ಕೊರೋನಾ ಲಾಕ್ ಡೌನ್ ಸಂದರ್ಭದಲ್ಲಿ ಸಂಕಷ್ಟದಲ್ಲಿ ಸಿಲುಕಿರುವವರಿಗೆ ಜನರು ತಮ್ಮಿಂದಾದ ಸಹಾಯ ಮಾಡಿದ್ದಾರೆ. ಕೆಲವರು ಪ್ರತಿನಿತ್ಯ ಊಟ ವಿತರಿಸಿದರೆ ಮತ್ತೆ ಕೆಲವರು ಔಷಧಿ, ದಿನಸಿಗಳನ್ನು ವಿತರಿಸಿದ್ದಾರೆ. ಇನ್ನು ಕೆಲವರು ವಾಹನಗಳ ಮೂಲಕ ವಲಸೆ ಕಾರ್ಮಿಕರನ್ನು ಮನೆಗೆ ಕಳಿಸಿದ್ದಾರೆ.
ಆದರೆ ತನ್ನಿಂದ ಈ ರೀತಿಯ ಸೇವೆ ಕಷ್ಟವೆಂದು ಸುಮ್ಮನೆ ಕೂರದ ಕೂಲಿ ಕಾರ್ಮಿಕನೊಬ್ಬ ವಲಸೆ ಕಾರ್ಮಿಕರ ಲಗ್ಗೇಜ್ ಗಳನ್ನು ಉಚಿತವಾಗಿ ಸಾಗಿಸಿ ನೆರವಾಗಿದ್ದಾರೆ.
ಲಕ್ನೋ ರೈಲ್ವೆ ನಿಲ್ದಾಣದಲ್ಲಿರುವ 80 ವರ್ಷದ ಕೂಲಿ ರೆಹಮಾನ್ ಈ ಕಾರ್ಯ ಮಾಡುವ ಮೂಲಕ ಗಮನ ಸೆಳೆದಿದ್ದು, ಈಗ ಸನ್ಮಾನಕ್ಕೆ ಒಳಗಾಗಿದ್ದಾರೆ.
ತಮ್ಮ ಸಹೋದ್ಯೋಗಿಗಳಿಂದ ಸೂಫಿ ಸೇಟ್ ಎಂದು ಕರೆಸಿಕೊಳ್ಳುವ ರೆಹಮಾನ್ ರೈಲ್ವೆ ನಿಲ್ದಾಣಕ್ಕೆ ಬರುತ್ತಿರುವ ವಲಸೆ ಕಾರ್ಮಿಕರ ಲಗೇಜ್ ಹೊತ್ತಿದ್ದಕ್ಕೆ ಯಾವುದೇ ಹಣವನ್ನು ಪಡೆಯುತ್ತಿಲ್ಲ.
ಇನ್ನೊಂದು ವಿಶೇಷವೆಂದರೆ ಈ ಕೆಲಸಕ್ಕಾಗಿ ಅವರು ಪ್ರತಿನಿತ್ಯ ತಮ್ಮ ಮನೆಯಿಂದ ಆರು ಕಿಲೋಮೀಟರ್ ನಡೆದೇ ಬರುತ್ತಿದ್ದಾರೆ. ರೈಲ್ವೆ ನಿಲ್ದಾಣವನ್ನು ತಮ್ಮ ಎರಡನೇ ಮನೆ ಎಂದು ಭಾವಿಸಿದ್ದಾರೆ.