ಬಲೆಗೆ ಸಿಲುಕಿ ಪರಿತಪಿಸುತ್ತಿದ್ದ ಲಂಗೂರ್ ರಕ್ಷಿಸಿದ ರೈತರು

ಬಲೆಯೊಂದರಲ್ಲಿ ಸಿಲುಕಿದ್ದ ಲಂಗೂರ್‌ ಮಂಗವೊಂದರ ಮರಿಯನ್ನು ರೈತರು ರಕ್ಷಿಸಿದ ವಿಡಿಯೋವೊಂದು ವೈರಲ್ ಆಗಿದೆ.

ಬಲೆಯನ್ನು ನಾಜೂಕಾಗಿ ಕಡಿದು, ಮರಿಯನ್ನು ಬಹಳ ಜತನದಿಂದ ಹೊರ ತೆಗೆಯಲು ರೈತರು ಮುಂದಾದ ವೇಳೆ ಆ ಮರಿಯ ತಾಯಿ ಹಾಗೂ ಬಳಗದ ಸದಸ್ಯರು ಅಷ್ಟು ದೂರದಲ್ಲಿ ಕುಳಿತು, ಇದನ್ನು ವೀಕ್ಷಿಸುತ್ತಿದ್ದು, ಬಳಿಕ ಆ ಮರಿಯನ್ನು ತೆಗೆದುಕೊಂಡು ಅದರ ತಾಯಿಯ ಬಳಿ ಬಿಟ್ಟಿದ್ದಾರೆ ರೈತರು.

ಇದೇ ಖುಷಿಯಲ್ಲಿ ಒಂದನ್ನೊಂದು ತಬ್ಬಿಕೊಂಡ ತಾಯಿ-ಮರಿ ಇಬ್ಬರೂ ಅಲ್ಲಿಂದ ಓಡಿಹೋಗಿವೆ. ಮೂಕ ಪ್ರಾಣಿಗಳ ನೆರವಿಗೆ ಬಂದ ರೈತರನ್ನು ಹೀರೋಗಳು ಎಂದು ಶ್ಲಾಘಿಸಿದ ಭಾರತೀಯ ಅರಣ್ಯ ಸೇವಾ ಅಧಿಕಾರಿ ಸುಧಾ ರಮೆನ್ ಈ ವಿಡಿಯೋವನ್ನು ತಮ್ಮ ಟ್ವಿಟರ್‌ ಖಾತೆಯಲ್ಲಿ ಶೇರ್‌ ಮಾಡಿಕೊಂಡಿದ್ದಾರೆ.