ದೇಶದಲ್ಲಿ ಕೊರೊನಾ ಚಿಕಿತ್ಸೆಗೆ ವೆಂಟಿಲೇಟರ್, ಪ್ಲಾಸ್ಮಾ ಹಾಗೂ ಆಮ್ಲಜನಕದ ಕೊರತೆ ಉಂಟಾಗ್ತಾ ಇರೋದ್ರಿಂದ ಸಾಕಷ್ಟು ಮಂದಿ ಸಹಾಯಕ್ಕಾಗಿ ಸೋಶಿಯಲ್ ಮೀಡಿಯಾದ ಮೊರೆ ಹೋಗುತ್ತಿದ್ದಾರೆ.
ಇದೇ ರೀತಿ ಕುಟುಂಬಸ್ಥರಿಗೆ ವೆಂಟಿಲೇಟರ್ ಸೌಲಭ್ಯ ಹುಡುಕುತ್ತಿದ್ದ ಮಹಿಳೆ ಟ್ವಿಟರ್ನಲ್ಲಿ ತಮ್ಮ ಮೊಬೈಲ್ ಸಂಖ್ಯೆಯನ್ನ ಶೇರ್ ಮಾಡಿದ್ದರು. ಇದೀಗ ಆಕೆಯ ಮೊಬೈಲ್ ನಂಬರ್ಗೆ ಅಶ್ಲೀಲ ಫೋಟೋಗಳನ್ನ ಕಳುಹಿಸಲಾಗುತ್ತಿದೆಯಂತೆ.
ಕಳೆದ ವಾರ ಮುಂಬೈ ನಿವಾಸಿ ಶಾಶ್ವತಿ ಶಿವ ಎಂಬವರ ಕುಟುಂಬಸ್ಥರು ಕೋವಿಡ್ ಸೋಂಕಿಗೆ ಒಳಗಾಗಿದ್ದರು. ಕುಟುಂಬಸ್ಥರಿಗೆ ಯಾವುದೇ ಆಸ್ಪತ್ರೆಗಳಲ್ಲಿ ವೆಂಟಿಲೇಟರ್ ಸೌಲಭ್ಯ ದೊರೆಯದ ಕಾರಣ ಅವರು ಸಹಾಯಕ್ಕಾಗಿ ಸೋಶಿಯಲ್ ಮೀಡಿಯಾದ ಮೊರೆ ಹೋಗಿದ್ದರು.
ನಾನು ಯಾವಾಗಲು ಸೋಶಿಯಲ್ ಮೀಡಿಯಾದ ಶಕ್ತಿಯ ಬಗ್ಗೆ ನಂಬಿಕೆ ಇಟ್ಟಿದ್ದೆ. ಹೀಗಾಗಿ ನಾನು ಸೋಶಿಯಲ್ ಮೀಡಿಯಾದಲ್ಲಿ ವೆಂಟಿಲೇಟರ್ ಸೌಲಭ್ಯದ ಬಗ್ಗೆ ಮಾಹಿತಿಯನ್ನ ಕೇಳಿದ್ದೆ. ಈ ಟ್ವೀಟ್ ಮಾಡಿದ ಆರು ಗಂಟೆಯಲ್ಲಿ ನನಗೆ ವೆಂಟಿಲೇಟರ್ ಸೌಲಭ್ಯ ಸಿಕ್ಕಿತ್ತು ಎಂದು ಶಿವಾ ಬರೆದುಕೊಂಡಿದ್ದಾರೆ. ಆದರೆ ಕತೆ ಇಲ್ಲಿಗೆ ಮುಕ್ತಾಯವಾಗಿಲ್ಲ.
ಕುಟುಂಬಸ್ಥರ ಸ್ಥಿತಿ ಇನ್ನಷ್ಟು ಬಿಗಡಾಯಿಸಿದ್ದರಿಂದ ಆಕೆಗೆ ಪ್ಲಾಸ್ಮಾ ದಾನಿಗಳನ್ನ ಹುಡುಕುವ ಪರಿಸ್ಥಿತಿ ಎದುರಾಯ್ತು. ಹೀಗಾಗಿ ಶಾಶ್ವತಿ ಮತ್ತೊಮ್ಮೆ ಸೋಶಿಯಲ್ ಮೀಡಿಯಾದಲ್ಲಿ ಬೇಡಿಕೆಯನ್ನ ಇಟ್ಟರು. ಈ ಟ್ವೀಟ್ನ್ನು ಅನೇಕರು ಶೇರ್ ಮಾಡಿದ್ದಾರೆ. ಇದಾದ ಬಳಿಕ ಶಾಶ್ವತಿ ಮೊಬೈಲ್ಗೆ ಅನೇಕ ಕರೆಗಳು ಬರಲು ಆರಂಭಿಸಿದವು. ಆದರೆ ಅವರಿಗೆ ಪ್ಲಾಸ್ಮಾ ನೀಡುವ ಇರಾದೆ ಇರಲಿಲ್ಲ. ಬದಲಾಗಿ ಶಾಶ್ವತಿಗೆ ಲೈಂಗಿಕ ಕಿರುಕುಳ ನೀಡಲು ಆರಂಭಿಸಿದ್ದಾರೆ.
ನಾನು ಸಿಂಗಲ್ ಆಗಿದ್ದೇನಾ..? ನನ್ನ ಪ್ರೊಫೈಲ್ ಫೋಟೋವನ್ನ ಹೊಗೋಳೋದು, ಫೋನ್ನಲ್ಲೇ ಕಿಸ್ ಮಾಡೋದು ಹೀಗೆ ನನಗೆ ಕಿರುಕುಳ ಶುರುವಾಗುತ್ತಾ ಹೋಯ್ತು ಅಂತಾ ಶಾಶ್ವತಿ ಹೇಳಿದ್ದಾರೆ. ಇದು ಸಾಲದು ಎಂಬಂತೆ ಆಕೆಗೆ ವಿಡಿಯೋ ಕಾಲ್ ಮಾಡಿದ್ದಾರೆ ಮಾತ್ರವಲ್ಲದೇ ಕೆಲವರಂತೂ ಖಾಸಗಿ ಅಂಗದ ಫೋಟೋಗಳನ್ನೆಲ್ಲ ಈಕೆಗೆ ಕಳುಹಿಸಿದ್ದಾರಂತೆ.
ಈ ಬಗ್ಗೆ ಟ್ವಿಟರ್ನಲ್ಲಿ ಅಸಮಾಧಾನ ವ್ಯಕ್ತಪಡಿಸಿರುವ ಶಾಶ್ವತಿ ವೈದ್ಯಕೀಯ ತುರ್ತು ಪರಿಸ್ಥಿತಿಗಾಗಿ ಹೋರಾಡುತ್ತಿರುವ ಈ ಸಂದರ್ಭದಲ್ಲಿ ಕೆಲ ಪುರುಷರು ಈ ಕೆಲಸ ಮಾಡಿದ್ದಾರೆ ಎಂದು ಬರೆದುಕೊಂಡಿದ್ದಾರೆ. ಮಾತ್ರವಲ್ಲದೇ ಯಾವುದೇ ಕಾರಣಕ್ಕೂ ಸೋಶಿಯಲ್ ಮೀಡಿಯಾದಲ್ಲಿ ನಿಮ್ಮ ನಂಬರ್ ಶೇರ್ ಮಾಡಲೇಬೇಡಿ ಎಂದು ಕಿವಿಮಾತನ್ನ ಹೇಳಿದ್ದಾರೆ.
Loading ...