿದೆ. ಕೆಲಸ ಕಳೆದುಕೊಂಡವರಲ್ಲಿ ಕಳೆದ ಕೆಲ ದಶಕಗಳಿಂದ ಕೆಲಸ ಸಲ್ಲಿಸುತ್ತಿದ್ದ ಪೌರ ಕಾರ್ಮಿಕರೂ ಸೇರಿದ್ದಾರೆ.
ಚೆನ್ನೈ ಕಾರ್ಪೋರೇಷನ್ ಸ್ವಚ್ಛತೆ ಹಾಗೂ ತ್ಯಾಜ್ಯ ನಿರ್ವಹಣಾ ಕೆಲಸವನ್ನ ಖಾಸಗಿ ಕಾಂಟ್ರ್ಯಾಕ್ಟರ್ಗಳಿಗೆ ನೀಡಿದ ಬಳಿಕ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಹೇಳಲಾಗ್ತಿದೆ. ಇನ್ನು ಈ ಬಗ್ಗೆ ಮಾತನಾಡಿದ ಪೌರ ಕಾರ್ಮಿಕರೊಬ್ಬರು, ಕೊರೊನಾ ವ್ಯಾಪಕವಾಗಿ ಹರಡಲು ಆರಂಭವಾಗಿದ್ದ ಸಂದರ್ಭದಲ್ಲೂ ನಾವು ಕೆಲಸವನ್ನ ಮುಂದುವರಿಸಿದ್ದೆವು. ಜೀವದ ಹಂಗನ್ನ ತೊರೆದು ಕೊರೊನಾ ರೋಗಿಗಳು ಇರುತ್ತಿದ್ದ ವಾರ್ಡ್ಗಳಿಗೂ ಹೋಗಿ ಕೆಲಸ ಮಾಡಿದ್ದೇವೆ ಎಂದು ಹೇಳಿದ್ರು.
ಇದೇ ವಿಚಾರವಾಗಿ ಮಾತನಾಡಿದ ಮತ್ತೊಬ್ಬ ಪೌರ ಕಾರ್ಮಿಕೆ, ಪೌರ ಕಾರ್ಮಿಕರಾಗಿದ್ದ ನನ್ನ ಪತಿ ನಿಧನರಾದ ಬಳಿಕ ನನಗೆ ಈ ಕೆಲಸವನ್ನ ಕೊಡಲಾಗಿತ್ತು. ನಾನು ಕೊರೊನಾ ಸಂಕಷ್ಟ, ಸೈಕ್ಲೋನ್ ಕಾಟದ ನಡುವೆಯೂ ನನ್ನ ಕರ್ತವ್ಯವನ್ನ ನಿರ್ವಹಿಸಿದ್ದೆ. ಆದರೂ ನಮಗೆ ಈ ರೀತಿ ಮೋಸ ಮಾಡಲಾಗಿದೆ ಎಂದು ಆಕ್ರೋಶ ಹೊರಹಾಕಿದ್ರು.
ಈ ಸಂಬಂಧ ಟ್ವೀಟ್ ಮಾಡಿರುವ ಡಿಎಂಕೆ ಸಂಸದ ಕನಿಮೋಳಿ, ತಮಿಳುನಾಡು ಪಳನಿಸ್ವಾಮಿ ಸರ್ಕಾರದ ವಿರುದ್ಧ ಆಕ್ರೋಶ ಹೊರಹಾಕಿದ್ದಾರೆ. ಕೋವಿಡ್ ಯೋಧರನ್ನ ಈ ರೀತಿ ನಡೆಸುಕೊಳ್ಳುತ್ತಿರುವ ಕ್ರಮ ಸರಿ ಇಲ್ಲ ಎಂದು ಖಂಡಿಸಿದ್ದಾರೆ. ತ್ಯಾಜ್ಯ ನಿರ್ವಹಣೆ ವಿಭಾಗ ಖಾಸಗಿ ವಿಭಾಗಕ್ಕೆ ಶಿಫ್ಟ್ ಆಗ್ತಾ ಇರೋದ್ರಿಂದ ಭವಿಷ್ಯದಲ್ಲಿ 3000 ಮಂದಿ ಉದ್ಯೋಗ ಕಡಿತವಾಗಲಿದೆ ಎಂದು ಅಂದಾಜಿಸಲಾಗಿದೆ.
Loading ...