ಹೈದರಾಬಾದ್ ಮೂಲದ ಭಾರತ್ ಬಯೋಟೆಕ್ಗೆ ಸೇರಿದ ಕೋವಾಕ್ಸಿನ್ನ್ನು 12 ವರ್ಷ ಮೇಲ್ಪಟ್ಟ ಮಕ್ಕಳ ಮೇಲೂ ಕ್ಲಿನಿಕಲ್ ಪ್ರಯೋಗ ನಡೆಸಲು ಡ್ರಗ್ಸ್ ಕಂಟ್ರೋಲರ್ ಜನರಲ್ ಆಫ್ ಇಂಡಿಯಾ ಅನುಮತಿ ನೀಡಿದೆ. ಕೋವ್ಯಾಕ್ಸಿನ್ ಪ್ರಸ್ತುತ ತನ್ನ ಮೂರನೇ ಹಂತದ ಕ್ಲಿನಿಕಲ್ ಪ್ರಯೋಗ ನಡೆಸುತ್ತಿದೆ.
ಭಾರತದಲ್ಲಿ ಕೋ ವ್ಯಾಕ್ಸಿನ್ ಮಾರಾಟ ಹಾಗೂ ವಿತರಣೆಗೆ ಅನುಮತಿ ನೀಡಿರುವ ಡಿಸಿಜಿಐ ಲಸಿಕೆ 1 ಹಾಗೂ 2ನೇ ಕ್ಲಿನಿಕಲ್ ಪ್ರಯೋಗ ಆಧರಿಸಿ ಅದರ ಸುರಕ್ಷತೆ, ಪರಿಣಾಮಕಾರತ್ವದ ದಾಖಲೆಗಳನ್ನ ಸಲ್ಲಿಸುವಂತೆ ಭಾರತ್ ಬಯೋಟೆಕ್ಗೆ ಸೂಚನೆ ನೀಡಿದೆ.
ಇದು ಮಾತ್ರವಲ್ಲದೇ ಅಪಾಯ ನಿರ್ವಹಣೆಯನ್ನ ನಿಯಂತ್ರಿಸಲು ಭಾರತ್ ಬಯೋಟೆಕ್ ಮಾಡಿಕೊಂಡಿರುವ ಯೋಜನೆಗಳ ಬಗ್ಗೆಯೂ ಮಾಹಿತಿ ನೀಡುವಂತೆ ಡಿಸಿಜಿಐ ಕೇಳಿದೆ. ಅಲ್ಲದೇ ಲಸಿಕೆಯ ಅಗತ್ಯ ಮಾಹಿತಿ, ಸೂಚನೆಗಳನ್ನ ಅಧಿಕೃತ ವೆಬ್ಸೈಟ್ನಲ್ಲಿ ಪ್ರಸಾರ ಮಾಡುವಂತೆ ಹೇಳಿದೆ.
ಆಕ್ಸ್ಫರ್ಡ್ – ಆಸ್ಟ್ರೆಜೆನೆಕಾದ ಕೋವಿಶೀಲ್ಡ್ ಲಸಿಕೆ ಜೊತೆಗೆ ಭಾರತದಲ್ಲಿ ಕೋವ್ಯಾಕ್ಸಿನ್ ತುರ್ತು ಬಳಕೆಗೂ ಅನುಮತಿ ನೀಡಲಾಗಿದೆ. ಕೇಂದ್ರದ ಈ ನಿರ್ಧಾರದ ಬಗ್ಗೆ ಅನೇಕ ತಜ್ಞರು ಪ್ರಶ್ನೆ ಎತ್ತಿದ್ದರು. ಕೋವ್ಯಾಕ್ಸಿನ್ ಸುರಕ್ಷತೆ ಹಾಗೂ ಪರಿಣಾಮಕಾರತ್ವದ ಬಗ್ಗೆ ಸಂಪೂರ್ಣ ಪರಿಶೀಲನೆ ನಡೆಸಿದ ಬಳಿಕವೇ ಲಸಿಕೆಗೆ ತುರ್ತು ಅನುಮೋದನೆ ನೀಡಲಾಗಿದೆ ಎಂದು ಡಿಸಿಜಿಐ ಸ್ಪಷ್ಟನೆ ನೀಡಿದೆ.